តើរបាំរាំវង់ និងទាញព័ត្រមានប្រភពមកពីណា ?

របាំរាំវង់មានប្រភពដើមពីប្រជាជនខ្មែរនៅជិតព្រំដែនលាវ ប្រជាជននៅទីនោះចេះច្រៀង ចេះរាំមុនគេដោយធ្លាប់ទាក់ទងចេញចូលទៅមក ឬជាប់ពូជពង្សសាច់ញ្ញាតិគ្រួសារជាមួយលាវ ។ មានរបៀបតែងខ្លួន ដូចជាស្រ្តីស្លៀកពាក់សំពត់ស៊ីងជាដើម បន្ទាប់មកខ្មែរនៅព្រំដែនសៀមក៏មានទំនាក់ទំនងដូចគ្នានេះដែរ ការឆ្លងតាមរយៈព្រំដែនសៀមទើបតែមានក្នុងឆ្នាំ១៩៤៦ ដល់ ១៩៤៧ ប៉ុណ្ណោះ ។ ឯទំនាក់ទំនងតាមព្រំដែនលាវមានជាយូរមកហើយគឺមុនសម័យអាណាព្យាបាលបារាំងលើទឹកដីឥណ្ឌូចិននេះទៅទៀត ។ ចំណែករបាំសួព្រ័ត្រមានប្រភពបែបរឿងនិទានដែលនិទានថាកាលនោះមានបុរសកាប់ឳសម្នាក់នោះជាមួយវាសនាបានធ្វើជាស្តេច ។ ដោយនិស្ស័យស្តេចអង្គនោះជាបុរសសាមញ្ញ ព្រះអង្គបានត្រាស់បញ្ជាឱ្យគេបង្កើតជាក្បាច់របាំរបៀបជីវភាពអ្នកដើរព្រៃ ដូចជាការឡើងកាប់ឈើឬបោចវល្លិ៍ ។ ចំណែកឧបករណ៍ភ្លេងរបាំនោះជាតំណាងសួរស័ព្ទសត្វព្រៃយំឆ្លើយឆ្លងគ្នា ។ តាមការស្រាវជ្រាវបញ្ជាក់ថារបាំនេះជាកេរ្តិ៍សំណល់អារ្យធម៌ខ្មែរបុរាណតាំងពីស.វទី១នៃគ.សព្រោះឧបករណ៍ភ្លេងទាំងនោះបានបង្ហាញឱ្យឃើញថាជាឧបករណ៍អ្នកស្រុកព្រៃភ្នំសម័យដើម មានដូចជាកន្ទុយក្ងោក ព្រ័ត្រស្បែក ប៉ីពុកជាដើម ។