ផ្ទៃមេឃដែលកំពុងតែជះពន្លឺរស្មីដ៏ក្រហមឆ្អៅពីទិសខាងលិច

ផ្ទៃមេឃដែលកំពុងតែជះពន្លឺរស្មីដ៏ក្រហមឆ្អៅពីទិសខាងលិច...។ អារម្មណ៍ដែលកំពុងតែវិលវល់ជាមួយនឹងរឿងអតីតកាល វាចាប់ផ្តើមផុសចោទជាសំណួររាប់ពាន់សំណួរ ដោយមិនដឹងថាគួរឆ្លើយសំណួរមួយណាមុនឱ្យត្រូវនឹងកាលវេលាមួយនេះ។

មនុស្សម្នាក់ដែលធ្លាប់តែរីករាយប្រែក្លាយទៅជាមនុស្សដែលស្ងប់ស្ងាត់ រសាត់អណ្តែតអារម្មណ៍ទៅតាមសូរនៃខ្យល់។ សៀងសំនៀងវាយោបក់... ឱ! រូបខ្ញុំអើយ! តើខ្ញុំកំពុងតែគិតអ្វីនៅពេលនេះ? តើមានមនុស្សប៉ុន្មាននាក់ដែលជួបនូវអារម្មណ៍មួយនេះដូចខ្ញុំ។

... ឧស្ម័ននៃខ្យល់បានចូលទៅដល់ពេញច្រមុះ។
តើខ្ញុំកំពុងដែលខូចចិត្តឬ? ទេ! ខ្ញុំមិនបានជួបនូវរឿងអ្វីដែលទាស់ចិត្ត ឬខកបំណងឡើយ តែហេតុអ្វីបានជាវាក្លាយទៅវាបែបនេះ?

សាយណ្ហ! តើអ្នកអាចប្រាប់ខ្ញុំបានទេ តើខ្ញុំកំពុងតែជួបនូវរឿងអ្វី? ហេតុការណ៍ដែលកើតឡើងខ្ញុំមិនទាន់បានត្រៀមខ្លួនទុកមុនឡើយ។ តើខ្ញុំត្រូវតែប្រឈមមុខនឹងវាឬយ៉ាងណា? ឱ! សាយណ្ហអើយ ហេតុអ្វីបានជាអ្នកមិនឆ្លើយនូវសំណួររបស់ខ្ញុំ តើអ្នកស្អប់ខ្ពើមរូបខ្ញុំមែនទេ? ខ្ញុំបានតែសួរ សួរហើយសួរទៀត តែមិនមាននរណាម្នាក់អាចឆ្លើយវាប្រាប់មកកាន់ខ្ញុំបានទេ ប្រហែលជាខ្ញុំត្រូវតែស្វែងរកនូវចម្លើយទាំងនោះដោយខ្លួនឯងហើយ ព្រោះវាបានកើតឡើងចំពោះរូបខ្ញុំ អ្នកដទៃអាចនឹងជួយអ្វីខ្ញុំបានទេ ប្រសិនបើខ្ញុំមិនព្រមដោះស្រាយវាដោយខ្លួនឯងនិងប្រកបដោយសន្តិវិធី។

សំណេរ: ខ្លឹមសារ-KlemSa