សំណួរ-ចម្លើយ នីតិវិធីព្រហ្មទណ្ឌ (ភាគ១៣)

សំណួរ

៦១- តើបណ្តឹងតវ៉ាគឺជាអ្វី ?

៦២- តើផ្លូវតវ៉ាអាចបែងចែកជាប៉ុន្មានប្រភេទ ? អ្វីខ្លះ ?

៦៣- តើបណ្តឹងតវ៉ាសាមញ្ញមានអ្វីខ្លះ ?

៦៤- តើបុគ្គលដែលអាចធ្វើបណ្តឹងឧទ្ធរណ៍បានមានអ្វីខ្លះ ?

៦៥- តើថេរវេលានៃបណ្តឹងសារទុក្ខមានអ្វីខ្លះ ?

ចម្លើយ

៦១- បណ្តឹងតវ៉ា គឺតម្រូវឲ្យមានការពិនិត្យសារជាថ្មីនូវសំណុំរឿង ដោយតុលាការផ្សេងដែលបានចេញសេចក្តីសម្រចដែលត្រូវបានគេជំទាស់ តុលាការទី២នេះ ជាគោលការណ៍ គឺជាតុលាការដែលមានកម្រិតឋានានុក្រមខ្ពស់ជាង បើប្រៀបធៀបនឹងតុលាការដែលចេញសេចក្តីសម្រេច ។ ហើយបណ្តឹងតវ៉ានេះ ក៏តម្រូវឲ្យពិនិត្យសារជាថ្មីលើសំណុំរឿង ដោយតុលាការដែលបានចេញសេចក្តីសម្រេចដែលត្រូវបានគេជំទាស់នោះ ។

៦២- ផ្លូវតវ៉ាអាចបែងចែកជាពីរប្រភេទមានដូចជា ៖

• ផ្លូវតវ៉ាសាមញ្ញ
• ផ្លូវតវ៉ាវិសាមញ្ញ ។

៦៣- បណ្តឹងតវ៉ាសាមញ្ញអាចបែងចែកមានដូចជា ៖

• បណ្តឹងទាស់
• បណ្តឹងឧទ្ធរណ៍ ។

៦៤- បុគ្គលដែលអាចធ្វើបណ្តឹងឧទ្ធរណ៍បានមានដូចជា ៖

• ព្រះរាជអាជ្ញានៃតុលាការជាន់ដំបូង និងអគ្គព្រះរាជអាជ្ញាអមសាលាឧទ្ធរណ៍
• ពិរុទ្ធជន
• ដើមបណ្តឹងរដ្ឋប្បវេណី ចំពោះផលប្រយោជន៍ផ្នែករដ្ឋប្បវេណី
• អ្នកទទួលខុសត្រូវរដ្ឋប្បវេណី ចំពោះផលប្រយោជន៍ផ្នែករដ្ឋប្បវេណី ។

៦៥- ថេរវេលានៃបណ្តឹងសារទុក្ខមានដូចជា ៖

• ១​ (មួយ) ខែ ចំពោះសាលដីការបស់សភាព្រហ្មទណ្ឌនៃសាលាឧទ្ធរណ៍
• ១៥ (ដប់ប្រាំ) ថ្ងៃ ចំពោះសាលដីការបស់សភាស៊ើបសួរនៃសាលាឧទ្ធរណ៍
• ៥ (ប្រាំ) ថ្ងៃ ចំពោះមតិរបស់សភាស៊ើបសួរដែលបញ្ចេញក្នុងរឿងបត្យាប័ន ។

តភាគ