សំណួរ
២៦- ចូររៀបរាប់ពីនីតិវិធីនិងការធ្វើបែបបទយន្តហោះសម្រាប់ការនាំចូលទំនិញ ?
២៧- ចូរឲ្យនិយមន័យការឆ្លងកាត់ជាតិ ?
២៨- ចូរឲ្យនិយមន័យការឆ្លងកាត់អន្តរជាតិ ?
២៩- ចូររៀបរាប់ពីការអនុវត្តនីតិវិធីឆ្លងកាត់ជាតិ ?
៣០- ចូររៀបរាប់ពីការអនុវត្តនីតិវិធីឆ្លងកាត់អន្តរជាតិ ?
ចម្លើយ
២៦- នីតិវិធីនិងការធ្វើបែបបទយន្តហោះ ៖
- យន្តហោះចេញចូលក្នុងព្រះរាជាណាចក្រកម្ពុជា ត្រូវជូនដំណឹងដល់អាជ្ញាធរនៃរដ្ឋលេខាធិការដ្ឋានអាកាសចរស៊ីវិលនៃព្រះរាជាណាចក្រកម្ពុជា
- ពេលហោះហើរក្នុងដែនអាកាសកម្ពុជា មិនអនុញ្ញាតឲ្យទម្លាក់ទំនិញខុសពីតម្រាយផ្លូវឡើយ លើកលែងតែករណីដែលបណ្តាលឲ្យមានគ្រោះថ្នាក់ជាយថាហេតុ ដែលត្រូវរាយការណ៍ជាបន្ទាន់ដល់សមត្ថកិច្ចគយដែលនៅជិតបំផុតនៅនឹងកន្លែងចុះចត
- ការលើកដាក់ទំនិញឥវ៉ាន់អ្នកដំណើរចុះឡើងពីយន្តហោះត្រូវមានការអនុញ្ញាតនិងការត្រួតពិនិត្យពីមន្ត្រីគយ
- នៅពេលមន្ត្រីគយធ្វើការត្រួតពិនិត្យឆែកឆេរយន្តហោះ អាកាសយយានិក ឬអ្នកតំណាងត្រូវបង្កលក្ខណៈងាយស្រួលក្នុងពេលបំពេញភារកិច្ច
- ក្នុងករណីយន្តហោះដែលមានគ្រោះថ្នាក់ ឬមានការចៀសវាងគ្រោះថ្នាក់ រួចមានការចុះថតនៅចំណតអាកាសយានដ្ឋានណាមួយដែលគ្មានមន្រ្តីគយ ក្នុងករណីនេះអាកាសយាននិក ឬអ្នកតំណាងត្រូវរាយការណ៍ឲ្យរដ្ឋអំណាចមូលដ្ឋានទីនោះធ្វើការត្រួតពិនិត្យជំនួសមន្រ្តីគយ ។
២៧- និយមន័យការឆ្លងកាត់ជាតិ មានន័យថាជាការដឹកជញ្ជូនទំនិញពី ៖
- ការិយាល័យគយមាត់ច្រកចូលឆ្ពោះទៅកាន់ ការិយាល័យគយមួយទៀត
- ការិយាល័យគយមួយ ឬទីកន្លែងបញ្ចេញទំនិញពីគយដែលមានការអនុញ្ញាតទៅការិយាល័យគយមួយនាមាត់ច្រកចេញ
- ការិយាល័យគយមួយ ឬទីកន្លែងបញ្ចេញទំនិញពីគយដែលមានការអនុញ្ញាតទៅការិយាល័យគយមួយទៀត ឬទីកន្លែងបញ្ចេញទំនិញពីគយដែលមានការអនុញ្ញាតផ្សេងទៀតនៅក្នុងដែនគយ ។
២៨- និយមន័យការឆ្លងកាត់អន្តរជាតិ គឺជាការដឹកជញ្ជូនទំនិញពីការិយាល័យគយមាត់ច្រកចូល ចូលទៅក្នុងដែនគយឆ្ពោះទៅកាន់ការិយាល័យគយមាត់ច្រកចេញ ចេញទៅក្រៅដែនគយ ។
២៩- ការអនុវត្តនីតិវិធីឆ្លងកាត់ជាតិមានដូចជា ៖
ក- ទំនិញនាំចូលឆ្លងកាត់ទៅផែស្ងួត
- ប្រតិបត្តិករត្រូវទទួលការអនុញ្ញាតជាមុនពី អគរ ដើម្បីអនុវត្តនីតិវិធីនៃការឆ្លងកាត់គយ
- ជើងសាគយត្រូវបំពេញប្រតិវេទន៍គយបំព្រួញនៅការិយាល័យចេញដំណើរ
- មន្រ្តីគយទទួលបន្ទុកគ្រប់គ្រងនិវេទន៍ប័ណ្ណទំនិញ កាត់កុងតឺន័រចេញពីបញ្ជីស្តុកកុងតឺន័រ
- កុងតឺន័រអាចត្រូវស្កែននៅការិយាល័យចេញដំណើរ ឬការិយាល័យគយណាមួយនៅភ្នំពេញ
- ក្នុងករណីពុំមានភាពមិនប្រក្រតី មន្ត្រីគយមានសមត្ថកិច្ចត្រូវបោះត្រា និងបញ្ជាក់នីតិវិធីគយឆ្លងកាត់ ដោយកំណត់លក្ខខណ្ឌមួយចំនួនដូចជាតម្រាយផ្លូវស្របច្បាប់ និងរយៈពេលឆ្លងកាត់ហើយកិបសៀលគយ
- ប្រធានការិយាល័យចេញដំណើរចុះហត្ថលេខាបញ្ចប់បែបបទឆ្លងកាត់
- មន្រ្តីគយអនុញ្ញាតឲ្យកុងតឺន័រចេញទៅផែស្ងួត ។
ខ- ទំនិញនាំចូលឆ្លងកាត់ទៅតំបន់សេដ្ឋកិច្ចពិសេស
- ប្រតិបត្តិករត្រូវធ្វើលិខិតស្នើសុំទៅការិយាល័យចេញដំណើរ ដើម្បីដឹកជញ្ជូនទំនិញក្រោមរបបឆ្លងកាត់ជាតិមកតំបន់សេដ្ឋកិច្ចពិសេស ។ លិខិតស្នើសុំនេះត្រូវមានការបញ្ជាក់ពីតំណាង អគ្គនាយកដ្ឋានគយនិងរដ្ឋាករប្រចាំតំបន់សេដ្ឋកិច្ច ពិសេស
- ជើងសាគយត្រូវបំពេញប្រតិវេទន៍គយបំព្រួញនៅការិយាល័យចេញដំណើរ
- មន្រ្តីគយទទួលបន្ទុកគ្រប់គ្រងនិវេទន៍បណ្ណទំនិញ កាត់កុងតឺន័រចេញពីបញ្ជីស្តុកកុងតឺន័រ
- ក្នុងករណីពុំមានភាពមិនប្រក្រតីមន្រ្តីគយមានសមត្ថកិច្ចត្រូវបោះត្រា និងបញ្ជាក់ពីនីតិវិធីគយឆ្លងកាត់ដោយកំណត់លក្ខខណ្ឌមួយចំនួនដូចជា តម្រាយផ្លូវស្របច្បាប់និងរយៈពេលឆ្លងកាត់ហើយកិបសៀលគយ
- ប្រធានការិយាល័យចេញដំណើរចុះហត្ថលេខាបញ្ចប់ពីបែបបទឆ្លងកាត់
- មន្រ្តីគយអនុញ្ញាតឲ្យកុងតឺន័រចេញទៅតំបន់សេដ្ឋកិច្ចពិសេស ។
គ- ទំនិញនាំចេញឆ្លងកាត់ទៅមាត់ច្រកចេញ
- មន្ត្រីគយនិងរដ្ឋាករមានសមត្ថកិច្ចប្រចាំការមាត់ច្រកចេញត្រួតពិនិត្យប្រក្រតីភាពនៃសៀលគយលើមធ្យោបាយដឹកជញ្ជូន ឬកុងតឺន័រឆ្លងកាត់ដោយផ្ទៀងផ្ទាត់ជាមួយឯកសារឆ្លងកាត់ ។ ក្នុងករណីយល់ថាពុំមានភាពមិនប្រក្រតី មន្រ្តីគយកាត់សៀលគយចេញមុននិងអនុញ្ញាតឲ្យដឹកជញ្ជូនចេញ
- មន្ត្រីគយនិងរដ្ឋាករមានសមត្ថកិច្ចប្រចាំការមាត់ច្រកបោះត្រា “បានកាត់សៀលគយរួច” និងចុះហត្ថលេខាលើកំណត់ហេតុរួមស្តីពីការត្រួតពិនិត្យទំនិញរាយនភ័ណ្ឌនាំចេញដែលមានចុះហត្ថលេខាអាងមន្រ្តីគយ និងរដ្ឋាករនៃសាខាគយនិងរដ្ឋាករនាំចេញ និងមន្រ្តីកាំកុងត្រួលនៃការិយល័យកាំកុងត្រួលផែស្ងួត ។
៣០- ការអនុវត្តនីតិវិធីឆ្លងកាត់អន្តរជាតិ ៖
ក- នៅមាត់ច្រកចូល
- ជើងសាគយត្រូវបំពេញប្រតិវេទន៍គយបំព្រួញនៅការិយាល័យចេញដំណើរ
- មន្រ្តីគយនិងរដ្ឋាករមានសមត្ថកិច្ចត្រូវបំពេញក្នុងផ្នែក A និង C នៃប្រតិវេទន៍គយ ។ ក្នុងករណីពុំមានភាពមិនប្រក្រតីមន្រ្តីគយមានសមត្ថកិច្ចត្រូវបោះត្រា និងបញ្ជាក់នីតិវិធីគយឆ្លងកាត់ដោយកំណត់លក្ខខណ្ឌមួយចំនួនដូចជា តម្រាយផ្លូវស្របច្បាប់និងរយៈពេលឆ្លងកាត់ហើយកិបសៀលគយ ។
ខ- នៅមាត់ច្រកចេញ
- ប្រតិបត្តិករនីតិវិធីនៃការឆ្លងកាត់គយ ឬតំណាងរបស់ខ្លួនបង្ហាញប្រតិវេទន៍គយបំព្រួញជូនដល់មន្តីគយនិងរដ្ឋាករមានសមត្ថកិច្ច
- មន្ត្រីគយនិងរដ្ឋាករមានសមត្ថកិច្ចនាមាត់ច្រកចេញត្រួតពិនិត្យនូវប្រក្រតីភាពនៃត្រា ឬសៀលគយលើមធ្យោបាយដឹកជញ្ជូន ឬកុងតឺន័រឆ្លងកាត់ ។ ក្នុងករណីយល់ថាពុំមានភាពមិនប្រក្រតី មន្រ្តីគយនិងរដ្ឋាករបញ្ជាក់នៅក្នុងផ្នែក D នៃប្រតិវេទន៍គយរួចកត់ត្រា ឬសៀលគយចេញមុនអនុញ្ញាតឲ្យដឹកជញ្ជូនឆ្លងកាត់ប្រទេសទីបី ។
តភាគ
