សំណួរ-ចម្លើយ ក្រមរដ្ឋប្បវេណី និងក្រមនីតិវិធីរដ្ឋប្បវេណី (ភាគ៣៩)

សំណួរ

១៩១- តើមូលហេតុអ្វីដែលនាំឲ្យមានការកាត់បន្ថយពីសន្តតិជន ?

១៩២- តើអនុភាពនៃការកាត់បន្ថយដើម្បីបង្គ្រប់ភាគបម្រុងរួមមានអ្វីខ្លះ ?

១៩៣- តើការកាត់បន្ថយពីប្រទានកម្មដោយមានភ្ជាប់បន្ទុកយ៉ាងម៉េចនោះ ? យើងត្រូវយល់ដឹងថា តើប្រទានកម្មដោយមានភ្ជាប់បន្ទុកមានន័យដូចម្តេចជាមុនសិន ?

១៩៤- ដូចម្តេចដែលហៅថារបបភាគបម្រុង ?

១៩៥- តើប្រភពនៃកាតព្វកិច្ចមានអ្វីខ្លះ ?

ចម្លើយ

១៩១- មូលហេតុដែលនាំឲ្យមានការកាត់បន្ថយពីសន្តតិជន ជាដំបូងគឺដោយសារតែសន្តតិជនត្រូវទទួលសន្តតិកម្មនូវ ឋានៈជាកូនបំណុលនៃអច្ច័យទានពីមតកជន ដូច្នេះជាបឋម ត្រូវសម្រួលផ្ទៃក្នុងនៃសន្តតិជនជាមុនសិន ហើយប្រសិនបើមិនគ្រប់ទេទើបអាចកាត់បន្ថយពីអ្នកខាងក្រៅ ។ ការកាត់បន្ថយអច្ច័យទាន គឺត្រូវធ្វើទៅតាមសមាត្រនៃតម្លៃរបស់កម្មវត្ថុនោះ ។

១៩២- អនុភាពនៃការកាត់បន្ថយដើម្បីបង្គ្រប់ភាគបម្រុងរួមមានដូចជា ៖

• ការសងផលមកវិញ
• បន្ទុកនៃការខាតបង់ដោយអសាធនភាព
• ការកាត់បន្ថយប្រទានកម្មដោយមានភ្ជាប់បន្ទុក
• ការកាត់បន្ថយចំពោះកិច្ចសន្យាដែលចាត់ទុកថាជាប្រទានកម្ម
• ការកាត់បន្ថយក្នុងករណីដែលបានចាត់ចែងកម្មវត្ថុនៃប្រទានកម្ម
• សំណងដោយបង់ថ្លៃ ។

១៩៣- ប្រទានកម្មដែលមានភ្ជាប់បន្ទុក មានកំណត់នៅក្នុងមាត្រា៥៧៦ ដែលចែងថា “ប្រទានកម្ម ដែលបដិគ្គាហក មានករណីយកិច្ចត្រូវអនុវត្តតាវកាលិកជាកំណត់ ដើម្បីទទួលទ្រព្យសម្បត្តិដែលជាកម្មវត្ថុនៃប្រទានកម្ម ។ ដើម្បីធ្វើការកាត់បន្ថយប្រទានកម្មដោយមានភ្ជាប់បន្ទុក គឺយើងត្រូវធ្វើទៅតាមរូបមន្តខាងក្រោមនេះ យកតម្លៃនៃកម្មវត្ថុនោះដកនឹងតម្លៃនៃបន្ទុក ។ (មាត្រា ១២៤១ នៃក្រមរដ្ឋប្បវេណី) ដូចរូបមន្តខាងក្រោម ៖

ការកាត់​បន្ថយប្រទានកម្មដោយមានភ្ជាប់បន្ទុក = តម្លៃនៃកម្មវត្ថុ - តម្លៃនៃបន្ទុក

១៩៤- របបភាគបម្រុង គឺជារបបការពារជនដែលមានសិទ្ធិលើភាគបម្រុងពីការចាត់ចែងដោយគ្មានកម្រៃ ដូច្នេះចំពោះកិច្ចសន្យា ដែលមានតម្លៃថ្នូរមិនត្រឹមត្រូវក៏ចាត់ទុកជាកម្មវត្ថុនៃការកាត់បន្ថយដើម្បីបង្គ្រប់ភាគបម្រុងដែរ ។ (មាត្រា ១២៤២ នៃក្រមរដ្ឋប្បវេណី)

១៩៥- ប្រភពនៃកាតព្វកិច្ចមានដូចជា ៖

• កាតព្វកិច្ចដែលកើតចេញដោយឆន្ទៈរបស់ភាគី
• កាតព្វកិច្ចដែលកំណត់ដោយច្បាប់ ។

តភាគ