វិញ្ញាសាប្រវត្តិវិទ្យា ប្រឡងឆមាសលើកទី២ ថ្នាក់ទី១២ ២៥ មិថុនា ២០១២ (ថ្នាក់វិទ្យាសាស្ត្រសង្គម)

ប្រឡងឆមាសលើកទី២ ថ្នាក់ទី១២
សម័យប្រឡងៈ ២៥ មិថុនា ២០១២
វិញ្ញាសាៈ ប្រវត្តិវិទ្យា (ថ្នាក់វិទ្យាសាស្ត្រសង្គម)
រយៈពេលៈ ៦០នាទី
ពិន្ទុៈ ៥០ពិន្ទុ

I.(១០ពិន្ទុ) នៅមុនព្រឹត្តិការណ៍ថ្ងៃទី ១៨ ខែ មីនា ឆ្នាំ ១៩៧០ តើសេដ្ធកិច្ចប្រទេសកម្ពុជាមានស្ថានភាពដូចម្តេច?

II.(១០ពិន្ទុ) តើកត្តាអ្វីខ្លះដែលជំរុញឱ្យមានការកសាងប្រព័ន្ធដឹកនាំពិភពលោកតែមួយ (សកលភាវូបនីយកម្ម)

III.(១២ពិន្ទុ)

   ១.តើប្រទេសណាខ្លះដែលស្ថិតនៅក្នុងតំបន់មជ្ឃិមបូព៌ា់

   ២.តើសាសនាអ្វី ដែលចាប់កំណើតនៅក្នុងតំបន់មជ្ឃិមបូព៌ា?

   ៣.តើធនធានធម្មជាតិអ្វី ដែលសម្បូរនៅក្នុងមជ្ឃិមបូព៌ា?

   ៤.ហេតុអ្វីបានជាប្រទេសទាំងឡាយនៅតំបន់មជ្ឃិមបូព៌ាកើតមានសង្គ្រាមជាញឹកញាប់?

IV.(១៤ពិន្ទុ)

   ១.ចាប់ពីឆ្នាំ​១៩៧៩ មកដល់បច្ចុប្បន្ន តើប្រទេសកម្ពុជាមានឈ្មោះអ្វីខ្លះ?​ចូរបញ្ជាក់កាលបរិច្ចេកតាមឈ្មោះនីមួយៗ?

   ២.នៅខែមេសា ឆ្នាំ​១៩៨៩ តើសភានៃប្រទេសកម្ពុជាបានធ្វើវិសោធនកម្មអ្វីខ្លះទៅលើរដ្ធធម្មនុញ្ញឆ្នាំ​១៩៧៩?

   ៣.ក្រោយសន្ធិសញ្ញាសន្តិភាពទីក្រុងប៉ារីសថ្ងៃទី​២៣ ខែ តុលា ឆ្នាំ ១៩៩១ ហេតុអ្វីបានជាមានវត្តមានអាជ្ញាធរបណ្តោះអាសន្ននៃអង្គការសហប្រជាជាតិនៅកម្ពុជា?

V.(១៤ពិន្ទុ) ក្នុងពេលមានវិបត្តិសេដ្ធកិច្ចពិភពលោកឆ្នាំ​១៩២៩ - ១៩៣៣

   ១.តើនៅសហរដ្ធអាមេរិកមានបញ្ហាអ្វីកើតឡើង?

   ២.ក្នុងការអនុវត្តវិធានការថ្មី ដើម្បីព្យាបាលវិបត្តិសេដ្ធកិច្ចពិភពលោកនេះ តើលោកប្រធានាធិបតីសហរដ្ធអាមេរិក បានបង្កើតភ្នាក់ងារអ្វីខ្លះ? តើភ្នាក់ងារនីមួយៗមានទិសដៅដូចម្តេច?

VI.(១៥ពិន្ទុ)

   ១.ក្នុងរបបកម្ពុជាប្រជាធិបតេយ្យ តើពន្ធនាគារត្រូវបានគេហៅដូចម្តេច? មានតួនាទីអ្វីខ្លះ?

   ២.តើពន្ធនាគារថ្នាក់មជ្ឃិម និងធំជាងគេ ដែលបានសម្លាប់មនុស្សអស់ជាង ១២ ០០០នាក់ មានឈ្មោះអ្វី? តើនរណាជាប្រធានពន្ធនគារនេះ? តើបច្ចុប្បន្នគាត់ស្ថិតក្នុងស្ថានភាពផ្លូវច្បាប់ដូចម្តេច?

   ៣.តើនរណាខ្លះជាខ្មាំងសត្រូវរបស់អង្គការនៃរបបកម្ពុជាប្រជាធិបតេយ្យ?

   ៤.ហេតុអ្វីបានជារបបកម្ពុជាប្រជាធិបតេយ្យដួលរលំនៅថ្ងៃទី ០៧ ខែ មករា ឆ្នាំ ១៩៧៩?

ចម្លើយ

I.(១០ពិន្ទុ) នៅមុនព្រឹត្តិការណ៍ថ្ងៃទី ១៨ ខែ មីនា ឆ្នាំ ១៩៧០ សេដ្ធកិច្ចប្រទេសកម្ពុជាមានស្ថានភាព៖

• ឈប់ទទួលយកជំនួយយោធាពីសហរដ្ធអាមេរិក
• ទទួលយកជំនួយយោធាពីចិនវិញ តែមិនអាចស្ថារស្ថានភាពកងទ័ពបានទេ
• ធ្វើជាតូបនីយកម្មក្នុងវិស័យពាណិជ្ជកម្ម
• បិទធានាគារឯកជន
• បាត់បង់ចំណូលលើការនាំចេញ
• ការរត់ពន្ធ បង្កើតឱ្យមានពាណិជ្ជកម្មលូចលាក់
• ពាណិជ្ជកម្មក្រៅប្រទេសជួបការរអាក់រអួល ដោយសារការបាត់បង់ជំនាញគ្រប់គ្រង និងកង្វះបច្ចេកទេសជំនាញ
• សេដ្ធកិច្ចរាំងស្ទះដោយសារបាត់់បង់ប្រាក់ចំណូល (ការរត់ពន្ធ)
• ការគ្រប់គ្រងឧស្សាហកម្មមិនបានល្អ និងការចំណាយខ្វះតុល្យភាព
• កសិកម្មជួបវិបត្តិ ដោយសារប្រព័ន្ធធារាសាស្ត្រគ្មានប្រសិទ្ធភាព

II.(១០ពិន្ទុ) កត្តាដែលជំរុញឱ្យមានការកសាងប្រព័ន្ធដឹកនាំពិភពលោកតែមួយ (សកលភាវូបនីយកម្ម) គឺ

• កម្លាំងចលករនៃប្រព័ន្ធសេដ្ធកិច្ចសកលលោកដែលជម្រុញឱ្យកាន់តែលេចឡើងនូវអស្ថរភាព និងផលវិបាកចំពោះបញ្ហាផ្ទៃប្រទេស និងទំនាក់ទំនងរវាងប្រទេសលើសកលលោក។ នេះជាសញ្ញាមួយទាមទារឱ្យរិះរកការបង្កើតប្រព័ន្ធថ្មីមួយប្រកបដោយប្រសិទ្ធភាព
• កំណើនយ៉ាងខ្លាំងនូវបំលាស់ប្តូរទីកន្លែងរស់នៅរបស់ប្រជាពលរដ្ធនៅលើសកលលោក
• ការរីកចម្រើនយ៉ាងខ្លាំងនូវប្រព័ន្ធទំនាក់ទំនងទូរគមនាគមន៍អន្តរជាតិ
• ការរីកសាយភាយយ៉ាងខ្លាំងនូវបច្ចេកវិទ្យាយោធាទំនើបដែលជានិច្ចជាកាលបានក្លាយជាឧបករណ៍នយោបាយសលកលោក
• បញ្ហារួមជាច្រើនបានកើតឡើងដែលទាមទារឱ្យមានការសម្រេចចិត្តដោះស្រាយបញ្ហាទាំងនេះតាមរយៈថ្នាក់ដឹកនាំរដ្ធាភិបាល អង្គការអន្តរជាតិ សហគមន៍អន្តរជាតិជាដើម។

III.(១២ពិន្ទុ)

១.ប្រទេសដែលស្ថិតនៅក្នុងតំបន់មជ្ឃិមបូព៌ា់មាន៖

• តួកគី
• ស៊ីរី
• អ៊ឺរ៉ង់
• អ៊ីរ៉ង់
• លីបង់
• ហ្សកដានី
• អ៊ីស្រាអែល
• អារ៉ាប់ប៊ីសាអ៊ូឌីត
• យេមែន
• អេស៊ីប
• ស៊ូដង់
• លីបី

២.សាសនាដែលចាប់កំណើតនៅក្នុងតំបន់មជ្ឃិមបូព៌ាមាន៖

• សាសនាឥស្លាម
• សាសនាគ្រិស្ត

៣.ធនធានធម្មជាតិ ដែលសម្បូរនៅក្នុងមជ្ឃិមបូព៌ាគឺ រ៉ែប្រេងកាត

៤.បានជាប្រទេសទាំងឡាយនៅតំបន់មជ្ឃិមបូព៌ាកើតមានសង្គ្រាមជាញឹកញាប់ ព្រោះ៖

• សាសនាចម្រុះ
• ជនជាតិចម្រុះ
• ទឹកដី និងព្រំដែន
• រ៉ែប្រេងកាត
• ការជ្រៀតជ្រែករបស់មហាអំណាច

IV.(១៤ពិន្ទុ)

១.ចាប់ពីឆ្នាំ​១៩៧៩ មកដល់បច្ចុប្បន្ន ប្រទេសកម្ពុជាមានឈ្មោះ

• សាធារណរដ្ធប្រជាមានិតកម្ពុជា (១៩៧៩ - ១៩៨៩)
• រដ្ធកម្ពុជា (១៩៨៩ - ១៩៩៣)
• ព្រះរាជាណាចក្រកម្ពុជាទី២ (១៩៩៣ - បច្ចុប្បន្ន)

២.នៅខែមេសា ឆ្នាំ​១៩៨៩ សភានៃប្រទេសកម្ពុជាបានធ្វើវិសោធនកម្មទៅលើរដ្ធធម្មនុញ្ញឆ្នាំ​១៩៧៩ ដូចជា៖

• ប្តូរឈ្មោះសាធារណរដ្ធប្រជាមានិតកម្ពុជា ទៅជារដ្ធកម្ពុជា
• លើកកម្ពស់នយោបាយក្រៅប្រទេស
• ប្តូរភ្លេងជាតិ ទង់ជាតិ
• កម្ពុជា ជាប្រទេសអព្យាក្រឹត និងមិនចូលបក្សសម្ព័ន្ធ
• យកសាសនាព្រះពុទ្ធសាសនារបស់រដ្ធ
• ផ្តល់កម្មសិទ្ធិដល់ប្រជាពលរដ្ធ
• បង្កើតច្បាប់ការពារកម្មសិទ្ធិឯកជន និងទីផ្សារសេរី
• លុបចោលលក្ខខ័ណ្ឌកំណត់អាយុសាងផ្នូស ចំពោះបុរសខ្មែរចាប់ពីអាយុ ៥០ឆ្នាំឡើង
• ប្រជាកសិករអាផ្ទេរកម្មសិទ្ធិដីធ្លី ផ្ទះទៅឱ្យកូនចៅ
• ប្រជាជនមានសិទ្ធិទិញ និងលក់អចលនទ្រព្យ
• លុបទោសប្រហារជីវិត
• ផ្តល់សេរីភាពសារព័ត៌មាន និងបង្កើនអង្គការសង្គមស៊ីវិល
• ប្តូរពីសេដ្ធកិច្ចផែនការ មករបបសេដ្ធកិច្ចទីផ្សារសេរី។

៣.ក្រោយសន្ធិសញ្ញាសន្តិភាពទីក្រុងប៉ារីសថ្ងៃទី​២៣ ខែ តុលា ឆ្នាំ ១៩៩១ មានវត្តមានអាជ្ញាធរបណ្តោះអាសន្ននៃអង្គការសហប្រជាជាតិនៅកម្ពុជា ដើម្បី

• ដកអាវុធពីកងទ័ពរដ្ធកម្ពុជា កងទ័ពភាគីខ្មែរក្រហម រណសិរ្សជាតិរំដោះប្រជាពលរដ្ធខ្មែរ និងកងទ័ពរាជានិយមរបស់សម្តេចនរោត្តម សីហនុ។
• បញ្ចូលរដ្ធអំណាចទាំងសងខាងឱ្យរួមគ្នា (រដ្ធកម្ពុជា និងរដ្ធាភិបាលត្រីភាគី)
• រៀបចំការបោះឆ្នោតដោយសេរី
• នាំជនភៀសខ្លួនប្រហែល ៣៥០ ០០០ នាក់ត្រឡប់មកមាតុភូមិវិញ

V.(១៤ពិន្ទុ) ក្នុងពេលមានវិបត្តិសេដ្ធកិច្ចពិភពលោកឆ្នាំ​១៩២៩ - ១៩៣៣

១.នៅសហរដ្ធអាមេរិកមានបញ្ហាអ្វីកើតឡើង គឺ៖

• ប្រជាជនកាត់បន្ថយតម្រូវការសម្ភារៈ
• រោងចក្រកាត់បន្ថយបរិមាណទំនិញ
• ចំនួនអ្នកគ្មានការងារធ្វើកើនឡើង
• គ្មានប្រាក់សម្រាប់តម្រូវការទំនិញ
• សេដ្ធកិច្ចធ្លាក់ចុះបានជះឥទ្ធិពលមិនល្អដល់កសិករ និងកម្មករ
• មានធានាគារចំនួន ៧០០ បានបិទទ្វារនៅឆ្នាំ ១៩២៩
• នៅចន្លោះឆ្នាំ​១៩២៩ - ១៩៣៣ មានពាណិជ្ជកម្មជាង ១០០ ពាន់នាក់ត្រូវក្ស័យធន និងកម្មករចំនួន ៣លាននាក់គ្មានការងារ

២.ក្នុងការអនុវត្តវិធានការថ្មី ដើម្បីព្យាបាលវិបត្តិសេដ្ធកិច្ចពិភពលោកនេះ លោកប្រធានាធិបតីសហរដ្ធអាមេរិក​ បានបង្កើតភ្នាក់ងារដូចជា៖

• ភ្នាក់ងាររដ្ធបាលសហព័ន្ធ (១៩៣៣) ដើម្បីជួយអ្នកអត់ឃ្លាន គ្មានទីជម្រកនិងគ្មានការងារធ្វើ
• ភ្នាក់ងារកិច្ចការដ្ធបាលស៊ីវិល បង្កើតការងារជាច្រើនដូចជា កសាងផ្លូវ សាលារៀន ស្ពាន
• ភ្នាក់ងាររដ្ធបាលសាធារណៈ ជួយកសិករបង្កើនប្រាក់ចំនូល
• ភ្នាក់ងារមូលនីធិសាជីវកម្មកម្ចី ជួយប្រាក់ដល់ប្រជាជន ដើម្បីមានប្រាក់បង់ការទៅម្ចាស់បំណុល
• ភ្នាក់ងារជួយយុវជន ជួយយុវជនដែលមានអាយុចន្លោះ ១៨ - ២៥ ឆ្នាំ ឱ្យបោះជំរុំនៅជនបទ ដាំដើមឈើ.

VI.(១៥ពិន្ទុ)

១.ក្នុងរបបកម្ពុជាប្រជាធិបតេយ្យ ពន្ធនាគារត្រូវបានគេហៅ មន្ទីរសន្តិសុខ។ មានតួនាទី

• កន្លែងឃុំឃាំង
• កន្លែងសួរចម្លើយ
• កន្លែងសម្លាប់

២.ពន្ធនាគារថ្នាក់មជ្ឃិម និងធំជាងគេ ដែលបានសម្លាប់មនុស្សអស់ជាង ១២ ០០០នាក់ ៖

• មានឈ្មោះ មន្ទីរស ២១
• ប្រធានពន្ធធានាគារគឺ ឌុច
• បច្ចុប្បន្នតាមផ្លូវច្បាប់គាត់ស្ថិតក្នុងស្ថានភាពជាប់គុកអស់មួយជីវិត

៣.ខ្មាំងសត្រូវរបស់អង្គការនៃរបបកម្ពុជាប្រជាធិបតេយ្យ គឺ៖

សត្រូវខាងក្នុង

• អ្នករដ្ធការរបស់របប លន់ នល់
• ក្រុមជនជាតិភាគតិច
• ជនជាតិភាគតិចតំបន់ភ្នំ
• ជនជាតិខ្មែរឥស្លាមថៃ ជាពិសេស
• ជនជាតិភាគតិចវៀតណាម
• បញ្ញាវន្ត និង ជនក្បត់ដទៃផ្សេង
• ជនជាតិភាគតិចចិន

សត្រូវខាងក្រៅ

• អាមេរិក
• វៀតណាម
• សូវៀត

៤.បានជារបបកម្ពុជាប្រជាធិបតេយ្យដួលរលំនៅថ្ងៃទី ០៧ ខែ មករា ឆ្នាំ ១៩៧៩ គឺ៖

• ប្រជាជនកម្ពុជាស្អប់របបប៉ុល ពត ប្រជាជនរងទុក្ខវេទនា សុខភាពទ្រុតទ្រោម អត់ឃ្លាន និងការកាប់សម្លាប់
• វិសុទ្ធកម្ម (ការចម្រាញ់យកមនុស្សបដិវត្តន៍បរិសុទ្ធ) ការបះបោរប្រឆាំងនឹងថ្នាក់ដឹកនាំបក្សកាន់តែខ្លាំងឡើង
• ការធ្វើសង្គ្រាមជាមួយវៀតណាម ចាប់ពីឆ្នាំ ១៩៧៧ វៀតណាម ចាប់បើកការវាយប្រហារតបប្រឆាំងនឹងខ្មែរក្រហម រហូតដល់ថ្ងៃទី ៧ មករា ឆ្នាំ ១៩៧៩ ទើបផ្តួលរលំ និងចូលកាន់កាប់ក្រុងភ្នំពេញ។