សំណួរ-ចម្លើយ ចំណេះដឹងរដ្ឋបាល វិស័យការងារ និងបណ្តុះបណ្តាលវិជ្ជាជីវៈ (ភាគ៩)

សំណួរ

៤១- តើលក្ខខណ្ឌអនាម័យ និងសុខភាពការងារមានអ្វីខ្លះ ចូររៀបរាប់ និងពន្យល់ខ្លីៗ ?

៤២- កាលពីរសៀលថ្ងៃទី០១ ខែកក្កដា ឆ្នាំ២០១៤ នៅទីស្តីការក្រសួងការងារ និងបណ្តុះបណ្តាលវិជ្ជាជីវៈឯកឧត្តមបណ្ឌិត អិុត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសំណេះសំណាល និងបំពាក់ស័ក្តិមន្ត្រីអធិការកិច្ចការងារតែមួយរបស់ក្រសួង តើក្រុមអធិការកិច្ចតែមួយនេះមានសមាសភាពមកពីអង្គភាពណាខ្លះ ?

៤៣- ដោយពិនិត្យឃើញពីសារៈសំខាន់ និង ស្ថានភាពអំណោយផលនៃវិស័យឧស្សហកម្មនៅកម្ពុជា តើរាជរដ្ឋាភិបាលកម្ពុជាបានមានវិធានការអ្វីខ្លះ ?

៤៤- ដើម្បីឆ្លើយតបតម្រូវការជំនាញនៅក្នុងវិស័យនានា ដែលមានការវិនិយោគខ្នាតធំនាពេលបច្ចុប្បន្ន និងទៅ

អនាគត ទាមទារឱ្យមានការបង្កើតយន្តការសម្រាប់ឱ្យកម្លាំងពលកម្ម មានឱកាសទទួលបានជំនាញពាក់ព័ន្ធនឹងការងារដោយមានការចូលរួមនិងគាំទ្រពីនិយោជក តើត្រូវមានវិធានការបែបណាខ្លះឆ្លើយតបតម្រូវការខាងលើ ?

៤៥- នៅក្នុងកម្មវិធីទី២ នៃផែនការយុទ្ធសាស្រ្តអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ២០១៤-២០១៨ ចែងថា “ពង្រឹងភាពសុខដុមរមនានៃទំនាក់ទំនងវិជ្ជាជីវៈ “ហើយដើម្បីសម្រេចបាននូវសកម្មភាពអាទិភាពនេះ នាយកដ្ឋានវិវាទការងារ និងអគ្គលេខាធិការដ្ឋានគណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា ព្រមទាំងការិយាល័យការងារនៃមន្ទីរការងារ និងបណ្តុះបណ្តាលវិជ្ជាជីវៈ រាជធានី ខេត្ត ត្រូវសហការគ្នាយ៉ាងជិតស្និទ្ធ ដើម្បីបង្កើតឱ្យមានយន្តការសម្របសម្រួលផ្ទៃក្នុងមួយសំដៅប្រមូលនូវចំណុចប្រឈមថ្មីៗ ដែលអាចកើតឡើងនាពេលអនុវត្ត ដើម្បីធ្វើជាមូលដ្ឋាន កែសម្រួល និងឆ្លើយតបភ្លាមៗ ឬត្រៀមធ្វើជាធាតុចូលក្នុងផែនការយុទ្ធសាស្រ្តនាពេលខាងមុខ ។ តើត្រូវមានសកម្មភាពអ្វីខ្លះ ដើម្បីសម្រេចបាននូវសកម្មភាពអាទិភាពនេះ ?

ចម្លើយ

៤១- លក្ខខណ្ឌអនាម័យ និងសុខភាពការងារ រួមមាន ៖

• ផ្នែកគីមី (ថ្នាំសម្លាប់សត្វល្អិត វត្តមានជាតិពុល សំណល់មានជាតិពុល ធូលី ផ្សែង កាវ ចំហាយ និងអគ្គីភ័យ...)

• ផ្នែករូបសាស្រ្ត (ពន្លឺ សម្លេង រំញ័រ អគ្គីសនី សីតុណ្ហភាព ការបំភាយកំដៅ...)

• ផ្នែកចិត្តសាស្រ្តសង្គម (គុណភាពការងារ ជម្ងឺតានតឹងអារម្មណ៍ “MBPI ....)

• ផ្នែកវិទ្យាសាស្ត្ររៀបចំការងារ (ការអង្គយ ការឈរ ការលើកដាក់....)

• ផ្នែកមេកានិច (គ្រឿងយន្ត ប្លង់ការងារ ក្រណាត់របស់រោងចក្រ ការរៀបចំធ្វើស្តុកការដឹកជញ្ជូនគេហកិច្ច “ការងារគ្រប់គ្រងរោងចក្រ“...)។

• ផ្នែកជីវសាស្ត្រ (អនាម័យចំណីអាហារ អាហារូបត្ថម្ភ បាក់តេរី វីរុស ពពួកផ្សិត...)

៤២- សមាសភាពក្រុមអធិការកិច្ចការងារតែមួយរួមមាន មន្ត្រីអធិការកិច្ចការងារ ៖

• នាយកដ្ឋានអធិការកិច្ចការងារ
• នាយកដ្ឋានវិវាទការងារ
• នាយកដ្ឋានមុខរបរនិងហត្ថពលកម្ម
• នាយកដ្ឋានការងារកុមារ
• នាយកដ្ឋានពេទ្យការងារ
• បេឡាជាតិរបបសន្តិសុខសង្គម
• នាយកដ្ឋាព័ត៌មានទីផ្សារការងារ
• អគ្គនាយកដ្ឋាននៃគណៈកម្មការសម្រាប់ដោះស្រាយបញ្ហាកូដកម្ម បាតុកម្ម នៅតាមគ្រប់មុខសញ្ញា ។

៤៣- ដោយពិនិត្យឃើញពីសារៈសំខាន់ និងស្ថានភាពអំណោយផល នៃវិស័យឧស្សាហកមនៅកម្ពុជា រាជរដ្ឋាភិបាលកម្ពុជាបានរៀបចំ និងដាក់ចេញនូវ “គោលនយោបាយអភិវឌ្ឍន៏ឧស្សាហកម្មកម្ពុជាឆ្នាំ២០១៥-២០២៥“ ដើម្បីជាមគ្គុទេសជម្រុញការអភិវឌ្ឍវិស័យឧស្សាហកម្មនៅកម្ពុជា ដែលនឹងរួមចំណែកដល់ការបន្តរក្សាកំណើនសេដ្ឋកិច្ចខ្ពស់ដោយចីរភាព និងបរិយាប័ន្នតាមរយៈការធ្វើពិពិធកម្មសេដ្ឋកិច្ច ការពង្រឹងនូវឧត្តមភាពប្រកួតប្រជែង និងការរបស់ផលិតភាព ដោយឈរលើទស្សនៈវិស័យវែងឆ្ងាយ ។ ជារួមចក្ខុវិស័យ នៃគោលនយោបាយអភិវឌ្ឍវិស័យឧស្សាហកម្ម គឺការប្រែក្លាយពីវិស័យឧស្សាហកម្មអតិពលកម្មទៅឧស្សាហកម្មដោយប្រើជំនាញ ដោយខិតខំសម្រេចគោលដៅ ៣ សំខាន់ គឺ ៖

ក- បង្កើនចំណែកនៃវិស័យឧស្សាហកម្មក្នុង ផ.ស.ស និងវិស័យកម្មន្តសាល

ខ- ជម្រុញពាណិជ្ជកម្មមុខទំនិញក្រៅពីសំលៀកបំពាក់ និងការនាំចេញកសិផលកែច្នៃ

គ- គាំទ្រដល់សហគ្រាសខ្នាតតូច និងមធ្យម

ទន្ទឹមនេះដើម្បីធានាប្រសិទ្ធភាព នៃការអនុវត្តគោលនយោបាយនេះក្រុមព្រឹក្សាអភិវឌ្ឍកម្ពុជា ត្រូវបានប្រគល់

នូវអណាត្តិកិច្ចជាស្ថាប័នទទួលខុសត្រូវ ដឹកនាំការរៀបចំផែនការសកម្មភាពលម្អិត និងសម្របសម្រួលការអនុវត្ត ដើម្បីសំរេចនូវគោលដៅតាមការកំណត់ ។

៤៤- ដើម្បីឆ្លើយតបតម្រូវការជំនាញនៅក្នុងវិស័យនានា ដែលមានការវិនិយោគខ្នាតធំ នាពេលបច្ចុប្បន្ន និងទៅ

អនាគត ទាមទារឱ្យមានការបង្កើតយន្តការសម្រាប់ឱ្យកម្លាំងពលកម្ម មានឱកាសទទួលបានជំនាញពាក់ព័ន្ធនឹងការងារដោយមានការចូលរួមនិងគាំទ្រពីនិយោជក ត្រូវមានវិធានការដូចខាងក្រោម ៖

- រៀបចំអភិក្រមតាមវិស័យសម្រាប់កម្មវិធីអប់រំ និងការបណ្តុះបណ្តាលបច្ចេកទេស និងវិជ្ជាជីវៈ ដើម្បីផ្តល់

ជំនាញកម្រិតខ្ពស់ក្នុងវិស័យអាទិភាព

- ពង្រឹងពង្រីកទំនាក់ទំនងរវាងអ្នកផ្តល់សេវាអប់រំនិងការបណ្តុះបណ្តាលបច្ចេកទេស និងវិជ្ជាជីវៈ ជាមួយ

នឹងវិស័យឯកជនដើម្បីកាត់បន្ថយគម្លាតតម្រូវការជំនាញ

- ជំរុញនិងលើកទឹកចិត្តដល់ការសិក្សាតាមរយៈធ្វើការងារ ការហាត់ការ និងការហ្វឹកហ្វឺនកូនជាង

- ពង្រឹងនិងបន្តអភិវឌ្ឍយន្តការដែលមានស្រាប់ និងបង្កើតយន្តការថ្មី ដើម្បីឱ្យមានកិច្ចសន្ទនាជាទៀងទាត់

និងល្អប្រសើរក្នុងចំណោមភាគីពាក់ព័ន្ធ

- ជំញនិងលើកទឹកចិត្តវិស័យឯកជនឱ្យដើរតួនាទីសកម្មក្នុងការផ្តល់ប្រឹក្សាយោបល់ផ្នែកគោលនយោបាល

ការអភិវឌ្ឍជំនាញ ការផ្តល់ការបណ្តុះបណ្តាលជំនាញ និងការចូលរួមវិភាគទាន ហិរញ្ញវត្ថុ

- បង្កើតកម្មវិធីទទួលស្គាល់ជំនាញទៅវិញទៅមកក្នុងក្របខណ្ឌអាស៊ាន

- ស្រាវជ្រាវនិងអភិវឌ្ឍបច្ចេកវិទ្យាថ្មីៗ

- ត្រួតពិនិត្យ តាមដាន និងវាយតម្លៃទៅលើភាពឆ្លើយតបនៃការអប់រំ បណ្តុះបណ្តាលបច្ចេកទេស​ និងវិជ្ជាជីវៈ ។

៤៥- ដើម្បីសម្រេចបាននូវសកម្មភាពអាទិភាព ក្រសួងបានដាក់ចេញនូវវិធានការ និងសកម្មភាព ដូចខាងក្រោម ៖

• ពង្រឹងគណៈកម្មការសម្រាប់ដោះស្រាយបញ្ហាកូដកម្ម-បាតុកម្ម គ្រប់មុខសញ្ញា គ្រប់ជាន់ថ្នាក់ ។ ពង្រឹងលេខាធិការដ្ឋានគណៈកម្មការសម្រាប់ដោះស្រាយបញ្ហាកូដកម្ម-បាតុកម្ម ដើម្បីប្រចាំការ ត្រៀមខ្លួនចូលដោះស្រាយនិងផ្សះផ្សារវិវាទ នៅរៀងរាល់ពេលម៉ោងធ្វើការងាររបស់បងប្អូនកម្មករនិយោជិត និងបង្កើតឱ្យមានវេណប្រចាំការពេលយប់ទៅតាមតម្រូវការសង្គមសេដ្ឋកិច្ច និងពេលវេលាសមស្របណាមួយ ។
• ពង្រឹងក្រុមការងារផ្នែកទំនាក់ទំនងវិជ្ជាជីវៈ (ក្រុមការងារទី៨) នៃគណៈកម្មាធិការដឹកនាំការងារ ដើម្បីអភិវឌ្ឍវិស័យឯកជន ជាយន្តការសម្របសម្រួលពហុភាគីជាមួយដៃគូពាក់ព័ន្ធ ដោះស្រាយបញ្ហាទាក់ទងទៅនឹងទំនាក់ទំនងវិជ្ជាជីវៈ ។
• ពង្រឹងគណៈកម្មការប្រឹក្សាការងារ បង្កើនប្រសិទ្ធភាពនៃការពិភាក្សាផ្តល់យោបល់អំពីលក្ខខណ្ឌការងារស្របតាមបទប្បញ្ញត្តិ នៃច្បាប់ស្តីពីការងារ ។ រៀបចំ និងអនុវត្តបទបញ្ជាផ្ទៃក្នុងតាមគោលការណ៍ប្រជាធិបតេយ្យ និងបទដ្ឋានអន្តរជាតិ ។
• សហការជាមួយក្រសួងយុត្តិធម៌ និងស្ថាប័នពាក់ព័ន្ធ ដើម្បីរៀបចំច្បាប់ស្តីពីតុលាការការងារ ។
• បង្កើតឱ្យមានបណ្តាញទូរស័ព្ទបន្ទាន់ ដើម្បីផ្តល់ប្រឹក្សាផ្នែកច្បាប់កម្រិតបឋមដល់កម្មករនិយោជិតសហគ្រាស គ្រឹះស្ថានដែលមានវិវាទ ។
• ពង្រឹងយន្តការដោះស្រាយវិវាទការងាររួម តាំងពីពេលចាប់ផ្ដើមមានវិវាទ រហូតដល់កលើវិវាទត្រូវបានប្តឹងទៅក្រុមប្រឹក្សាអាជ្ញាកណ្តាល ។
• គាំទ្រឱ្យមានមូលនិធិសម្រាប់ដំណើរការបន្ត និងរក្សានិរន្តរភាពរបស់ក្រុមប្រឹក្សាអាជ្ញាកណ្តាល ។
• ពង្រឹងយន្តការដោះស្រាយវិវាទបុគ្គល តាំងពីពេលចាប់ផ្ដើមមានវិវាទរហូតដល់ភាគីបណ្តឹងធ្វើពាក្យបណ្ដឹងបន្តទៅតុលាការមានសមត្ថកិច្ច ។
• សហការជាមួយស្ថាប័នពាក់ព័ន្ធ ជំរុញការបង្កើតយន្តការធានារ៉ាប់រងផលប្រយោជន៍កម្មករនិយោជិតនៅពេលរោងចក្រក្ស័យធន ។
• ពង្រឹងក្រុមប្រឹក្សាអាជ្ញាកណ្តាល ដើម្បីបង្កើនប្រសិទ្ធភាពដោះស្រាយវិវាទការងារ និងពង្រីកសាខាក្រុមប្រឹក្សាអាជ្ញាកណ្តាលទៅតាមតំបន់ និងរៀបចំឱ្យមានក្រុមអាជ្ញាកណ្តាលចល័ត ដើម្បីដោះស្រាយវិវាទឱ្យទាន់ពេលវេលា ។
• រៀបចំ និងពង្រឹងយន្តការតាមដានប្រមូលព័ត៌មានលើកវិធានការទប់ស្កាត់ និងពន្យល់ដល់ភាគីពាក់ព័ន្ធនឹងវិវាទឱ្យយល់ពីអត្ថប្រយោជន៍នៃការដោះស្រាយវិវាទក្រៅប្រព័ន្ធតុលាការ ។
• ពង្រឹងប្រសិទ្ធភាពនៃការអនុវត្តសេចក្ដីបង្គាប់របស់ក្រុមប្រឹក្សាអាជ្ញាកណ្តាល ។
• បណ្តុះបណ្តាលគ្រូបង្គោលផ្នែកដោះស្រាយវិវាទការងារ ដើម្បីធ្វើការបណ្តុះបណ្តាលដល់មន្ត្រីដោះស្រាយវិវាទការងារអង្គការវិជ្ជាជីវៈ សហគ្រាស គ្រឹះស្ថាន និងអង្គការជាតិ ឱ្យបានយល់ដឹងពីច្បាប់ស្តីពីការងារ និងបទប្បញ្ញត្តិពាក់ព័ន្ធ ។
• សហការជាមួយដៃគូពាក់ព័ន្ធ ដើម្បីរៀបចំឱ្យមានសិក្ខាសាលាស្តីពីការដោះស្រាយវិវាទការងារ យ៉ាងតិចចំនួន ២ ដង ក្នុង ១ ឆ្នាំ សំដៅបង្កើនការយល់ដឹងពីសិទ្ធិសេរីភាពសហជីព និងអង្គការវិជ្ជាជីវៈ និងអត្ថប្រយោជន៍ នៃការរក្សាបាននូវភាពសុខដុមនានៃទំនាក់ទំនងវិជ្ជាជីវៈ ដោយឈរលើគោលការណ៍សំវាទសង្គមដោយសន្តិវិធី  (Peaceful Social Dialogue) ។
• ពង្រឹងកិច្ចសហប្រតិបត្តិការជាមួយដៃគូជាតិ និងអន្តរជាតិ ជាពិសេសជាមួយអង្គការអន្តរជាតិខាងការងារក្នុងការពង្រឹង និងកសាងសមត្ថភាពរបស់មន្ត្រីដោះស្រាយវិវាទការងារ ជាពិសេសមន្ត្រីជំនាញនៅតាមមន្ទីររាជធានី ខេត្ត ។
• រៀបចំប្រព័ន្ធគ្រប់គ្រងទិន្នន័យតាមបែបព័ត៌មានវិទ្យា ដែលអាចផ្លាស់ប្តូរជាមួយនឹងប្រព័ន្ធទិន្នន័យគ្រប់គ្រងរបស់អធិការការងារ ដើម្បីគ្រប់គ្រងស្ថិតិស្តីពីស្ថានភាពអង្គការវិជ្ជាជីវៈ ករណីវិវាទការងារ និងករណីកូដកម្ម ។ល។
• រៀបចំលិខិតបទដ្ឋាននានា ដើម្បីបំរើឱ្យការងារដោះស្រាយបញ្ហាកូដកម្មបាតុកម្មនៅតាមគ្រប់មុខសញ្ញានៃ គ.ក.ប គ្រប់ជាន់ថ្នាក់ ។
• ចូលរួមអន្តរាគមន៍ក្នុងការដោះស្រាយករណីរោងចក្រក្ស័យធនជាយថាហេតុ និងករណីហានិភ័យផ្សេងៗនិងចូលរួមដោះស្រាយថវិកាសម្រាប់ប្រាក់ឈ្នួល និងអត្ថប្រយោជន៍ផ្សេងៗ របស់កម្មករនិយោជិតតាមរោងចក្រសហគ្រាស ។
• បន្តសិក្សាលទ្ធភាពផ្តល់សច្ចាប័នបណ្តាអនុសញ្ញារបស់អង្គការអន្តរជាតិខាងការងារ ដែលត្រូវបានផ្តល់សច្ចាប័នរួចដោយបណ្តាប្រទេសនៅក្នុងតំបន់ ។
• រៀបចំក្រុមការងារតាមដានត្រួតពិនិត្យ វាយតម្លៃ ផែនការសកម្មភាពនៃកម្មវិធីនេះ ដើម្បីកំណត់នូវសូចនាករវាស់នូវសមិទ្ធផលប្រចាំឆ្នាំ និងកំណត់ផែនការសកម្មភាពប្រចាំឆ្នាំ តាមរយៈកំណត់ឲ្យមានរបាយការណ៍ និងស្ថិតិប្រចាំខែ ត្រីមាស ឆមាស និងប្រចាំឆ្នាំ ដោយមានបញ្ជាក់ពីការវិវត្តនៃសូចនាករនីមួយៗ ។

តភាគ