ប្រពៃណី និងពិធីបុណ្យផ្សេងៗក្នុងសង្គមនាថ្ងៃបុណ្យបញ្ចុះសីមា

សំនួរ

១. តើត្រូវប្រើដុំនិមិត្តសីមាប៉ុន្មានដុំ ក្នុងការធ្វើបុណ្យបញ្ចុះសីមា ?

២. តើពិធីបុណ្យបញ្ចុះសីមាគេប្រារព្ធឡើងរយៈពេលប៉ុន្មានថ្ងៃ ?

៣.ដើម្បីប្រារព្ធពិធីបុណ្យបញ្ចុះសីមាតើគេត្រូវយកចិត្តទៅលើអ្វីខ្លះជាសំខាន់ ?

៤. ហេតុអ្វីបានជាចាំបាច់ចុះឈ្មោះសង្ឃដែលចូលរួម ឲ្យបានច្បាស់លាស់និងបែងចែកររោងទិសឲ្យបានច្បាស់លាស់ ?

៥. តើពិធីសែនក្រុងពាលីនៃបុណ្យបញ្ចុះសីមាត្រូវរៀបចំយ៉ាងដូចម្តេច ? ចូររៀបរាប់ឲ្យបានក្បោះក្បាយ ?

ចម្លើយ

១. មានចំនួន៩ដុំ សម្រាប់ ធ្វើជាពិធីបញ្ចុះសីមា ។

២. តាមទម្លាប់ គេនិយមធ្វើពីរយប់បីថ្ងៃ ឬបីយប់បួនថ្ងៃតាមការឯកភាពគ្នារបស់ពុទ្ធបរិស័ទក្នុងវត្តនីមួយៗ ។

៣. ដើម្បីធ្វើបុណ្យបញ្ចុះសីមា ដំបូងត្រូវពិនិត្យដុំថ្មជានិមិត្តសីមាមានចំនួនគ្រប់គ្រាន់ឬនៅ ? ស្នែង អំបោះចង់ស្រះជាសង្រែក អន្លួង កាំបិត ផ្ទឹល ទឹក កំបោស ( ចំពោះកំបោសសម្រាប់លោកសង្ឃ អ្នកដឹកនាំពិធីគូសក្រឡាជាន់តារាង ) កន្លែងកាន់មេក្រូ ( ព្រោះពេលជាន់តារាងមិនមាននរណាទៅចូលបានទេ ) ។ ជាពិសេសមើលការជីករណ្តៅសីមា កុំឲ្យឆ្ងាយពីខឿនព្រះវិហារ គួរជីកជាប់ចែងខឿនព្រះវិហារតែម្តង ងាយក្នុងពិធីព្រះសង្ឃធ្វើសង្ឃកម្ម  ។

          ជាធម្មតាក្នុងពិធីបញ្ចុះសីមា ត្រូវមានអភិសេកព្រះពុទ្ធរូប ។ ដូច្នេះត្រូវត្រៀមឲ្យហើយ ផ្កាភ្ញី ធូប ទៀន សម្រាប់ជាសក្ការៈ ។

៤. ដល់ថ្ងៃបុណ្យពេលព្រះសង្ឃនិមន្តមកត្រូវមានគណកម្មាធិការមួយចាំទទួលចុះឈ្មោះព្រះសង្ឃ និងចែកតាមរោងទិសកំណត់នាមនិងវត្តឲ្យបានច្បាស់ ។ ព្រោះពេលធ្វើសង្ឃកម្ម ព្រះសង្ឃដែលជាអ្នកដឹកនាំពេលធ្វើពិធីបញ្ចុះសីមា ត្រូវប្រកាសឲ្យភិក្ខុចូលរួមបាត់មុខមិនបានដោយគ្មានមូលហេតុ បើមិនមានចូលរួមទេត្រូវចេញឲ្យឆ្ងាយពីព្រំដែនវត្ត ។ កន្លែងខ្លះលោកធ្វើយ៉ាងនេះក៏មានការអាក់អន់ស្រពន់ចិត្តតែតាមពិតឺមានលក្ខណៈវិន័យសុទ្ធសាធ ។ ព្រោះមានភិក្ខុអង្គខ្លះខ្ជិលតាមតែចិត្ត មិនព្រមចូលរួមកម្មវិធីសម្ងំ នៅក្នុងកុដិ ល្ងង់ឬ ធ្វើជាល្ង់មិនចេះធ្វើពីធីសង្ឃកម្មដែលព្រះអង្គបញ្ញាត្តិថាពេលធ្វើសង្ឃកម្មណាមួយដូចជាសីមាសម្មតិកម្មជាដើម នេះបើភិក្ខុនៅក្នុងអាវាសមានធុរៈ ឈឺក្តីមកចូលរួមមិនកើតត្រូវឲ្យឆន្ទះ បើភិក្ខុសូម្បីតែមួយរូបមិនឲ្យឆន្ទះដល់ជំនុំសង្ឃទេហើយគេច នៅមិនចូលរួចនៅក្នុងសង្ឃកម្មភិក្ខុនោះត្រូវទោស ហើយសង្ឃកម្មមិនអាចដំណើរការទៅបានផង ។

៥. ពេលព្រឹលព្រលឹម ឬពេលរសៀលទេទាប នៅតាមកម្មវិធីបុណ្យដែលបានកំណតគឺ ៖

1. អាចារ្យត្រូវរៀបតុមួយ មា​កំរាលមានបង្គោលចងឆ័ត្រ បាំងពីលើ
2. លើតុត្រូវមានម្ហូបមួយយថាស បង្អែមមួយថាស បាយ ទឹក មួយផ្តិល ផ្កាមួយថូ សំពត់ពណ៌មួយគូ ទៀន ធូប សម្រាប់អុជ ។
3. អាចារ្យប្រកាសទេព្តា ក្នុងពិធីក្រុងពាលីនេះ អាចារ្យ ស្លៀកពាកស និងពានាសំពត់សដែរ ។​
4. អាចារ្យប្រកាសបួងសួងទេព្តា ដូចតទៅ ភោន្តោ ទេវ សង្ឃា​​ យោ ! បពិត្រពពួកទេព្តានិករ ទេព្តាទាំងឡាយដែលស្ថិតនាគិរីបុព្វតា ក្នុងព្រៃព្រឹក្សា លើដែនពសុធា ជ្រោះជ្រង ជ្រងជ្រលងដងអូរ ដងស្ទឹង បឹងបួរ ទន្លេ សមុទ្រក្តី ទាំងទេព កោសីយ៍ សហស្សន័យ ឥន្រ្ទាធិរាជ ដែលកាន់អំណាចត្រួត ត្រាលើគ្រប់ទីដ្ឋាន និងថែរក្សាគ្រប់គ្រងមនុស្សលោកមានព្រះឥន្តក្តី អាកាសទេវា រុក្ខទេវា ទាំងទេព្តារក្សាភូមិស្ថានទីលានព្រះចេតិយ សូមលោកទ្រង់ជ្រាបថាថ្ងៃនេះជាថ្ងៃ... កើតឬរោជ ខែ ...ឆ្នាំ ....ត្រូវនឹងថ្ងៃទី ...ខែ ....ឆ្នាំ ....ពុទ្ធបរិស័ទចំណុះជើងវត្តមានជួយឧបត្ថម្ភផងបានធ្វើបញ្ចុះសីមាព្រះវិហារដដែលកសាងឡើងតាំងពីឆ្នាំហើយស្រេចនៅថ្ងៃ ....ខែ ....ឆ្នាំ ..... ។

ឥឡូវនេះបានរៀបចំកម្មវិធីបុណ្យបញ្ចុះសីមា វេប្រគេនដល់ព្រះសង្ឃសម្រាប់តម្កល់ទុកជាសម្បត្តិព្រះពុទ្ធសាសនា ដើម្បីព្រះសង្ឃធ្វើសង្ឃកម្មតរៀងទៅ ។

          ហេតុដូច្នេះសូមពួកទេព្តា ដែលយើងខ្ញុំបានរៀបរាប់នាមរួចមកហើយមេត្តាជ្រាបដំណឹងនេះ ហើយអញ្ជើញមកទទួលអំណរសាទរ ជួយប្រសិទ្ធិពរមង្គលសួស្តី ចំពោះ... ។ ដុំថ្មធំៗជានិមិត្តសញ្ញាសីមាដែលរៀបចំបញ្ចុះក្នុងព្រះវិហារនិងជួយសូមសទ្ធាជ្រះថ្លារបស់ពុទ្ធបរិស័ទមានជានិច្ចនិរន្តរ៍ ក្នុងព្រះពុទ្ឌសាសនាទាំងនោះ ។ ម្យ៉ាងទៀតសូម ពពួកទេវតាជួយថែរក្សាទាំងបុព្វជិត និងគ្រហស្ថដែលបានមកចូលរួម ក៏សាងវត្តនវក្តីដោយសារសោមនស្សរីករាយសូមឲ្យអស់លោកបានសេចក្តីសុខចម្រើន និងកើនផលប្រយោជន៍ ដូចសេចក្តីប្រាថ្នា កុំបីឃ្លៀងឃ្លាតដល់អវសានជាតិ ។

          តពីក្រុងពាលីបួងសួងទេព្តា មកដល់ពេលប្រាប់លោកអាចារ្យបន្តកម្មវិធី នាំឧបាសក ឧបាសិកា នមស្សកា ថ្វាយបង្គំ សុំសីល និងចម្រើនព្រះបរិត្តតទៅ​ ។​បន្តបន្ទាប់មកអនុវត្តតាមលំដាប់លំដោយនៃកម្មវិធីបុណ្យដូចបានរៀបរាប់ខាងដើមពីទី១ ដល់ទី៧ តាមសំគួរដល់កាលវេលា ។