វ័យចាស់ជាងនេះអ្នកនឹងដឹង!

_ដឹងថាពេលខ្លះមនុស្សដែលនៅក្បែរយើង ហើយនិយាយល្អពីមុខយើង មិនប្រាកដថាគេនឹងស្មោះត្រង់ចំពោះយើងឡើយ។ ហើយជួនកាលអ្នកដែលមិនសូវនិយាយច្រើន និយាយលើកណាចាក់ចំបេះដូងអ្នក ធ្វើឱ្យអ្នកមានការឈឺចាប់ជាមួយនឹងពាក្យសម្តីរបស់គេ គេអាចនឹងល្អ ហើយចង់ឱ្យអ្នកបានប្រសើរពិតប្រាកដក៏ថាបាន។

_មនុស្សស្អាតមិនមែនសុទ្ធតែជាមនុស្សល្អទេ ហើយមនុស្សល្អក៏សុទ្ធតែជាមនុស្សមិនសូវស្អាត។ កុំមើលចំណុចល្អរបស់មនុស្សលើទៅរូបរាង សម្បត្តិខាងក្រៅ តែត្រូវមើលពីចិត្តគំនិតខាងក្នុង និងការស្តែងចេញរបស់គេ ដែលមិនមែនជាការសម្តែង។

_មិត្តរាប់អានជាមួយគ្នាមករាប់ឆ្នាំ ក៏មិនអាចសន្និដ្ឋានថាគេនឹងមានភក្តីភាពចំពោះយើងទេ ជួនកាលគ្រាន់តែយើងនៅមានប្រយោជន៍សម្រាប់គេ ហើយគេនៅត្រូវការយើងដើម្បីឱ្យជួយអ្វីម្យ៉ាងតែប៉ុនហ្នឹង។ កុំគិតថា មិត្តដែលរាប់អានមកច្រើនឆ្នាំ នឹងមិនមានថ្ងៃក្បត់អ្នក ព្រោះចិត្តមនុស្សតែងមានការផ្លាស់ប្តូរ កាន់តែរាប់អានយូរកាន់តែរឹតធ្វើឱ្យឈឺ ហើយសោកស្តាយខ្លាំងនៅពេលដែលគេបញ្ចេញធាតុពិត។

_អ្នកនឹងដឹងថា ក្រៅពីខ្លួនអ្នកគ្មាននរណាដែលនឹងមកស្មោះត្រង់ជាមួយអ្នករហូតនោះទេ។ ស្រឡាញ់ខ្លួនឯងឱ្យច្រើន មើលថែខ្លួនឯងឱ្យល្អ ធ្វើខ្លួនឱ្យរវល់ជាមួយជីវិតនេះ ហើយត្រៀមចិត្តសម្រាប់ទទួលយកការបាត់បង់ ព្រោះអ្នកនឹងបាត់បង់ ទោះបីជាខ្លួនអ្នកមិនចង់ក៏ដោយ។

អត្ថបទ: ខ្លឹមសារ-KlemSa