សំណួរ
១. ដូចម្តេចហៅថា អំពើហិង្សា ?
២. តើអំពើហិង្សាអាចប៉ះពាល់ដល់មនុស្សទូទៅលើផ្នែកអ្វីខ្លះ ?
៣. តើមនុស្សថ្លៃថ្នូរត្រូវមានឥរិយាបថដូចម្តេចចំពោះគ្រួសារ ?
៤. តើមានវិធានការអ្វីខ្លះ ដើម្បីទប់ស្កាត់អំពើហិង្សា ?
៥. តើសកម្មភាពអ្វីខ្លះចាត់ទុកជាអំពើហិង្សាផ្នែកសេដ្ឋកិច្ច ?
ចម្លើយ
១. អំពើហិង្សា < អំពើ < ហិង្សា
- អំពើ ៖ ទង្វើ ការធ្វើការប្រព្រឹត្តិ ។
- ហិង្សា ៖ ការបៀតបៀន ការធ្វើអាក្រក់ ការធ្វើអំពើឃោរឃៅ ។
- អំពើហិង្សា សំដៅយកការរំលោភបំពាន ឬបង្ខិតបង្ខំផ្លូវកាយ ផ្លូវចិត្ត ផ្លូវភេទ ផ្លូវសេដ្ឋកិច្ច រួមបញ្ចូលទាំងការប្រមាថមាក់ងាយ ការគំរាមកំហែងការដាក់ឱ្យនៅឯកោដាច់ពីគេឯង និងការរំលោភបំពានផ្នែកជីវភាពសេដ្ឋកិច្ចពីសំណាក់បុគ្គលម្នាក់ ឬច្រើន ដើម្បីត្រួតត្រាទៅលើបុគ្គលផ្សេងៗទៀត ។
២. អំពើហិង្សាអាចប៉ះពាល់ដល់មនុស្សទូទៅលើផ្នែក
- រាងកាយ ៖ ធ្វើឱ្យមានរបួសស្នាម ពិការ
- ផ្នែកផ្លូវចិត្ត ៖ ពិបាកចិត្ត មានការបារម្មណ៍ សោកសង្រេង ស្តាយស្រណោះ
- ផ្នែកសេដ្ឋកិច្ច ៖ ធ្វើឱ្យមានការខូចខាតរបស់ទ្រព្យ និងមានការចំណាយប្រាកទៅលើការព្យាបាលរបួសស្នាមឬទិញថ្នាំព្យាបាល ដែលអាចធ្វើឱ្យជីវភាពគ្រួសារក្រីក្រជំពាក់គេជាដើម ។
៣. មនុស្សថ្លៃថ្នូរត្រូវមានឥរិយាបថល្អចំពោះគ្រួសារ គឺ ៖
- ចេះរកប្រាក់ចំណូលចូលក្នុងគ្រួសារ
- ចេះដោះស្រាយបញ្ហាផ្សេងៗដោយសន្តិវិធី
- ចេះគោរព កោតក្រែងចិត្តគ្នា
- ចេះថែទាំ ស្រឡាញ់គ្នា មានសាមគ្គីភាព
- មានតម្លាភាពចំពោះគ្នា និងមានភាពស្មោះត្រង់
- មិនត្រូវមើលបំណាំគ្នា
- ចេះបង្កបរិយាកាសសប្បាយរីករាយក្នុងគ្រួសារ
- មានការជួបប្រជុំគ្នា ក្នុងការរកដំណោះស្រាយបញ្ហាផ្សេងៗ ឬដើម្បីធ្វើការអភិវឌ្ឍគ្រួសារឱ្យមានការរីកចម្រើន
- ចេះសន្សំសំចៃ មិនខ្ជះខ្ជាយ ។
៤. ការទប់ស្កាត់អំពើហិង្សាក្នុងគ្រួសារនិងការពារជនរងគ្រោះឱ្យមានប្រសិទ្ធភាពត្រូវមានវិធានការដូចខាងក្រោម ៖
- ផ្សព្វផ្សាយច្បាប់ស្តីពីអំពើហិង្សាឱ្យយល់ដឹងគ្រប់គ្នា
- ដាក់ទណ្ឌកម្មដល់អ្នករំលោភច្បាប់ និងប្រើអំពើហិង្សា
- ធ្វើអន្តរាគមន៍តាមច្បាប់ឱ្យមានប្រសិទ្ធភាព ពេលមានអំពើហិង្សាក្នុងគ្រួសារ
- ការពារផ្លូវច្បាប់ជាបន្ទាន់ដោយតុលាការ
- ផ្តល់ព័ត៌មានដល់ជនរងគ្រោះ
- អាជ្ញាធរដែនដីធ្វើអន្តរាគមន៍ជាបន្ទាន់រាល់អំពើហិង្សាដែលបានកើតឡើង
- ផ្តល់ឱ្យជនរងគ្រោះនូវជំនួយសមស្របតាមរយៈកាលៈទេសៈនិងធានាសុវត្ថិភាព
- បង្វែរជនមុនសញ្ញា និងជនរងគ្រោះពីកន្លែងកើតហេតុក្នុងករណីកំពុងកើតហេតុ ។
៥. សកម្មភាពដែលចាត់ទុកថា ជាអំពើហិង្សាផ្នែកសេដ្ឋកិច្ចមាន ៖
- ការវាយបំផ្លាញទ្រព្យសម្បត្តិសម្ភារៈ
- លួចទ្រព្យសម្ភារៈរបស់របរក្នុងផ្ទះយកទៅលក់ បញ្ចាំ
- បង្ខាំងមិនឱ្យចេញទៅប្រកបមុខរបរ
- ការគារបសង្កត់ពុំផ្តល់លុយឱ្យប្រពន្ធ ឬប្តី ដើម្បីរ៉ាប់រងការចំណាយផ្សេងៗ របស់គ្រួសារ
- ការបង្ខិតបង្ខំ ដល់ជនរងគ្រោះ ដើម្បីយកលុយកាក់ឱ្យខ្លួនក្រោមលក្ខខណ្ឌរបស់ខ្លួនពុំសមហេតុផល ។
