សំណូរ
១. ហេតុដូចម្តេចបានជាកូនស្រីមិនបានចូលរៀន និងមិនបានបន្តការសិក្សានៅថ្នាក់ខ្ពស់ ?
២. តើការអប់រំ បានជះឥទ្ធិពលឱ្យស្រ្តីអាចធ្វើការអភិវឌ្ឍន៍ខ្លួនឯង គ្រួសារ និងសង្គមជាតិដូចម្តេចខ្លះ ? ចូររៀបរាប់ពន្យល់ពីសារៈប្រយោជន៍នៃការអប់រំស្រ្តី ។
៣. ចូររកសុភាសិតមួយដែលមានអត្តន័យលើកតំកើនតួនាទីស្រ្តីភេទ ឱ្យបានយ៉ាតតិច ៥ឃ្លា ។
៤. តើប្រទេសកម្ពុជាបានចុះហត្ថលេខាចូលជាភាគីនៃអនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ នៅថ្ងៃខែឆ្នាំណា ? តើសិទ្ធិពិសេស៦បែបរបស់នារីដែលមាននៅក្នុងឯកសារនោះមានអ្វីខ្លះ ?
៥. តើសិទ្ធិពិសេសជាអប្បបរមាសម្រាប់អ្នកទោសស្រ្តីមានអ្វីខ្លះ ?
ចម្លើយ
១. មូលហេតុ ដែលកូនស្រីមិនបានចូលរៀន និងមិនបានបន្តការសិក្សានៅថ្នាក់ខ្ពស់បាននោះ គឺដោយសារ ៖
ក. កត្តាទំនៀមទម្លាប់
- កូនស្រីត្រូវនៅជួយកិច្ចការមេផ្ទះ (ការងារផ្ទះបាយ)
- កូនស្រីត្រូវធានារ៉ាប់រងជីវភាពគ្រួសារ (លក់ដូរ) ដើម្បីរកប្រាក់ចំណូលផ្គត់ផ្គង់គ្រួសារ
- រ៉ាប់រងកិច្ចការសព្វសារពើជំនួសមាតាបិតា ដូចជា ថែទាំប្អូនៗឬចាត់ចែងការងារផ្សេងៗ ។
ខ. សេដ្ឋកិច្ចគ្រួសារ ឬស្ថានភាពគ្រួសារ
- ជីវភាពខ្វះខាត មាតាបិតាត្រូវធ្វើជម្រើសដោយផ្តល់អាទិភាពឱ្យកូនប្រុស
- កូនស្រីនៅផ្ទះមានប្រយោជន៍ច្រើនជាងកូនប្រុស ។
គ. បញ្ហាទីតាំងសាលារៀន
- សាលារៀននៅឆ្ងាយ ផ្លូវលំបាក
- កង្វះមធ្យោបាយធ្វើដំណើរ
- អសន្តិសុខ អសុវត្ថិភាព (ការជួញដូរផ្លូវភេទ ការរំលោភ ឆក់ប្លន់) ។
ឃ. បញ្ហាវប្បធម៌
- ក្នុងសង្គមឥស្លាមមិនឱ្យកូនស្រីរៀនជាមួយគ្រូប្រុស
- សង្គមខ្មែរជំនាន់មុន គ្រូជាព្រះសង្ឃដូចនេះ កូនស្រីមិនអាចស្និទ្ធស្នាលជាមួយគ្រូបានទេ
- កង្វះគ្រូស្រី
- ការរៀបអាពាហ៍ពិពាហ៍នៅវ័យក្មេង ។
ង. បុរេនិច្ឆ័យខុសឆ្គង
- ស្រីបង្វិយចង្រ្កានមិនជុំ
- ស្រីរៀនចេះយ៉ាងណា ក៏នៅតែជាប្រពន្ធគេ
- ស្រីរៀនខ្ពស់ពេក អ្នកក្រមិនហ៊ាន អ្នកមានមិនមក
- រៀនចេះខ្លាចចេះសរសេរសំបុត្រស្នេហា ។
២. ការអប់រំ ការសិក្សាបានជះឥទ្ធិពលធ្វើឱ្យស្រ្តីអាចកសាងខ្លួន ឬអភិវឌ្ឍឯង គ្រួសារ និងសង្គមជាតិដូចតទៅ ៖
ក. អភិវឌ្ឍន៍ខ្លួនឯង
- ធ្វើជាម្ចាស់លើខ្លួនឯង
- ម្ចាស់ការលើការងារ មានការទទួលខុសត្រូវ
- ចេះថែទាំសុខភាពរបស់់ខ្លួន
- ចេះត្រិះរិះពិចារណាមានហេតុផល
- មានអធ្យាស្រ័យល្អ គំនិតទូលំទូលាយ (សុទិដ្ឋិនិយម)
- យល់ដឹងពីតួនាទី និងសិទ្ធិអំណាច
- ចេះរៀបចំជីវិតឱ្យមានភាពល្អប្រសើរ ។
ខ. អភិវឌ្ឍគ្រួសារ
- ចេះអប់រំប្តី កូនឱ្យចេះរក្សាសុខភាព អនាម័យ (បង្កាជំងឺផ្សេងៗពិសេសជំងឺអេដស៍)
- អប់រំវប្បធម៌ទូទៅកូនដល់កូន (ប្រពៃណីវប្បធម៌អរិយធម៌ទស្សនវិជ្ជា)
- មានផែនការពន្យាកំណើតកំណត់ចំនួនសមាជិកគ្រួសារបានច្បាស់លាស់
- ចេះរៀបចំផែនការសេដ្ឋកិច្ចគ្រួសារបានល្អប្រសើរ
- អាចយកចំណេះដឹងផ្តល់ដល់វិស័យកសិកម្មបានទិន្ទផលខ្ពស់
- បណ្តុះនូវសីលអំពើ សីលតម្លៃគ្រួសារ (សីលធម៌សុជីវធម៌)
- ជាអ្នកផលិតនូវធនធានមនុស្ស ពលរដ្ឋដ៏ល្អជូនសង្គមជាតិ
- បង្កើតស្នាដៃ ឬសមិទ្ធផលផ្សេងៗ ដើម្បីបម្រើសង្គមជាតិធ្វើឱ្យស្វាមីនិងសង្គមទទួលស្គាល់
- ចូលរួមក្នុងកិច្ចការសាធារណៈកិច្ចការបម្រើរដ្ឋ ឬកិច្ចការក្នុងអង្គការមហាជន (សេដ្ឋកិច្ច សង្គមកិច្ចវប្បធម៌ និងនយោបាយ )
- ធ្វើឱ្យបុរសក្នុងសង្គមទទួលស្គាល់សិទ្ធិ និងស្នាដៃរបស់ស្រ្តី
- ចូលរួមផ្សព្វផ្សាយស្តីពីការអប់រំសុខភាពមាតា និងទារក
- ចូលរួមលប់បំបាត់អំពើហិង្សាក្នុងគ្រួសារ និងសហគមន៍ ។
៣. សំណេរសុភាសិត
- សំណេរយោងដី ស្រីយោប្រុស
- ស៊ូស្លាប់បា កុំឱ្យស្លាប់មេ ស៊ូលេចទូកណ្តាលទន្លេ កុំឱ្យតែភ្លើងឆេះផ្ទះ
- សម្លឆ្ងាញ់ដោយសារគ្រឿង គ្រួសាររុងរឿងត្បិតភរិយាជា
- ស្រ្តីជាឆ្អឹងខ្នងរបស់ប្រទេសជាតិ
- ស្រ្តីជាមាតានៃពិភពលោក ។
៤. ប្រទេសកម្ពុជាបានចុះហត្ថលេខាចូលជាភាគីនៃអនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ នៅថ្ងៃទី ២២ ខែ កញ្ញា ឆ្នាំ ១៩៩២ ។ សិទ្ធិពិសេស៦បែបរបស់នារីដែលមាននៅក្នុងឯកសារនោះមាន ៖
- សិទ្ធិទទួលបានប្រាក់បំណាច់ស្មើគ្នានឹងបុរស
- សិទ្ធិមានសមភាពខាងផ្លូវភេទ
- សិទ្ធិមានសមភាពរវាងប្តីប្រពន្ធ
- សិទ្ធិទទួលកិច្ចកាពារពីការកេងប្រវ័ញ្ច
- សិទ្ធិទទួលការឈប់សម្រាប់នៅពេលសម្រាលកូន
- សិទ្ធិរួចផុតពីទោសប្រហារជីវិតក្នុងពេលមានគភ៍
៥. សិទ្ធិពិសេសជាអប្បបរមាសម្រាប់អ្នកទោសស្រ្តីមានដូចជា ៖
- សិទ្ធិនៅដាច់ដោយឡែកពីអ្នកទោសបុរស
- សិទ្ធិមានតែភ្នាក់ងារនារីតែប៉ុណ្ណោះចូលត្រួតពិនិត្យ
- សិទ្ធិមានសេវាកម្មពេទ្យសម្រាប់អនាម័យស្រ្តីភេទ ។
