សំណួរ-ចម្លើយ ក្រមរដ្ឋប្បវេណី និងក្រមនីតិវិធីរដ្ឋប្បវេណី (ភាគ២៣)

សំណួរ

១១១- តើការកាន់កាប់បែងចែកជាប៉ុន្មានប្រភេទ ? អ្វីខ្លះ ?

១១២- តើកិច្ចសន្យាមុធាគឺជាអ្វី ? ចូរឲ្យឧទាហរណ៍ ?

១១៣- តើកិច្ចសន្យាត្រូវបានបែងចែកអ្វីខ្លះ ?

១១៤- តើក្រមរដ្ឋប្បវេណីបញ្ញត្តនូវវិធីផ្ទេរការកាន់កាប់ជាប៉ុន្មានវិធី ? អ្វីខ្លះ ?

១១៥- តើការប្រគល់ដោយសង្ខេបគឺជាអ្វី ?

ចម្លើយ

១១១- ការកាន់កាប់បែងចែកជា២ប្រភេទគឺ ៖

• ការកាន់កាប់ដោយចំពោះ
• ការកាន់កាប់ដោយប្រយោល ។

១១២- កិច្ចសន្យាមុធា គឺជាកិច្ចសន្យាដែលមានតែភាគីម្ខាងនៃកិច្ចសន្យាដែលមានកាតព្វកិច្ចផ្តល់តាវកាលិក ហើយភាគីម្ខាងទៀតពុំមានកាតព្វកិច្ចផ្តល់តាវកាលិកដែលមានខ្លឹមសារជាតម្លៃថ្នូរនោះទេ ។ ឧទាហរណ៍ កិច្ចសន្យាប្រទានកម្ម ។

១១៣- កិច្ចសន្យាត្រូវបានបែងចែកដោយឈរលើទស្សនមួយចំនួនដូចខាងក្រោម ៖

• ការបែងចែកដោយផ្អែកលើអត្ថិភាព ឬនត្ថិភាពនៃតាវកាលិកតបផ្នែកសេដ្ឋកិច្ច
• ការបែងចែកដោយផ្អែកលើអត្ថិភាព ឬនត្ថិភាពនៃកាតព្វកិច្ចដែលមាននៅក្នុងទំនាក់ទំនងដែលមានតម្លៃថ្នូរ
• ការបែងចែកដោយផ្អែកលើអត្ថិភាព ឬនត្ថិភាពនៃបញ្ញត្តិនៃក្រមរដ្ឋប្បវេណី ។

១១៤- ក្រមរដ្ឋប្បវេណីបញ្ញត្តនូវវិធីផ្ទេរការកាន់កាប់ជា៤វិធីគឺ ៖

• ការប្រគល់ដោយជាក់ស្តែង
• ការប្តូរលក្ខណៈនៃការកាន់កាប់
• ការប្រគល់ដោយសង្ខេប
• ការផ្ទេរការកាន់កាប់ដោយបញ្ជា ។

១១៥- ការប្រគល់ដោយសង្ខេប គឺសំដៅដល់ការផ្ទេរការកាន់កាប់តាមរយៈការព្រមព្រៀងរបស់គូភាគក្នុងករណីអនុប្បទានិកបានក្តាប់ទុកវត្ថុដោយជាកម្មវត្ថុនៃការកាន់កាប់នោះ នៅក្នុងដៃតាមការជាក់ស្តែងហើយអនុប្បទាយីបានបាត់បង់ការកាន់កាប់ដោយប្រយោលដែលខ្លួនធ្លាប់មាន (មាត្រា២២៩ កថាខណ្ឌទី៣) ។

តភាគ