សំណួរ-ចម្លើយ ពន្ធប្រថាប់ត្រា (ភាគ២)

សំណួរ

៦- តើការលើកលែងពន្ធមានទៅលើអ្វីខ្លះ ?

៧- តើពាក្យអចលនទ្រព្យសំដៅលើអ្វី ?

៨- តើពាក្យសន្តិកម្មសំដៅទៅលើអ្វី ?

៩- តើពាក្យប្រធានសក្តិសំដៅដល់អ្វី ?

១០- តើពាក្យភាគហ៊ុនសំដៅដល់អ្វី ?

ចម្លើយ

៦- ការលើកលែងពន្ធមានដូចជា ៖

• ការទទួលកម្មសិទ្ធិ ឬសិទ្ធិកាន់កាប់ដីក្នុងលក្ខណៈសម្បទានពីរាជរដ្ឋាភិបាលសម្រាប់ប្រយោជន៍សេដ្ឋកិច្ច ឬសង្គមកិច្ចពីដីឯកជនរបស់រដ្ឋដល់ជនក្រីក្រដែលខ្វះខាតដីសម្រាប់សង់លំនៅដ្ឋាន ឬនិងធ្វើកសិឧស្សាកម្ម ឬកសិកម្មជាលក្ខណៈគ្រួសារ ។
• ការទទួលកម្មសិទ្ធិ ឬសិទ្ធិកាន់កាប់អចលនទ្រព្យ និងមធ្យោបាយដឹកជញ្ជូនឬយានយន្ត ដែលត្រូវកត់ត្រាចុះក្នុងបញ្ជីសារពើភ័ណ្ឌរបស់ស្ថាប័ននានានៃព្រះរាជាណាចក្រកម្ពុជា ។
• ការទទួលកម្មសិទ្ធិ ឬសិទ្ធិកាន់កាប់អចលនទ្រព្យ និងមធ្យោបាយដឹកជញ្ជូនឬយានយន្តរបស់បេសកកម្មទូត ឬកុងស៊ុលបរទេស ឬអង្គការអន្តរជាតិ ឬទីភ្នាក់ងារសហប្រតិបត្តិការរបស់រដ្ឋាភិបាលនានា ។
• ការទិញមធ្យោបាយដឹកជញ្ជូនឬយានយន្ត ធ្វើជាទំនិញដើម្បីលក់វិញរបស់សហគ្រាសនានា ដែលបានចុះបញ្ជីនៅរដ្ឋបាលសារពើពន្ធ និងបានបង់ពន្ធអាករប្រចាំខែ និងប្រចាំឆ្នាំ ។
• អ្នកវិនិយោគមូលបត្រដែលទទួលបានសិទ្ធិកាន់កាប់ភាគហ៊ុន តាមរយៈការជួញដូរមូលបត្រក្នុងទីផ្សារដំបូង ឬក្នុងទីផ្សារបន្ទាប់ ។

- ការផ្ទេរភាគហ៊ុន ការទទួលសិទ្ធិកាន់កាប់ភាគហ៊ុន ការរំលាយក្រុមហ៊ុនបញ្ចូលគ្នា ការកែប្រែរចនាសម្ព័ន្ធភាគហ៊ុនិក ការបំបែកហ៊ុន (Share Slit) របស់ក្រុមហ៊ុនដែលមានបំណងបោះផ្សាយលក់មូលបត្រជាសាធារណៈនៅក្នុងទីផ្សារដំបូង ឬនៅក្នុងទីផ្សារបន្ទាប់ ឬក្រុមហ៊ុនដែលធ្វើអាជីវកម្មពាក់ព័ន្ធក្នុងវិស័យមូលបត្រ ទោះបីតម្រូវឲ្យមានការកែប្រែលក្ខខន្តិកៈក្រុមហ៊ុននៅក្រសួងពាណិជ្ជកម្មក៏ដោយ ការលើកលែងពន្ធប្រថាប់ត្រានេះត្រូវមានលិខិតបញ្ជាក់ពីគណៈកម្មការមូលបត្រកម្ពុជា ។

- ករណីក្រុមហ៊ុន មិនអាចធ្វើការបោះផ្សាយលក់មូលបត្រជាសាធារណៈបាន ដោយអនុលោមតាមច្បាប់ស្តីពីការបោះផ្សាយ និងការជួញដូរមូលបត្រមហាជន អ្នកទទួលសិទ្ធិកាន់ភាគហ៊ុនរបស់ក្រុមហ៊ុននេះត្រូវជាប់ពន្ធប្រថាប់ត្រា និងទទួលពន្ធប្រថាប់ត្រានៃការផ្ទេរភាគហ៊ុនកន្លងមក ដោយអនុលោមតាមប្រកាសនេះ លើកលែងតែមានលិខិតបញ្ជាក់ដោយឡែក ពីគណៈកម្មការមូលបត្រកម្ពុជា ដោយផ្អែកលើហេតុផលសមស្រប ដូចជា ករណីប្រធានសក្តិជាដើម ។

៧- ពាក្យអចលនទ្រព្យ សំដៅដល់ដី ផ្ទះ អាគារ និងសំណង់ផ្សេងៗ ទោះបីបានចុះបញ្ជី ឬមិនចុះបញ្ជី ដោយរដ្ឋបាយសុរិយោដី ។

៨- ពាក្យសន្តិកម្ម សំដៅដល់ការផ្ទេរអចលនទ្រព្យពីមនុស្សស្លាប់ឲ្យទៅញ្ញាតិតាមរយៈ ៖

• បណ្តាំជាលាយលក្ខអក្សរ ករណីគ្មានទំនាស់ ឬ
• បញ្ជាក់លើលិខិតយថាភូត ករណីគ្មានទំនាស់ ឬ
• សាលក្រម ឬសាលដីកាតុលាការ ករណីគ្មានទំនាស់ ។

៩- ពាក្យប្រធានសក្តិ សំដៅដល់បាតុភូត ឬព្រឹត្តិការណ៍កើតឡើងដោយមិនដឹងជាមុន មិនអាចប៉ាន់ស្មានជាមុនបាន និងមិនអាចជំនះបាន ដូចជា គ្រោះធម្មជាតិ (ទឹកជំនន់ ខ្យល់ព្យុះ រញ្ជួយដី) សង្រ្គាម កុប្បកម្ម អគ្គិភ័យ ឬគ្រោះមហន្តរាយជាយថាហេតុ ។

១០- ពាក្យភាគហ៊ុន សំដៅដល់ផ្នែកណាមួយ ឬទាំងស្រុងនៃភាគហ៊ុន ឬផលប្រយោជន៍ ឬលក់អាជីវកម្មរបស់ក្រុមហ៊ុននីតិបុគ្គល ក្រុមហ៊ុនអាជីវកម្ម និងសហគ្រាសឯកបុគ្គល ដែលបានចុះបញ្ជី ឬមិនចុះបញ្ជីនៅក្រសួងពាណិជ្ជកម្ម ។

តភាគ