វិញ្ញាសាវប្បធម៌ទូទៅត្រៀមប្រឡងក្របខណ្ឌផ្ទៃក្នុងនិងសិស្សពូកែ (វិញ្ញាសាទី១២)

សំណួរ

១. តើទុក្ខសច្ចៈ មានន័យដូចម្តេច ? រកឧទារហណ៍ ។ តើគេមានវិធី ឬមាគ៌ាអ្វីខ្លះដើម្បីលុបបំបាត់ទុក្ខ ?

២. ដើម្បីពង្រឹងមាគ៌ាសន្តិភាព និងសុភមង្គលជាសកលឱ្យកាន់តែប្រសើរ តើព្រះពុទ្ធទ្រង់បានអប់រំមនុស្សដូចម្តេចខ្លះ ?

៣. តើមនុស្សដែលប្រកាន់ខ្ជាប់សុចរិតធម៌និងទទួលបានផលប្រយោជន៍អ្វីខ្លះ ?

៤. ចូរនិយាយពីដើមកំណើតសាសនាឥស្លាម ។

៥. តើពាក្យថា ម៉ូស្លីម មានន័យដូចម្តេច​ ?

ចម្លើយ

១. ទុក្ខសច្ចៈ គឺអ្វីៗទាំងអស់តែងមានទុក្ខ ។ ទុក្ខជាសេចក្តីពិតដែលត្រូវកើតមានដល់មនុស្សគ្រប់រូបដោយមិនអាចចៀសផុតឡើយ គ្រាន់តែខុសគ្នានៅត្រង់អ្នកខ្លះមានទុក្ខតិច អ្នកខ្លះមានទុក្ខច្រើន ។ ឧទារហណ៍ធម្មជាតិ របស់មនុស្សគ្រប់រូបតែងជួបនូវការ កើតចាស់ឈឺស្លាប់ ដែលគេហៅថា វដ្តជីវិត ។ គេអាចមានវិធី ឬមាគ៌ាដើម្បីលុបបំបាត់ទុក្ខ ឬផ្លូវទៅកាន់និពាន្វ ដែលជាឋានរលត់ទុក្ខរបស់ព្រះពុទ្ធជាម្ចាស់ (អគ្គអរិយសច្ចៈ) ហៅថា អដ្ឋង្គិកមគ្គ (អាត់ថាំងគិ កាក់មាក់) មាន៨ គឺ ៖

• សម្មាទិដ្ឋិ (សាំ ម៉ា ទិត ថិ) ៖ ការយល់ឃើញត្រឹមត្រូវ
• សម្មាសង្គប្ប (សាំ ម៉ា សង់ កាប់ ប៉ាក់) ៖ ការត្រិះរិះត្រឹមត្រូវ
• សម្មាវាចា (សាំ ម៉ា វា ចា) ៖ ពាក្យសំដីត្រឹមត្រូវ
• សម្មាកម្មន្ត (សាំ ម៉ា កាំ ម៉ាន់ តាក់) ៖ ការងារត្រឹមត្រូវ
• សម្មាអាជីវៈ (សាំ ម៉ា អា ជី វាក់) ៖ ចិញ្ចឹមជីវិតត្រឹមត្រូវ
• សម្មាវាយាទៈ (សាំ ម៉ា វា យាម ម៉ាក់) ៖ ការព្យាយាមក្នុងផ្លូវត្រឹមត្រូវ
• សម្មាសតិ (សាំ ម៉ា សតិ) ៖ ការភ្ញាក់រលឹកត្រឹមត្រូវ
• សម្មាសមាធិ (សាំ ម៉ា សាក់ ម៉ា ធិ) ៖ ការតាំងចិត្តត្រឹមត្រូវ ។

២. ព្រះសម្មាសម្ពុទ្ធទ្រង់បានអប់រំទូន្មានដល់មនុស្សទាំងអស់ឱ្យប្រកាន់ខ្ចាប់កុសលកម្មបថ ១០ប្រការ ឬអំពើសុចរិតធម៌ ១០យ៉ាង គឺការប្រព្រឹត្តល្អ ១០យ៉ាងរបស់ព្រះពុទ្ធសាសនាដោយកាយ វាចា ចិត្ត គឺមានកាយសុចរិត ៣ វចីសុចរិត ៤និងមនោសុចរិត ៣ ។

៣. មនុស្សដែលប្រកាន់ខ្ជាប់សុចរិតធម៌ នឹងទទួលបានផលប្រយោជន៍ដូចជា ៖

• រស់នៅដោយសុវត្ថិភាព សុភមង្គល រីកចម្រើន និងថ្លៃថ្នូរ
• គ្មានការត្មិះតិះដៀលពីអ្នកដទៃ
• មានកេរ្តិ៍ឈ្មោះល្អថាជាមនុស្សសុចរិត មានមិត្តភក្តិមនុស្សនៅជុំវិញខ្លួនស្រលាញ់រាប់អានច្រើន
• គ្មានការព្យាបាទ គុំគួនពីអ្នកដទៃ
• មានសុភមង្គលក្នុងគ្រួសារ សហគមន៍ និងសង្គមមានសន្តិភាព
• តែងបានទទួលត្រឡប់មកវិញអំពើប្រកបដោយសុចរិតធម៌ ។

៤. សាសនាឥស្លាមកើតឡើងនៅក្នុងផែនដីអារ៉ាប់ដោយសារមេដឹកនាំម្នាក់ឈ្មោះមហាម័ត រស់នៅទីក្រុងឡាម៉ិច នៃប្រទេសអារ៉ាប៊ី ។ ពាក្យថាឥស្លាមជាឈ្មោះជំនឿចំពោះព្រះអល់ឡោះ ។

៥. ពាក្យថា ម៉ូស្លីម ជាឈ្មោះនៃអ្នកកាន់លទ្ធិឥស្លាម ។ គេបានជឿប្រាកដថា ព្រះអល់ឡោះបានចាត់មហាម័តដែលជាព្យាការីឱ្យមកប្រកាសលទ្ធិឥស្លាមដល់ប្រជាជន ។ គម្ពីរធំរបស់សាសនាឥស្លាមឈ្មោះ ថាកូអាន ។