ពិធីសែនមេបា ខ្មែរតែងប្រារព្ធធ្វើ កាលណាកូនចៅប្រព្រឹត្តខុសសីលធម៌សង្គមគ្រួសារដូចតទៅ ៖
- ខុសមេបាចាស់ទុំ ៖ ដោយកូនចៅបងប្អូនញាតិប្រាំពីរសន្តាន (ញាតិប្រាំពីរសន្តានគិតខាងលើ ៣ “ម្តាយឪពុកជីដូនជីតា យាយទួតតាទួត” ខាងក្រោម៣ “កូនចៅ ចៅទួត ចៅលួត ចៅលា” ។ ដូចនេះបងប្អូនទាំងប្រាំពីរសន្តានត្រូវជួបសែនព្រេនមេបាដោយសន្យាថា អោយអ្នកឈឺបានជាសះស្បើយចុះ ពួកគេនឹងសន្យា លែងឈ្លោះប្រកែកគ្នាតទៅទៀតហើយ ។
- ខុសមេបាកំលោះក្រមុំ ៖ ដោយកូនកំលោះ ឬក្រមុំបានលួចលាក់ស្រលាញ់គ្នាបានជាគូ ដោយរួមរ័ក្ស ពុំអោយឪពុកម្តាយដឹងឮ ។ ទោសនោះមេបាធ្វើអោយសមាជិកនៃគ្រួសារទាំងប្រាំពីរសន្តានណាមួយឈឺដាក់ថ្នាំមិនដល់សោះ ។ ពេលនោះគេតែងតែរាវរកកូនកំលោះ ក្រមុំ ដែលធ្វើខុសសីលធម៌អោយទៅនិយាយសារភាពកំហុស សែនព្រេងអង្វរអោយអ្នកឈឺបានជាសះស្បើយដូចដើមវិញចុះ ។
- ខុសមេបាផ្តាច់មុខ ឬបិទមុខ ៖ ក្នុងករណីសកម្មភាពស្រ្តីផិតក្បត់ប្តីទៅមានសាហាយ ។ ខុសមេបាប្រភេទនេះ គឺពិបាកនឹងរកឃើញណាស់ លុះត្រាតែស្រីដែលមានកំហុសនោះចេញមុខសារភាពកំហុសឆ្គងខ្លួនឯង ក្នុងផ្លូវមនោសញ្ចោតនាខ្ពស់ចំពោះញាតិទាំង៧សន្តាន ដែលមានជំងឺព្យាបាលមិនជាសះស្បើយ ។
