សំណួរ-ចម្លើយ សទ្ទានុក្រមវិទ្យាសាស្រ្តនយោបាយ និងការទូត (ភាគ១៨)

សំណួរ

៨៦- តើអាណានិគមនិយមបែបថ្មីសំដៅដល់អ្វី ?

៨៧- តើអ្នកនយោបាយព្រះអាទិត្យសំដៅដល់អ្វី ?

៨៨- តើឯករាជ្យសំដៅដល់អ្វី ?

៨៩- តើអំពើប្រល័យពូជសាសន៍សំដៅដល់អ្វី ?

៩០- តើអ្នកការទូតសំដៅដល់អ្វី ?

ចម្លើយ

៨៦- អាណានិគមនិយមបែបថ្មី សំដៅដល់ទម្រង់ថ្មីនៃអាណានិគមនិយមដែលប្រើសម្ពាធផ្នែកសេដ្ឋកិច្ច នយោបាយ វប្បធម៌ ឬសម្ពាធផ្សងៗទៀត ដោយប្រទេសដែលមានអំណាចខ្លាំងជាង ដើម្បីត្រួតពិនិត្យឬមានឥទ្ធិពលទៅលើប្រទេសដែលមានការអភិវឌ្ឍតិចតួច ។

៨៧- អ្នកនយោបាយព្រះអាទិត្យ សំដៅដល់អ្នកនយោបាយទាំងឡាយណា ដែលគ្រប់គ្រងអំណាចហើយនៅក្នុងកាលៈទេសៈណាមួយដែលបានបាត់បង់អំណាចនោះទៅ ក្នុងរយៈពេលក្រោមមកទៀត ក៏បានចាប់យកអំណាចមកវិញ ។ អ្នកនយោបាយប្រភេទនេះ គេហៅថា អ្នកនយោបាយព្រះអាទិត្យ ។

៨៨- ឯករាជ្យ សំដៅដល់ភាពនៃរដ្ឋឬប្រទេសដែលមានសិទ្ធិនិងសេរីភាពពេញបរិបូរក្នុងការគ្រប់គ្រងប្រទេសខ្លួនឯង មិនចំណុះប្រទេសដទៃ ។

៨៩- អំពើប្រល័យពូជសាសន៍ សំដៅដល់អំពើមួយក្នុងចំណោមអំពើដូចខាងក្រោមហើយ ដែលបានប្រព្រឹត្តក្នុងគោលបំណងបំផ្លិចបំផ្លាញទាំងស្រុង ឬមួយផ្នែកនៃក្រុមជាតិ ជាតិពន្ធុ ពូជសាសន៍ ឬសាសនាមួយនាដូចជា ៖

• ការធ្វើមនុស្សឃាតទៅលើសមាជិកនៃក្រុម
• ការធ្វើឲ្យរបួសយ៉ាងធ្ងន់ធ្ងរដល់រូបរាងកាយ ឬសតិបញ្ញាសមាជិកនៃក្រុម
• ការធ្វើដោយចេតនាឲ្យក្រុមនេះទទួលរងនូវស្ថានភាពរស់នៅមួយដែលរៀបចំឡើងសម្រាប់បំផ្លិចបំផ្លាញរាងកាយទាំងស្រុង ឬមួយផ្នែក
• ការដាក់នូវវិធានការនានា ដែលមានបំណងរារាំងមិនឲ្យមានការផ្តល់កំណើតទារក
• ការបញ្ជូនកុមារដោយបង្ខំពីក្រុមមួយទៅឲ្យក្រុមមួយទៀត ។

៩០- អ្នកការទូត សំដៅដល់អ្នកដែលធ្វើការងារទាក់ទងទៅនឹងការទូត ហើយដែលត្រូវបានបញ្ជូនពីប្រទេស ឬស្ថាប័នសាមីណាមួយដើម្បីទៅបំពេញការងារការទូតនៅបរទេស ។

តភាគ