វិញ្ញាសាវប្បធម៌ទូទៅត្រៀមប្រឡងក្របខណ្ឌផ្ទៃក្នុងនិងសិស្សពូកែ (វិញ្ញាសាទី២៧)

សំណួរ

១. តើអង្គការកាកបាទក្រហមអន្តរជាតិ (I.C.R.C) បានចាប់បដិសន្ធិនៅពេលណា ? នរណាជាអ្នកបង្កើត ? ជនជាតិអ្វីមូលហេតុអ្វីបានជាគេបង្កើតអង្គការនេះឡើង ?

២. តើចលនាកាកបាទក្រហម អឌ្ឍចន្ទក្រហម អន្តរជាតិមានគោលដៅដូចម្តេចខ្លះ ?

៣. ចូរនិយាយពីប្រវត្តិនៃការបង្កើតចលនាកាកបាទក្រហមអឌ្ឍចន្ទក្រហមអន្តរជាតិ ។

៤. តើការផ្សព្វផ្សាយសៀវភៅ “អនុស្សាវរីយ៍នៅ ស៊ុលហ្វេរីណូ” លោក ហង់រី ឌុយណង់ មានគោលគំនិតដូចម្តេចខ្លះ ? ចូរបញ្ជាក់ ។

៥. តើស្ថាបនិកចលនកាកបាទក្រហម អឌ្ឍចន្ទក្រហមអន្តរជាតិ មានប៉ុន្មានរូប ? នរណាខ្លះ ?

ចម្លើយ

១. អង្គការកាកបាទក្រហមអន្តរជាតិ (I.C.R.C) បានចាប់បដិសន្ធិនៅកើតឡើងនៅថ្ងៃទី ៨ ឧសភា ១៨៦៣ ។ លោក ហង់រី ឌុយណង់ ជាពាណិជ្ជករជនជាតិស្វីស ។ មូលហេតុបង្កើតអង្គការនេះដើម្បីជួយសង្រ្គោះអ្នករងគ្រោះដោយសង្រ្គាម និងអ្នករបួស ។

២. ចលនាកាកបាទក្រហម អឌ្ឍចន្ទក្រហម អន្តរជាតិ មានគោលដៅរួមគ្នាគឺ ៖

• ការពារអាយុជីវិត
• កាត់បន្ថយទុក្ខសោក
• កាត់បន្ថយការឈឺចាប់ ខ្លោចផ្សារ
• ការពារសេចក្តីថ្លៃថ្នូរ
• បំផុសឱ្យមានស្ថេរភាព សន្តិភាពលើពិភពលោក ។

៣. ប្រវត្តិនៃការបង្កើតចលនាកាកបាទក្រហម អឌ្ឍចន្ទក្រហមអន្តរជាតិ ៖

ដោយមានការវាយប្រយុទ្ធគ្នាលើសមរភូមិស៊ុលហ្វេរីណូ រវាងកងទ័ពបារាំង អ៊ីតាលី និងអូទ្រីស ថ្ងៃ២៨.៦.១៨៥៩ក្នុងរយៈពេល ១៦ ម៉ោងបានបណ្តាលឱ្យមានស្លាប់ និងរបួសចំនួន ៤០,០០០នាក់ ។ លោក ហង់រី ឌុយណង់ ពាណិជ្ជករជាតិស្វីស បានផ្តើមគំនិតប្រមូល អ្នកស្ម័គ្រចិត្ត ជួយសង្រ្គោះ អ្នករបួសទាំងនោះ ដោយពុំមាន គិតថាខាងណាជាមិត្ត ខាងណាជាសត្រូវឡើយ ។

៤. ក្នុងឆ្នាំ ១៨៦២ លោក ហង់រី ឌុយណង់ ផ្សព្វផ្សាយសៀវភៅ “អនុស្សាវរីយ៍នៅ ស៊ុយហ្វេរីណូ” ដែលក្នុងនោះបានផ្តល់នូវ គោលគំនិត ២គឺ ៖

• បង្កើតសមាគមជួយសង្រ្គោះនៅប្រទេសស្វីសហើយតាមប្រទេសនីមួយៗ ក៏ត្រូវមានសមាគមជាតិដែលជួយសង្រ្គោះតាមប្រទេសរៀងៗខ្លួន ។
• បង្កើតឱ្យមានច្បាប់សម្រាប់គោរពការជួយសង្រ្គោះ “សមាគមអន្តរជាតិសង្រ្គោះអ្នករបួស” ត្រូវបានបង្កើតនៅថ្ងៃ ១៧ កុម្ភៈ ១៨៦៣ ក្នុងឆ្នាំ ១៨៦៧ សមាគមនោះបានប្រែឈ្មោះជា “គណៈកម្មាធិការអន្តរជាតិ កាកបាទក្រហម” ។

៥. ស្ថាបនិក ចលនាកាកបាទក្រហម អឌ្ឍចន្ទក្រហមអន្តរជាតិ មាន ៥ គឺ

• លោក ហង់រី ឌុយណង
• ឧត្តមសេនីយ ហង់រី ឌុយហ្វួរ
• ឧត្តមសេនីយ ម៉យនៀ
• វេជ្ជបណ្ឌិត ធីម៉ូណ័រ
• វេជ្ជបណ្ឌិតល្វីស អាភា ។