សំណួរ
១. ហេតុអ្វីបានជាគេនិយាយថា ការកែប្រែមិត្តភក្តិឱ្យប្រាសចាកអំពើអាវាសែ ជាសកម្មភាពចូលរួមអភិវឌ្ឍសង្គមជាតិ ?
២. ដើម្បីឱ្យមនុស្សរស់នៅដោយសេចក្តីថ្លៃថ្នូរក្នុងសង្គមតើមនុស្សគ្រប់រូបត្រូវប្រតិបត្តិដូចម្តេចខ្លះ ?
៣. តើការប្រតិបត្តិធម៌អហិង្សាផ្តល់ប្រយោជន៍អ្វីខ្លះ ដល់បុគ្គល គ្រួសារ និងសង្គម ? ចូររកឧទាហរណ៍ ។
៤. បើសង្គមជាតិមួយសម្បូរអំពើហិង្សាកើតឡើង តើសង្គមជាតិនោះអាចអភិវឌ្ឍប្រទេសបានដែរឬទេ ? ព្រោះអ្វី ?
៥. ដើម្បីឱ្យមនុស្សរស់នៅដោយសេចក្តីថ្លៃថ្នូរក្នុងសង្គម តើមនុស្សគ្រប់រូបត្រូវប្រតិបត្តិដូចម្តេចខ្លះ ?
ចម្លើយ
១. បានជាគេនិយាយថា ការកែប្រែមិត្តភក្តិឱ្យប្រាសចាកអំពើអាវាសែ ជាសកម្មភាពចូលរួមអភិវឌ្ឍសង្គមជាតិព្រោះ ៖
- វាបានចូលរួមចំណែកកាត់បន្ថយ និងបំបាត់អំពើអសកម្ម អសុវត្ថិភាព អសន្តិសុខក្នុងសង្គម
- ដើម្បីឱ្យជននោះក្លាយខ្លួនជាធនធានមនុស្សល្អក្នុងសង្គម សង្គមជាតិយើងបច្ចុប្បន្ននេះត្រូវការណាស់នូវធនធានមនុស្សដើម្បីបម្រើសង្គមជាតិ
- អ្នកទាំងនោះជាសសរទ្រូង ឬជាទំពាំងស្នងឫស្សី
- ជួយពួកគេឱ្យចំណេញប្រាក់កាស ពេលវេលា កម្លាំងកាយ ចិត្ត អនាគតភ្លឺស្វាងត្រចះត្រចង់
- ជួយកាត់បន្ថយភាពក្រីក្រក្នុងសង្គម ។
២. ដើម្បីឱ្យមនុស្សរស់នៅដោយសេចក្តីថ្លៃថ្នូរហើយរស់នៅក្នុងសង្គមទទួលស្គាល់ មនុស្សគ្រប់រូបត្រង់ប្រតិបត្តិដូចខាងក្រោម ៖
- ត្រូវគោរពស្រឡាញ់ យោគយល់គ្នាទៅវិញទៅមក
- ត្រូវគោរពសិទ្ធិគ្នាទៅវិញទៅមក
- ត្រូវទទួលខុសត្រូវនូវទង្វើដែលខ្លួនបានធ្វើ
- ត្រូវប្រកាន់ខ្ជាប់នូវវិន័យ ក្រមសីលធម៌ និងច្បាប់សង្គម
- មិនត្រូវប្រើអំណាចរបស់ខ្លួនគាបសង្កត់លើអ្នកដទៃ
- ត្រូវវៀរចាកអំពើអបាយមុខ និងសេពគ្រឿងញៀនគ្រប់ប្រភេទ
- ត្រូវចេះប្រើប្រាស់ថវិកាសមស្របតាមចំណូលរបស់គ្រួសារ
- មិនជឿពាក្យអុចអាល ញុះញង់ពីអ្នកដទៃ
- ត្រូវប្រកបរបរដោយសុចរិត ។
៣. ការរស់នៅក្នុងសង្គម ប្រសិនបើមនុស្សម្នាក់ៗ ជ្រើសរើសយកធម៌អហិង្សាដាក់ក្នុងខ្លួន គឺនាំមកនូវផលប្រយោជន៍ដូចជា ៖
ក. ចំពោះបុគ្គល ៖
- មានភាពស្ងប់ក្នុងចិត្ត មិនមានចិត្តមួរម៉ៅក្តៅក្រហាយ ស្មុគស្មាញ
- ធ្វើឱ្យមនុស្សគ្មានវិប្បដិសារី
- មនុស្សអាចឈ្នះចិត្តខ្លួនឯងបាន
- មានធម៌ខន្តីនៅក្នុងខ្លួន
- ដោះស្រាយបញ្ហាផ្សេងៗដោយសន្តិវិធី
- ធ្វើឱ្យយើងត្រេកអរពេញចិត្ត និងសម្បត្តិដែលខ្លួនមាន
- ធ្វើឱ្យយើងអាចកាត់បន្ថយសត្រូវ និងបង្កើតមិត្ត
- មានឈ្មោះថា ជាអ្នកបានធ្វើប្រយោជន៍ឱ្យដល់ខ្លួនផងនិងដល់សង្គមផង
- ការជ្រើសរើសយក ឬការប្រកាន់ខ្ជាប់ធម៌អហិង្សា គឺធ្វើឱ្យគ្រួសារ សហគមន៍ ប្រទេសជាតិនិងពិភពលោកទាំងមូលមានស្ថិរភាពមិនមានជម្លោះវាយប្រហារគ្នាមានសន្តិភាព ការគោរពគ្នាទៅវិញទៅមក ទទួលបានផលប្រយោជន៍គ្រប់យ៉ាងដូចជា ការគោរពជីវិតមនុស្ស
- មានចរិតស្លូតបូត មិនមានចិត្តលោភៈ ទោសៈ មោហៈ
- ធ្វើឱ្យខ្លួនមានតម្លៃមនុស្ស ។
ខ. ចំពោះគ្រួសារ
- គ្មានអំពើហិង្សាក្នុងគ្រួសារ
- មានការអត់ឳន យោគយល់ និងសណ្តោស
- មានភាពកក់ក្តៅ និងសុភមង្គល
- គ្រួសារមានការរីកចម្រើន រុងរឿង សម្បូរសប្បាយសេដ្ឋកិច្ចធូរធារ ។
គ. ចំពោះសង្គម
- ធ្វើឱ្យសង្គមមានសុខសន្តិភាព សណ្តាប់ធ្នាប់ របៀបរៀបរយ មានសច្ចធម៌ យុត្តិធម៌ និងភាពត្រឹមត្រូវ
- មានការគោរពសិទ្ធិមនុស្ស និងច្បាប់សង្គម
- សង្គមមានស្ថិរភាព មានការអភិវឌ្ឍ រីកចម្រើន ជឿនលឿន
- សង្គមមានសាមគ្គីភាព ឯករាជភាព និងការរួបរួម
- មានការសហប្រតិបត្តិការ មានការយោគយល់គ្នារវាងជនជាតិ និងជនជាតិ រវាងជាតិ និងជាតិ ការយល់គ្នាជាអន្តរជាតិ ។ ជារួមបុគ្គលគ្រប់រូបដែលប្រកាន់ខ្ជាប់ធម៌អហិង្សានឹងចូលរួមចំណែកធ្វើឱ្យសង្គម គ្រួសារ ប្រទេសជាតិមានការអភិវឌ្ឍគ្រប់ផ្នែក មានសន្តិភាពផ្លូវចិត្ត ផ្លូវកាយសុភមង្គលដល់ជីវិតមនុស្សគ្រប់រូប ហើយសង្គមជាតិមានការរីកចម្រើន ។
៤. បើសង្គមជាតិមួយសម្បូរអំពើហិង្សាកើតឡើងសង្គមជាតិនោះមិនអាចអភិវឌ្ឍប្រទេសបានទេ ។ ព្រោះ ៖
- រដ្ឋាភិបាលត្រូវចំណាយថវិកាជួយរងគ្រោះ និងជួយរកដំណោះស្រាយផ្សេងៗដូចជា ផ្នែកសម្ភារៈ បង់រុំថ្នាំពេទ្យ..។
- រដ្ឋាភិបាលត្រូវចំណាយថវិកាលើក្រសួងពាក់ព័ន្ធ ដូចជាក្រសួងសុខាភិបាល ក្រសួងយុត្តិធម៌ ដើម្បីទិញថ្នាំសង្កូវព្យាបាលជនរងគ្រោះ និងចែកថ្នាំដល់ជនរងគ្រោះដោយឥតគិតថ្លៃឬចំណាយលើការជ្រើសរើសបុគ្គលិកពេទ្យបន្ថែម ឬត្រូវសាងសង់អគារមន្ទីរពេទ្យបន្ថែម ។
- សង្គមជាតិមានបញ្ហាអសន្តិសុខ អសុវត្ថិភាព បាត់បង់សណ្តាប់ធ្នាប់សង្គម ។
- បាត់បង់ធនធានមនុស្សសម្រាប់ជួយអភិវឌ្ឍសង្គមជាតិ
- ប្រជាជនអាចបាត់បង់ការងារធ្វើ នឹងឈានដល់ភាពក្រីក្រ ជំពាក់គេ
- ប្រជាជនខ្លះអាចពិការ ឬអាចស្លាប់ខ្លួន
- ប៉ះពាល់ដល់កិត្តិយសប្រទេសជាតិ គ្មានការវិនិយោគពីសំណាក់បរទេស ព្រោះខ្លាចរអារ ។
៥. ដើម្បីឱ្យមនុស្សរស់នៅដោយសេចក្តីថ្លៃថ្នូរហើយរស់នៅក្នុងសង្គមទទួលស្គាល់ មនុស្សគ្រប់រូបត្រូវប្រតិបត្តិដូចខាងក្រោម ៖
- ត្រូវគោរពស្រឡាញ់ យោគយល់គ្នាទៅវិញទៅមក
- ត្រូវគោរពសិទ្ធិគ្នាទៅវិញទៅមក
- ត្រូវទទួលខុសត្រូវនូវទង្វើដែលខ្លួនបានធ្វើ
- ត្រូវប្រកាន់ខ្ជាប់នូវវិន័យ ក្រមសីលធម៌ និងច្បាប់សង្គម
- មិនត្រូវប្រើអំណាចរបស់ខ្លួនគាបសង្កត់លើអ្នកដទៃ
- ត្រូវវៀរចាកអំពើអបាយមុខ និងសេពគ្រឿងញៀនគ្រប់ប្រភេទ
- ត្រូវចេះប្រើប្រាស់ថវិកាសមស្របតាមចំណូលរបស់គ្រួសារ
- មិនជឿពាក្យអុចអាល ញុះញង់ពីអ្នកដទៃ
- ត្រូវប្រកបរបរដោយសុចរិត ។
