សំណួរ-ចម្លើយ ច្បាប់ស្តីពីការប្រឆាំងអំពើពុករលួយ (ភាគ២៩)

សំណួរ

១៤១- ការទិញការដូរជូនថ្នាក់ដឹកនាំក្នុងថ្ងៃចូលឆ្នាំខ្មែរ ហើយយកលុយអង្គកាពមកប្រើ តើជាអំពើពុករលួយឬទេ ?

១៤២- អង្គភាពសុំសក្តិ គ្រឿងឥស្សរិយយស តែតែងតាំងមានការទាមទារប្រាក់ តើជាការពុករលួយឬទេ ?

១៤៣- តើគោ ក្របី ជ្រូក មាន់ ទា តម្រូវឱ្យប្រកាសឬទេ ?

១៤៤- តើលេខកូដម៉ាស៊ីនទូរស័ព្ទនីមួយៗ ត្រូវប្រកាសដែរ ឬទេ ?

១៤៥- ឡានវាយកូនកូល ស្ដីជិះលើទឹក ម៉ាស៊ីនថតរូប ម៉ាស៊ីនភ្លើង កុំព្យូទ័រ ម៉ាញ៉េ និងវិទ្យុ តើត្រូវប្រកាស ឬទេ ?

ចម្លើយ

១៤១- ការចំណាយក្នុងថ្ងៃបុណ្យប្រពៃណីដែលមិនមានតម្លៃច្រើន ជាទំនៀមទម្លាប់របស់គ្រប់ជាតិសាសន៍ គឺមិនមែនជាអំពើពុករលួយទេ ។ ចំពោះអំណោយដល់អង្គភាព គឺមិនខុសច្បាប់ទេ តែអំណោយចំពោះបុគ្គលនៅក្នុងអង្គភាព គឺខុសច្បាប់ ។

១៤២- មិនមានការអនុញ្ញាតស្របច្បាប់ ការទាមទារប្រាក់ទោះក្នុងរូបភាពណាក៏ដោយ ជាការខុសច្បាប់ និងក៏ជាអំពើពុករលួយ ។

១៤៣- គោ ក្របី ជ្រូក មាន់ ទា មិនតម្រូវឱ្យប្រកាសទេ តែចំណូលដែលបានមកពីការលក់សត្វទាំងនោះ ត្រូវប្រកាសក្នុងចំណុចចំណូលសម្រាប់ជាប្រយោជន៍របស់អ្នកប្រកាស ។

១៤៤- លេខកូដនៃម៉ាស៊ីនទូរស័ព្ទ មិនប្រកាសទេ ប្រកាសតែលេខទូរស័ព្ទប្រើប្រាស់ ដែលក្រុមហ៊ុនផ្តល់ឱ្យបុគ្គលនីមួយៗ ។

១៤៥- ប្រកាសតែឡានវាយកូនកូល និងស្ដីជិះលើទឹក ចំណែកម៉ាស៊ីនថតរូប ម៉ាស៊ីនភ្លើង កុំព្យូទ័រ ម៉ាញ៉េ និងវិទ្យុ មិនតម្រូវឱ្យប្រកាសទេ ។

តភាគ