រៀនមិនចេះអង្គុយកើតទុក្ខរៀនចេះវិញមែន?

មានធ្លាប់ឆ្ងល់ទេ ពេលរៀនមិនចេះ អង្គុយកើតទុក្ខរៀនចេះវិញមែន? ហើយបើដឹងថាអត់ហើយ ហេតុអ្វីមកអង្គុយកើតទុក្ខធ្វើអី? សិស្សមានពូកែ មានចេះ មានមិនសូវចេះ និងមានសិស្សខ្សោយ។

ជាទូទៅពេលរៀនមិនចេះ មិនពូកែ សិស្សទាំងនោះប្រាកដជាមានអារម្មណ៍ថាមិនសប្បាយចិត្តជាមិនខាន ព្រោះពេលក្រឡេកឃើញមិត្តខ្លួនបែរជារៀនពូកែទៅៗ។ ការគិតបែបនេះ ជារឿងវិជ្ជមានដែលសិស្សខ្សោយមានការឈឺចាប់នៅពេលខ្លួនរៀនមិនចេះ។ ប៉ុន្តែបញ្ហានៅត្រង់ថា សិស្សខ្លះបែរជាមិនសប្បាយរហូតដល់ថ្នាក់អង្គុយកើតតែទុក្ខ ហើយសិស្សខ្លះទៀតមិនកើតទុក្ខទេ បែរជាសប្បាយហួសកម្រិតទៅវិញ។

អ្វីដែលអ្នកត្រូវធ្វើ គឺបម្លែងការខូចចិត្តមកជាកម្លាំងចិត្តវិញ ដោយងាកមកមើលសៀវភៅ ធ្វើលំហាត់ ទន្ទេញមេរៀន ជាពិសេសរាប់អានមិត្តភក្តិល្អៗ និងយកចិត្តទុកដាក់ស្ដាប់គ្រូពន្យល់ជាដើម។ គេផ្សេងអាចធ្វើបាន យើងក៏អាចអធ្វើបាន។ លើសពីនេះ ត្រូវចាំថារៀនកាន់តែចេះ ចំណេះកាន់តែកើន សម្រស់កាន់ស្អាត ជីវិតកាន់តែរីករាយ។

អត្ថបទ៖ មុន្នី ប៊ុនថុង សិស្សនិទ្ទេស A ឆ្នាំ២០១៩
ប្រភព : អ្នកបន្តវេន