ជនជាតិខ្មែរយើង បានទទួលឥទ្ធិលពី លទ្ធិសាសនា ព្រាហ្មណ៍ លើច្រើនវិស័យដូចជា ៖
- លើវិស័យស្ថាបត្យកម្ម ៖ ខ្មែរយើងកសាងប្រាសាទភ្នំ ។
- លើវិស័យសិល្បៈ ៖ ខ្មែរយើងកសាងរូបចំលាក់បដិមានានា ដែលទាក់ទងនិងលទ្ធិសាសនា ព្រាហ្មណ៍ ព្រះវិស្ណុ ព្រះសិវៈ ព្រះឥសូរ... ។
- លើវិស័យអក្សរសាស្ត្រ-អក្សរសិល្ប៍ ៖ ខ្មែរយើងទទួលភាសាអក្សរសំស្រ្គឹត និងអក្សរសិល្ប៍ ដែលយើងហៅថាអក្សរសិល្ប៍សាសនាព្រាហ្មណ៍និយម ។
- លើវិស័យជំនឿ ទំនៀមទំលាប់ និងជីវភាពរស់នៅ ៖ ខ្មែរយើង មានជំនឿលើការបន់ស្រន់ ខ្មោច ព្រាយ បិសាច...។ ខ្មែរយើងធ្វើនំអន្សម នំគម តំណាង អោយលិង្គព្រះឥសូរ និងយោនីនាងឧមា ។ ពេលធ្វើពីធីផ្សេងៗគេរៀបចំស្លាធម៌ បាយសី សែនព្រេន ពេលរៀបមង្គលការគេរើសវេលាចូលរោង ពេលផ្ទឹម ធ្វើរានទេវតា រឺ ក្រុងពាលី.... ។ ពេលសង់ផ្ទះគេធ្វើការ ទស្សន៍ទាយលើដីកន្លែងសង់ ពេលលើកផ្ទះគេរៀបចំពីធីសែនព្រេនដល់ម្ចាស់ដីម្ចាស់ផ្ទះ មានព្រះធរណីជាដើម ។ ក្នុងពេលមានជំងឺផ្សេងៗ គេរៀបចំពីធីអុជទៀន ធូប អង្វរក បន់ស្រន់សុំ អោយជាសះស្បើយ លៀងអារក្សសុំអោយខ្មោច ជួយរៀបចំពីធីហៅព្រលឹង អញ្ឆាត់ព្រលឹងអ្នកជំងឺ...។
- លើស្មារតី និង ទឹកចិត្ត ៖ ព្រហ្មញ្ញសាសនា បានធ្វើអោយខ្មែរយើងមានទឹកចិត្តអង់អាចក្លាហាន មិនចុះញ៉ុមនិងខ្មាំងសត្រូវ ។ តែសាសនា នេះក៏ធ្វើអោយខ្មែរយើងចង់គំនុំគុំគួនគ្នា សងសឹងគ្នាទីបំផុតដែរ ។
- លើវិស័យនយោបាយ និង ការគ្រប់គ្រង ៖ ក្នុងសម័យអង្គរ ការគ្រប់គ្រងរបស់ព្រះរាជាបានអនុវត្តតាមលទ្ធិទេវរាជ ពោលគឺស្តេចមានតួនាទីស្មើនិងអាទិទេព ស្តេចគឺ អាទិទេព អាទិទេព គឺស្តេច ។ ពាក្យសំដីរបស់ស្តេច គឺជាពាក្យសំដីរបស់អាទិទេព ។ ក្នុងពេលសព្វថ្ងៃនេះ ពួកបាគូក៏ នៅមានឥទ្ធិពលដល់ការលើករាសីប្រសិទ្ធិពរដល់ព្រះរាជាផងដែរ ។
