សំណួរ-ចម្លើយ ច្បាប់ (ភាគ១១)

សំណួរ

៤៦- តើសហគ្រាសឯកបុគ្គលសំដៅទៅលើអ្វី ?

៤៧- តើពាក្យ "អាជីវកម្ម” មានន័យយ៉ាងដូចម្តេច ?

៤៨- តើ “សកម្មភាពសេដ្ឋកិច្ច” សំដៅដល់សកម្មភាពអ្វីខ្លះ ?

៤៩- តើបុគ្គលប្រភេទណាជា “អ្នកជាប់ពន្ធតាមរបបស្វ័យប្រកាស” ?

៥០- តើពាក្យថា តម្លៃទីផ្សារគឺសំដៅទៅលើអ្វី ?

ចម្លើយ

៤៦- ពាក្យ “សហគ្រាសឯកបុគ្គល” សំដៅដល់សហគ្រាសអាជីវកម្មដែលជាកម្មសិទ្ធិ ១០០ ភាគរយ របស់រូបវន្តបុគ្គលណាម្នាក់។ ក្នុងនិយមន័យនេះ ប្ដី ប្រពន្ធ និង កូនក្នុងបន្ទុក ត្រូវចាត់ទុកថាជារូបវន្តបុគ្គលតែម្នាក់ ។

៤៧- ពាក្យ "អាជីវកម្ម” សំដៅដល់សកម្មភាពសេដ្ឋកិច្ចរបស់បុគ្គល ដែលមានគោលដៅទាញយកប្រាក់ចំណូលអំពីការផលិតនិងលក់ទំនិញ ការផ្គត់ផ្គង់សេវាភតិសន្យា ការជួល ឬការលក់ទ្រព្យសម្បត្តិ ឬសកម្មភាពផ្សេងទៀត ។

៤៨- ពាក្យ "សកម្មភាពសេដ្ឋកិច្ច” សំដៅដល់សកម្មភាពរបស់បុគ្គល ដែលធ្វើជានិច្ចកាលជាប់បន្ត ឬមួយដងមួយគ្រា ដើម្បីរក ឬមិនរកចំណេញ ក្នុងការផ្គត់ផ្គង់ ឬមានបំណងផ្គត់ផ្គង់ទំនិញ ឬសេវាឱ្យដល់បុគ្គលដទៃ ក្នុងគោលដៅដើម្បីបានអត្ថប្រយោជន៍អ្វីមួយ ។

៤៩- បុគ្គលដែលជាអ្នកជាប់ពន្ធតាមរបបស្វ័យប្រកាសគឺ ៖

• ទ្រង់ទ្រាយគតិយុត្តិ ៖ រាល់សហគ្រាសដែលមិនមែនជាសហគ្រាសឯកបុគ្គល គឺត្រូវជាប់ពន្ធតាមរបបស្វ័យប្រកាស ទោះបីជាសហគ្រាសនោះមានសកម្មភាពអាជីវកម្មប្រភេទអ្វី ឬកម្រិតផលរបរប៉ុន្មានក៏ដោយ ។
• កំរិតផលរបរ ៖

         + សហគ្រាសមានផលរបរក្នុងរយៈពេល ៣ខែប្រតិទិនជាប់គ្នាណាមួយចាប់ពី ៖

         - ១២៥ លានរៀលឡើងទៅសម្រាប់ការផ្គត់ផ្គង់ទំនិញ ឬផ្គត់ផ្គង់ចំរុះ ឬ

         - ៦០ លានរៀលឡើងទៅសម្រាប់ការផ្គត់ផ្គង់សេវា ឬ

         - ៣០ លានរៀលឡើងទៅសម្រាប់ការធ្វើកិច្ចសន្យាជាមួយរដ្ឋ ។

         - សហគ្រាសដែលក្នុងពេលចាប់ផ្តើមរយៈពេល ៣ខែជាប់គ្នាណាមួយ មានមូលដ្ឋានជឿជាក់ថាទទួលបានផលរបរច្រើនជាងផលរបរដូចបានកំណត់ខាងលើ ។

         + សហគ្រាសមានផលរបរប្រចាំឆ្នាំចាប់ពី ៖

         - ៥០០ លានរៀលឡើងទៅសម្រាប់ការ ផ្គត់ផ្គង់ទំនិញ ឬផ្គត់ផ្គង់ចំរុះ ឬ

         - ២៥០ លានរៀលឡើងទៅសម្រាប់ការផ្គត់ផ្គង់សេវា ឬ

         - ១២៥ លានរៀលឡើងទៅសម្រាប់ការធ្វើកិច្ចសន្យាជាមួយរដ្ឋ ។

• ប្រភេទសកម្មភាពអាជីវកម្ម ៖ សហគ្រាសឯកបុគ្គលជាសហគ្រាស នីហរ័ណ-អាហរ័ណ ឬគម្រោង វិនិយោគមានលក្ខណៈសម្បត្តិគ្រប់គ្រាន់។
• សហគ្រាសបើកថ្មី ៖ ប្រសិនបើកម្រិតផលរបរប៉ាន់ស្មាន ឬប្រភេទសកម្មភាពអាជីវកម្មរបស់សហគ្រាស (ផ្អែកលើព័ត៌មានដែលមានចុះនៅក្នុងពាក្យសុំធ្វើអាជីវកម្ម) បំពេញនូវលក្ខខណ្ឌត្រូវជាប់ពន្ធតាមរបបស្វ័យប្រកាសដូចមានចែងក្នុងវាក្យខណ្ឌ២ និង៣ នៃកថាខណ្ឌនេះ។

៥០- តម្លៃទីផ្សារគឺជាថ្លៃមួយដែលអ្នកទិញធម្មតាម្នាក់ហ៊ានទិញទ្រព្យសកម្មក្នុងសភាព និងទីកន្លែងដែលទ្រព្យសកម្មនោះស្ថិតនៅ ។ តាមតម្លៃទីផ្សារគឺត្រូវបានប្រើចំពោះថ្លៃដូចខាងក្រោម ៖

• ការដកយកទំនិញឬសេវាមកប្រើប្រាស់ផ្ទាល់ខ្លួន ៖ ការដកយកទំនិញ ឬសេវាមកប្រើប្រាស់ផ្ទាល់ខ្លួនដោយម្ចាស់សហគ្រាសឯកបុគ្គលសហគ្រាសត្រូវកត់ត្រាក្នុងគណនីលក់ទំនិញ ឬសេវាដោយគិតតាមតម្លៃទីផ្សារនៃទំនិញឬសេវា ។ (ប្រកាសស្តីពីពន្ធលើប្រាក់ចំណេញ ផ្នែកទី ៥.៥.៦)
• ចំពោះការប្រើប្រាស់អចលកម្មសម្រាប់បំរើតម្រូវការផ្ទាល់ខ្លួនរបស់ម្ចាស់សហគ្រាស ត្រូវបានចាត់ទុកថាបានលក់តាមតម្លៃទីផ្សារឱ្យម្ចាស់សហគ្រាស (កត់ត្រាចូលក្នុងផលបន្ទាប់បន្សំ) នូវសេវាមួយដែលជាសេវានៃការផ្តល់អចលកម្មសម្រាប់បំរើតម្រូវការផ្ទាល់ខ្លួន របស់ម្ចាស់សហគ្រាសនោះ។ (ប្រកាសស្តីពីពន្ធលើប្រាក់ចំណេញ ផ្នែកទី ៦.២.១-ក)
• រាល់ទ្រព្យសកម្មត្រូវធ្វើគណនេយ្យកម្មនាថ្ងៃបញ្ចូលក្នុងបេតិកភ័ណ្ឌសហគ្រាស ដោយត្រូវកត់ត្រាតាមថ្លៃដើម ឬបរិយាទានប្រវត្តិសាស្ត្រដែលត្រូវបានកំណត់តាមតម្លៃទីផ្សារ ចំពោះទ្រព្យសកម្មដែលសហគ្រាសបានមកដោយគ្មានបង់ថ្លៃ៖ ក្នុងនេះត្រូវបានចុះបញ្ជីគណនេយ្យតាមតម្លៃទីផ្សារ ដែលជាថ្លៃមួយដែលអ្នកទិញធម្មតាម្នាក់ហ៊ានទិញទ្រព្យសកម្ម ក្នុងសភាព និងទីកន្លែងដែលទ្រព្យសកម្មនោះស្ថិតនៅ។

តភាគ