ក្នុងមួយឆ្នាំៗយើងឃើញមានមួយគឺខែកុម្ភៈម្តងដាច់ខែនៅថ្ងៃទី២៨ ម្តងដាច់ខែនៅថ្ងៃទី ២៩ តើការខុសគ្នានេះបណ្តាលមកពីមូលហេតុអ្វី ? ចូរពន្យល់ ។

ផែនដីវិលជុំវិញខ្លួនឯងផង ហើយធ្វើដំណើរជុំវិញព្រះអាទិត្យផង តាមគន្លងរាងអេលីប ។ ដំណើរជុំវិញព្រះអាទិត្យនេះមានល្បឿន ៣០គ.ម ក្នុងមួយវិនាទី ហើយដើម្បីវិលអោយបានជុំវិញព្រះអាទិត្យ ផែនដីត្រូវប្រើរយៈពេល៣៦៥ ថ្ងៃនិង ៦ម៉ោង ដែលហៅថា “ឆ្នាំត្រូពិច” រឺ”ឆ្នាំសុរិយគតិ” ។ ចំណែកឯ “ឆ្នាំស៊ីវិល”វិញគឺជារយៈដែលគេគិតថាក្នុងមួយឆ្នាំផែនដីវិលជុំវិញខ្លួនឯងត្រឹមតែ ៣៦៥ជុំ គឺស្មើ ៣៦៥ថ្ងៃ គឺខែកុម្ភៈមានរយៈពេល ២៨ថ្ងៃ ។ ដូចនេះបើប្រៀបធៀបឆ្នាំសុរិយគតិ ទៅនឹងឆ្នាំស៊ីវិល នោះយើងឃើញថា ឆ្នាំសុរិតយគតិមានរយៈពេលវែងជាងឆ្នាំស៊ីវិលចំនួន ៦ម៉ោងក្នុងមួយឆ្នាំ ។ ម្លោះហើយក្នុងបួនឆ្នាំនៃសុរិយគតិមាន២៤ម៉ោង រឺមួយថ្ងៃលើសឆ្នាំស៊ីវិល ។ ដើម្បីតំរូវឆ្នាំសុរិយគតិនិងឆ្នាំស៊ីវិល គេយកមួយថ្ងៃដែលលើសនោះទៅដាក់ក្នុងខែកុម្ភៈត្រូវជា២៩ថ្ងៃ ។ ក្នុងរយៈពេលបួនឆ្នាំម្តង ខែកុម្ភៈត្រូវមាន២៩ថ្ងៃ គឺជាឆ្នាំបង្រ្គប់ដែលមានចំនួន ៣៦៦ថ្ងៃ ។