សំណួរ-ចម្លើយ វិស័យមុខងារសាធារណៈ (ភាគ៥)

សំណួរ

២១- ចូរឲ្យនិយមន័យស្ថាប័នមានសមត្ថកិច្ច ។

២២- ចូរឲ្យនិយមន័យស្ថាប័នទទួលសមត្ថកិច្ច ។

២៣- តើប្រភេទសេវាសាធារណៈចែកជាប៉ុន្មានប្រភេទ ? អ្វីខ្លះ ?

២៤- តើអ្វីទៅជាស្តង់ដារសេវាសាធារណៈ ?

២៥- តើស្តង់ដារសេវាសាធារណៈមានសារៈសំខាន់ដូចម្តេចខ្លះ ?

ចម្លើយ

២១- ស្ថាប័នមានសមត្ថកិច្ច សំដៅលើស្ថាប័នរដ្ឋ ឬភ្នាក់ងាររដ្ឋ ឬអាជ្ញាធរគ្រប់លំដាប់ថ្នាក់របស់រដ្ឋ ដែលបំពេញការងារក្នុងដែនសមត្ថកិច្ចរបស់ខ្លួន ។

២២- ស្ថាប័នទទួលសមត្ថកិច្ច សំដៅដល់ផ្នែកឯកជននិងសង្គមស៊ីវិលដែលទទួលបានសិទ្ធិ និងភារកិច្ចពីរដ្ឋ ហើយដែលស្ថិតនៅក្រោមការត្រួតពិនិត្យរបស់រដ្ឋ ឬភ្នាក់ងាររបស់រដ្ឋ ។

២៣- សេវាសាធារណៈចែកចេញជា៧ប្រភេទមានដូចជា ៖

ក- ចង្កោមសេវាពាក់ព័ន្ធនឹងអធិបតេយ្យភាពរដ្ឋ គឺជាសេវាទទួលខុសត្រូវផ្តាច់មុខរបស់រដ្ឋ ដែលផ្តល់ដោយអង្គភាពរបស់រដ្ឋ ឬនីតិបុគ្គលនៃនីតិសាធារណៈ ដែលរដ្ឋបានប្រគល់សិទ្ធិអំណាចឲ្យដើម្បីអនុវត្ត ។

ឧទាហរណ៍

• លិខិតអនុញ្ញាត អាជ្ញាប័ណ្ណ
• បញ្ជីអត្រានុកូលដ្ឋាន សំបុត្រកំណើត
• ប័ណ្ណសំគាល់យានយន្ត អាកាសយាន និងនាវា
• វិញ្ញាបនបត្រទទួលស្គាល់កម្មសិទ្ធិ អត្តសញ្ញាណប័ណ្ណប្រជាពលរដ្ឋខ្មែរ សៀវភៅគ្រួសារ និងការធ្វើនីត្យានុកូលកម្មជាដើម ។

ខ- ចង្កោមសេវាពាក់ព័ន្ធនឹងសន្តិសុខសណ្តាប់ធ្នាប់សាធារណៈសុវត្ថិភាពសង្គម គឺជាសមត្ថកិច្ចរបស់អាជ្ញាធរមានសមត្ថកិច្ច នគរបាលជាតិ កងរាជអាវុធហត្ថ និងកងយោធពលខេមរភូមិន្ទគ្រប់លំដាប់ថ្នាក់នៅទូទាំងប្រទេស ។

ឧទាហរណ៍

• សន្តិសុខ
• សណ្តាប់ធ្នាប់សាធារណៈ
• ការស្នាក់នៅ ការធ្វើដំណើរ
• ការប្រាស្រ័យទាក់ទង
• សុវត្ថិភាពសង្គម

គ- ចង្កោមសេវាពាក់ព័ន្ធនឹងយុត្តិធម៌ និងអាជ្ញាកណ្តាល គឺជាសមត្ថកិច្ចរបស់ក្រុមប្រឹក្សាអាជ្ញាកណ្តាល និងសមត្ថកិច្ចរបស់តុលាការ ។

ឧទាហរណ៍

• វិវាទរវាងប្រជាពលរដ្ឋ​និងប្រជាពលរដ្ឋ
• វិវាទរវាងប្រជាពលរដ្ឋនិងអ្នករាជការ
• វិវាទរវាងប្រជាពលរដ្ឋនិងផ្នែកឯកជន
• វិវាទរវាងអ្នករាជការនិងផ្នែកឯកជន

ឃ- ចង្កោមសេវាពាក់ព័ន្ធនឹងការលើកកម្ពស់កិច្ចការពាណិជ្ជកម្ម សហគ្រាស បរិស្ថាន វិនិយោគ និងការចូលរួមរបស់ផ្នែកឯកជន ។

ឧទាហរណ៍

• ការលើកកម្ពស់កិច្ចការពាណិជ្ជកម្ម
• ការអភិវឌ្ឍសហគ្រាសធុនតូចនិងមធ្យម
• បរិស្ថានវិនិយោគ​ និងការចូលរួមផ្នែកឯកជន

ង- ចង្កោមសេវាសង្គមកិច្ច វប្បធម៌ និងកិច្ចការនារី

ឧទាហរណ៍

• សេវាអប់រំ ៖ លើកកំពស់គុណភាពសេវាអប់រំសម្រាប់ទាំងអស់គ្នា សម្ភារៈសិក្សា គ្រប់គ្រាន់ និងសិទ្ធិទទួលបានសេវាអប់រំមូលដ្ឋាន
• សេវាអនាម័យ និងសុខភាព ៖ បង្កលក្ខណៈងាយស្រួល គុណភាព ប្រសិទ្ធភាព ដើម្បីផ្គត់ផ្គង់សេវាសុខាភិបាលមូលដ្ឋានប្រកបដោយសមធម៌ និងនិរន្តរភាពជូនប្រជាពលរដ្ឋគ្រប់រូបពិសេសជនក្រីក្រ-ជនងាយរងគ្រោះ ការចូលរួមរបស់ស្រ្តី ក្នុងការអភិវឌ្ឍសេដ្ឋកិច្ច សេវាផ្សេងទៀតដែលរួមចំណែកដល់ការកាត់បន្ថយភាពក្រីក្រ ។

ច- ចង្កោមសេវាពាក់ព័ន្ធនឹងការអភិវឌ្ឍហេដ្ឋារចនាសម្ព័ន្ធរូបវ័ន្ត

ឧទាហរណ៍

• ការកសាងប្រព័ន្ធគមនាគមន៍ដឹកជញ្ជូនរួមមាន ផ្លូវថ្នល់ ស្ពាន ផ្លូវដែក ផ្លូវទឹក កំពង់ផែ និងអាកាសយានដែលអាចតភ្ជាប់ទីក្រុងទៅជនបទនិងគ្រប់ទីកន្លែងទូទាំងប្រទេស
• ការកសាងមន្ទីរពេទ្យ សាលារៀន អណ្តូងទឹក ប្រព័ន្ធទឹកស្អាត ប្រព័ន្ធធារាសាស្រ្ត

ឆ- ចង្កោមសេវាពាក់ព័ន្ធនឹងការប្រមូលចំណូល ចំណាយ ការបើកផ្តល់

ឧទាហរណ៍

• ការកែលំអការគ្រប់គ្រងចំណូល ចំណាយ និងបើកផ្តល់ដោយតម្លាភាព និងប្រសិទ្ធិភាពខ្ពស់ជាងមុន សំដៅកាត់បន្ថយការលំបាករបស់អ្នកប្រើប្រាស់សេវា ។

២៤- ស្តង់ដារសេវាសាធារណៈ គឺជាម៉ែត្រវាស់កម្រិតនៃគុណភាព និងចរិតលក្ខណៈក្នុងការផ្តល់សេវាសាធារណៈ ដើម្បីទទួលបាននូវការពេញចិត្តពីសំណាក់ អ្នកប្រើប្រាស់សេវា (នីតិវិធី ពេលវេលា តម្លៃ ទីកន្លែង) ។

២៥- ស្តង់ដារសេវាសាធារណៈមានសារៈសំខាន់ដូចជា ៖

• សម្រាប់វាយតម្លៃថាតើការផ្តល់សេវាបានល្អតាមតម្រូវការ និងសេចក្តីរំពឹងទុករបស់អ្នកទទួលសេវាឬទេ ?
• ផ្តល់ជាមូលដ្ឋានសម្រាប់អ្នកទទួលសេវា វាយតម្លៃពីគុណភាពនៃសេវាដែលពួកគេបានទទួល
• ជួយផ្តល់ព័ត៌មានដល់អ្នកតផ្តល់សេវា និងអ្នកទទួលសេវា ធ្វើការវាយតម្លៃថាតើសេវាដែលគេបានផ្តល់ ឬបានទទួលធៀបជាមួយអ្នកផ្តល់សេវាដទៃទៀតយ៉ាងដូចម្តេច ?
• ជួយអ្នកផ្តល់សេវាសម្រេចបាននូវកាតព្វកិច្ច និងកាតព្វកិច្ចរបស់ពួកគេ ។

តភាគ