ស្នេហាជាទិដ្ឋភាពដ៏ស្រស់ស្អាត

ការដែលមនុស្សពីរនាក់ស្រឡាញ់គ្នាវាគឺជារូបភាពដែលស្រស់ស្អាតស្រាប់ទៅហើយ។ ប៉ុន្តែមិនដឹងថាទិដ្ឋភាពនោះវានឹងអាចបន្តបានយូរប៉ុនណា? យល់ថាអារម្មណ៍នៃមនុស្សតែងតែមិនទៀង សុខៗក៏ល្អ មួយសន្ទុះក្រោយមកក៏ស្រាប់តែអន់ចិត្ត ពិបាកចិត្តដោយមិនដឹងខ្លួន ហើយក៏ទៅជះកំហឹងដាក់មនុស្សដែលគេមិនដឹងអី។

យល់ថាការដែលមនុស្សពីរនាក់ចែកផ្លូវគ្នាក៏គ្មានអ្វីក្រៅតែអំពីការមិនយល់ចិត្តគ្នា និងការយកតែចិត្តខ្លួនឯង។ នៅពេលដែលដល់ថ្ងៃមួយដែលកំហឹងរបស់យើងចេះតែបញ្ចេញ មិនចេះលាក់ អ្នកដែលនៅខាងៗយើងគេស្រាប់តែអស់ការអត់ធន់ គេឆ្អែត ឆ្អែតនឹងទង្វើដែលគ្មានហេតុផល ឆ្អែតនឹងការប្រព្រឹត្តដែលយើងធ្វើដាក់គេទាំងដែលគេមិនបានដឹងរឿងអ្វីជាមួយសោះយើងឡើយ ហើយពេលនោះគេក៏ចាកចេញ។

នៅពេលដែលគេចាកចេញហើយយើងមិនបាច់ព្យាយាមក្នុងការហាមឃាត់គេ ព្រោះវាគ្មានប្រយោជន៍អ្វីដែលគេនៅទ្រាំធន់ជាមួយមនុស្សដូចជាយើងទេ។ កុំសោកស្តាយប្រសិនជាគេទៅ ដោះលែងគេចុះ ដោះលែងឱ្យគេទទួលបានសេរីភាព និងជីវិតដែលមិនចាំបាច់ធន់ដូចនៅជាមួយយើង។ ទិដ្ឋភាពដ៏ស្រស់ស្អាតក៏ប្រែទៅជាក្រៀមស្រពោន ហើយប្រហែលជាមិនងាយក្នុងការស្រស់បំព្រងឡើងវិញ។

អត្ថបទ: ខ្លឹមសារ-KlemSa