សំណួរ-ចម្លើយ ច្បាប់ស្តីពីទេសចរណ៍ (ភាគ៥)

សំណួរ

២១- តើការីទេសចរណ៍សំដៅដល់អ្វី ?

២២- តើកម្រៃអាជ្ញាបណ្ណទេសចរណ៍សំដៅដល់អ្វី ?

២៣- តើក្រមប្រតិបត្តិវិជ្ជាជីវៈសំដៅដល់អ្វី ?

២៤- តើក្រមសីលធម៌វិជ្ជាជីវៈសំដៅដល់អ្វី ?

២៥- តើក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជាសំដៅដល់អ្វី ?

ចម្លើយ

២១- ការីទេសចរណ៍ សំដៅដល់បុគ្គលដែលរៀបចំ និងលក់ខ្សែទស្សនកិច្ច ព្រមទាំងប្រមូលផ្តុំសេវាកម្មទេសចរណ៍ផ្សេងៗទៀត សម្រាប់លក់ដោយផ្ទាល់ ឬតាមរយៈភ្នាក់ងារទេសចរណ៍ ឬភាគីផ្សេងទៀតក្នុងកិច្ចសន្យា ។

២២- កម្រៃអាជ្ញាបណ្ណទេសចរណ៍ សំដៅដល់ប្រាក់ដែលត្រូវបង់ដើម្បីទទួលបានអាជ្ញាបណ្ណទេសចរណ៍ ពីក្រសួងទេសចរណ៍ ឬពីរដ្ឋបាលថ្នាក់ក្រោមជាតិ ។

២៣- ក្រមប្រតិបត្តិវិជ្ជាជីវៈ សំដៅដល់បញ្ញត្តិដែលត្រូវបានកំណត់ឡើងសម្រាប់ប្រភេទវិជ្ជាជីវៈនីមួយៗ នៃឧស្សាហកម្មទេសចរណ៍ ដែលមានចរិតលក្ខណៈជាកម្រិត ឬតម្រូវ រួមទាំងការពិន័យចំពោះអ្នកដែលបានប្រព្រឹត្តផ្ទុយ មិនបានគោរពអនុវត្តវិជ្ជាជីវៈ ដែលខ្លួនកំពុងអនុវត្តនោះ ។

២៤- ក្រមសីលធម៌វិជ្ជាជីវៈ សំដៅដល់ច្បាប់ទូន្មាន ដែលត្រូវបានកំណត់ឡើងសម្រាប់ប្រភេទវិជ្ជាជីវៈនីមួយៗនៃឧស្សាហកម្មទេសចរណ៍ មានចរិតលក្ខណៈជាអភិសមាចារ ដោយភ្ជាប់ជាមួយនូវការអប់រំ តម្រែតម្រង់ និងពន្យល់ណែនាំប្រតិបត្តិករទេសចរណ៍ ក្នុងគោលបំណងលើកកម្ពស់ចរិយាមារយាទល្អប្រពៃការគោរពអនុវត្តសីលធម៌វិជ្ជាជីវៈ ។

២៥- ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា សំដៅដល់នីតិបុគ្គលមានលក្ខណៈជាដៃគូរវាងផ្នែកឯកជន និងផ្នែកសាធារណៈដែលបង្កើតឡើងដើម្បីពង្រីក និងអនុវត្តឲ្យមានប្រសិទ្ធភាពសកម្មភាពការងារសិក្សាទីផ្សារ និងផ្សព្វផ្សាយទេសចរណ៍នៃព្រះរាជាណាចក្រកម្ពុជា ។

តភាគ