សំណួរ-ចម្លើយ មេរៀនទី១៦ ការលក់ និងការគ្រប់គ្រងការលក់

សំណួរ

១- តើអ្វីទៅជាតួ​នាទី និងសារៈសំខាន់នៃការលក់ ដោយបុគ្គលិកផ្ទាល់ ?

២- អ្វីទៅជាបុគ្គលិកលក់ ?

៣- តើដំណើរការបុគ្គលិកលក់ផ្ទាល់មានប៉ុន្មាន ? អ្វីខ្លះ ?

៤- តើអ្វីទៅជាបុគ្គលិកផ្ទាល់ ?

៥- តើគុណធម៌នៃការលក់មានអ្វីខ្លះ ? ចូររៀបរាប់ ?

ចម្លើយ

១- តួ​នាទី និងសារៈសំខាន់នៃការលក់ ដោយបុគ្គលិកផ្ទាល់ គឺជាទូទៅបុគ្គលិកលក់បំពេញតួនាទីដែលមានសារៈសំខាន់បំផុតនៃ Marketing របស់អង្គភាពអាជីវកម្មនៅក្នុងការបង្កើត និងថែរក្សាការប្រាស្រ័យទាក់ទងរវាងក្រុមហ៊ុន និងអតិថិជន ។ ដូចដែលយើងបានដឹងរួចមកហើយថា បុគ្គលិកលក់មានតួនាទី៣យ៉ាងសំខាន់នៅក្នុងកិច្ចទូទៅរបស់ Marketing ដែលតួនាទី ទី១សម្រាប់ភ្ជាប់ទំនាក់ទំនងរវាងក្រុមហ៊ុន និងអតិថិជន តួនាទី ទី៣ជាអ្នករៀបចំយុទ្ធសាស្រ្ត Marketing ។ ព្រោះថាបុគ្គលិកអាចដឹងពីសេចក្តីត្រូវការរបស់អតិថិជន និងប្រតិកម្មរបស់អ្នកប្រើប្រាស់ចំពោះការផ្គត់ផ្គង់ផលិតផល និងសេវាកម្ម ។ សម្រាប់សតវត្សដែលពោរពេញទៅដោយការប្រកបអាជីវកម្ម និងការប្រកួតប្រជែង គឺមានការពឹងផ្អែកទៅលើមនុស្ស ដែលជាបុគ្គលលក់ទំនិញ និងសេវាកម្ម ។ ការពិតពួកគេ គឺជាបុគ្គលិកលក់ផ្ទាល់ដែលជួយសម្រេចនូវស្តង់ដានៃការរស់នៅ ដែលបំពេញចិត្តយើងគ្រប់គ្នានៅសព្វថ្ងៃនេះ ហើយពួកគេក៏សំដែងនូវតួនាទីដ៏សំខាន់តែកើនឡើងនៅក្នុងការពង្រីកសេដ្ឋកិច្ចសកលភាវូបនីយកម្មរបស់យើង​ ។ បច្ចុប្បន្នស្ទើរតែគ្រប់អង្គភាពអាជីវកម្មទាំងអស់សុទ្ធតែទទួលបាននូវអត្ថប្រយោជន៍ពីការប្រើប្រាស់បុគ្គលិកដោយផ្ទាល់ ព្រោះទំនាក់ទំនងរវាងអតិថិជន និងអ្នកលក់បានជំរុញឲ្យមាននូវការចាប់អារម្មណ៍ច្រើនជាង ការផ្សាយពាណិជ្ជកម្ម និងការដាក់តាំងផលិតផលទៅទៀត ។ ទោះជាយុទ្ធនាការផ្សាយពាណិជ្ជកម្ម និងការជំរុញផ្សព្វផ្សាយលក់ចំណាយអស់ប្រាក់រាប់លានដុល្លាក៏ដោយ ក៏មិនអាចបំពេញឬសម្រេចនូវអ្វីដែលអ្នកលក់អាចធ្វើបាន នៅពេលដែលពួកគេធ្វើការបញ្ចុះបញ្ចូលមនុស្សឲ្យទិញផលិតផលនោះទេ ។ ដូច្នេះបុគ្គលិកលក់នៅតែដើរតួនាទីសំខាន់នៅក្នុងដំណើរការលក់ព ព្រោះអតិថិជននៅតែចង់ជួបជាមួយអ្នកលក់មុនពេលសម្រេចចិត្តទិញ ។

២- បុគ្គលិកលក់ គឺជាអ្នកទំនាក់ទំនងហើយដែលពួកគេជាអ្នករួមចំណែកក្នុងការចចារដោយផ្ទាល់ជាមួយអតិថិជន ដើម្បីជំរុញឲ្យមានឥទ្ធិពលទៅដល់ការទិញ ។ បុគ្គលិកលក់នៅតែជាសកម្មភាពមានថាមពលខ្លាំង ទោះបីជាការប្រើប្រាស់គ្រឿងអេឡិចត្រូនិចបាននឹងកំពុងតែរីកចម្រើនឡើងនៅក្នុងការទំនាក់ទំនងក៏ដោយ ព្រោះមនុស្សជាអ្នកចូលរួមចំណែក និងរៀបចំនៅក្នុងប្រព័ន្ធទាំងនោះជានិច្ច ។ តាមតួលេខស្ថិតិបានបញ្ជាក់ថា មនុស្សចំនួន១២លាននាក់ត្រូវបានគេជ្រើសរើសក្នុងតួនាទីជាអ្នកលក់នៅក្នុងប្រទេសអាមេរិក ដែលក្នុងនោះរួមមានបុគ្គលិកលក់របស់រោងចក្រឧស្សាហកម្មឈ្មួញកណ្តាលខាងទិញលក់អចលនៈទ្រព្យ ភ្នាក់ងារខាងប័ណ្ណភាគហ៊ុន និងភ្នាក់ងារលក់ ដែលធ្វើការនៅក្នុងហាងទំនិញ ។ នាយកប្រតិបត្តិនៃក្រុមហ៊ុនធំៗមួយចំនួនសុទ្ធតែជាអ្នកធា្លប់ទទួលតំណែងជាអ្នកលក់នៅក្នុងអាជីពការងាររបស់ខ្លួន ។

៣- ដំណើរការបុគ្គលិកលក់ផ្ទាល់មានដូចជា ៖

• ការរំពឹងទុក (Prospecting) ជាដំណើរការនៃការស្វែងរកក្នុងទិសដៅឆ្ពោះទៅរកអតិថិជនសក្តានុពល ។ ការទិញរបស់អតិថិជនអនាគត គឺជាគោលសំខាន់សម្រាប់ទ្រទ្រង់ការលក់ ។​ អ្នកលក់នឹងធ្វើការកត់សម្គាល់អ្វីជាតម្រូវការអតិថិជន តើអតិថិជនមានលទ្ធភាពចំណាយចំពោះតម្រូវការនោះឬទេ ។ ទោះបីជាការរំពឹងទុកជាជំហានមួយក្នុងចំណោមជំហានសំខាន់ៗក៏ដោយ ក៏នៅក្នុងដំណើរការបុគ្គលិកលក់ផ្ទាល់ ជារឿយៗជំហានមួយក្នុងចំណោមជំហានដែលមិនត្រូវបានគេយកចិត្តទុកដាក់ខ្លាំងក្លានោះទេ ។ ហេតុផលនៃការមិនយកចិត្តទុកដាក់នោះ គឺដោយសារការរំពឹងទុកមានការពាក់ព័ន្ធនឹងភាពធុញទ្រាន់ ព្រោះវាត្រូវការចំណាយពេលវេលាច្រើន ។

ដំណើរការនៃការរំពឹងទុកពាក់ព័ន្ធនឹងជំហានសំខាន់៣គឺ ៖

- Generating Sales Leads : ឈ្មោះនៃបុគ្គល ឬអង្គភាព ឬអាជីវកម្មដែលប្រហែលជាទំនងនឹងជាអតិថិជនសម្រាប់ផលិតផលរបស់ក្រុមហ៊ុន ។

- Identifying Prospects : គឺអតិថិជនសក្តានុពលដែលបង្ហាញឲ្យឃើញថា ត្រូវការឬមានចេតនាក្នុងការទិញផលិតផលរបស់ក្រុមហ៊ុន ។

- Qualifying Prospects : ជាការរំពឹងទុកដែលមានការកត់សម្គាល់ថា ជាអ្នកធ្វើសេចក្តីសម្រេចចិត្តទិញ និងមានធនធានហិរញ្ញវត្ថុ ដើម្បីបង់សម្រាប់ផលិតផល ។

Generating Sales Leads និង Identifying Prospects គឺជាអ្នកជំរុញឲ្យការប្រើប្រាស់ផលិតផលកាន់តែច្រើន ។ ដើម្បីបង្កើតឲ្យមាន Generating Sales Leads និង Identifying Prospects ក្រុមហ៊ុនមួយចំនួនបានខិតខំផ្សព្វផ្សាយពាណិជ្ជកម្មដូចជា ចែក​ខិតប័ណ្ណ (Coupon) តាំងពិពណ៌ពាណិជ្ជកម្ម (Trade fairs) រៀបចំកិច្ចប្រជុំជាលក្ខណៈវិជ្ជាជីវៈ (Professional meeting) និងសន្និសិទ្ធផ្នែកផលិតផល (Conferences) ។ល។ រាល់ការរៀបចំផ្សព្វផ្សាយព័ត៌មាននៃផលិតផលផងដែរ ។ យុទ្ធវិធីផ្សេងទៀតដើម្បីបង្កើតឲ្យមាន Generating Sales Leads គឺតាមរយៈការសាកសួរស្ទង់មតិមនុស្សម្នាក់ៗ ឬសាកសួរតាមទូរស័ព្ទ ហើយវិធីនេះមានលក្ខណៈសាមញ្ញដែលបុគ្គលិកលក់ម្នាក់ៗអាចបើកសៀវភៅបញ្ជីទូរស័ព្ទ ជ្រើសរើសយកឈ្មោះអតិថិជនរួចប្រើប្រព័ន្ធទូរស័ព្ទទំនាក់ទំនងជាមួយពួកគេ ។

• ការរៀបចំ (Preparing) ជាមួយនឹងតារាងនៃអតិថិជនដែលរំពឹងទុកមានក្នុងដៃ ជំហានបន្ទាន់របស់អ្នកលក់ គឺធ្វើការរៀបចំការលក់ដោយធ្វើទំនាក់ទំនងតាមមធ្យោបាយផ្សេងៗ (ដូចជាការហៅតាមរយៈទូរស័ព្ទ) ។ បញ្ហានេះពាក់ព័ន្ធនឹងការបង្កើតឡើងនូសំណុំឯកសាររបស់អតិថិជនដែលរំពឹងទុក ដោយធ្វើការសម្រេចចិត្តក្នុងការចូលទៅកាន់អតិថិជននោះ ដោយធ្វើការបង្កើតនូវគោលបំណង និងរៀបចំផងដែរសម្រាប់ការបង្ហាញផលិតផល ៖

- បង្កើតសំណុំឯកសាររបស់អតិថិជនដែលរំពឹងទុក

- ធ្វើការសម្រេចចិត្តទៅលើការជួបអតិថិជន

- កំណត់ឡើងនូវគោលបំណង

- រៀបចំសម្រាប់ការបង្ហាញផលិតផល

នៅពេលដែលយើងមានការយល់ច្បាស់ អំពីអតិថិជនដែលរំពឹងទុក និងការរៀបចំបានល្អសម្រាប់ការលក់នោះនឹងមានការជឿនលឿនក្នុងការសម្រេចគោលបំណងលក់របស់យើង ។

• ទៅជួបអតិថិជនដែលរំពឹងទុក (Approaching the prospect) ដើម្បីឲ្យការទៅជូបអតិថិជនក្នុងការបង្ហាញផលិតផលបានសម្រេចជោគជ័យនោះ មុននឹងអ្នកទៅជួបអតិថិជនអ្នកត្រូវរៀបចំឲ្យបានល្អ ដោយធ្វើយ៉ាងណាឲ្យមានការទាក់ទាញ ឬចាប់អារម្មណ៍ពីអតិថិជន ។ វាពិតជាមានសារៈសំខាន់ណាស់ដែលដឹងច្បាស់ពីពេលវេលាសមរម្យសម្រាប់ទំនាក់ទំនងជាមួយអតិថិជន ។ ក្នុងកាពិនិត្យបច្ច័យទៅលើការអភិវឌ្ឍន៍ ការទៅជួបអតិថិជនឲ្យមានប្រសិទ្ធភាព គឺការបង្ហាញខ្លួន ការបន្ទាបខ្លួន និងការចាប់ផ្តើម បើកការសន្ទនា ឬកិច្ចពិភាក្សា ។

- ការបង្ហាញខ្លួន ការស្លៀកពាក់ឲ្យបានសមរម្យ ដើម្បីកុំឲ្យមានការរំខានដល់អារម្មណ៍របស់អតិថិជនរំពឹងទុក ។

- ការបន្ទាបខ្លួន ឥរិយាបថ អាកប្បកិរិយា និងឬកពាររបស់អ្នកលក់អាចធ្វើឲ្យការលក់បរាជ័យ បើសិនជាគមិនរៀបចំឲ្យបានត្រឹមត្រូវសមរម្យនោះទេ ។ គឺត្រូវរៀបឬកពារឲ្យបានសមរម្យទៅតាមលក្ខណៈនៃអ្នកដែលប្រកាន់ខ្ចាប់មានវិជ្ជាជីវៈត្រឹមត្រូវ ។

- ចាប់ផ្តើមបើកកិច្ចសន្ទនា របស់អ្នកលក់គួររួមបញ្ជូលផងដែរនូវការសង្ខេបកិច្ចស្វាគមន៍ និងសេចក្កីផ្តើម បន្ទាប់មកចាប់ផ្តើមដោយពាក្យពេចន៍ពីរបីមាត់ដោយប្រុងប្រយ័ត្នដែលអាចធ្វើឲ្យអតិថិជនដែលរំពឹងទុកនោះមានការផ្តោតអារម្មណ៍ និងបង្កើតឡើងនូវការចាប់អារម្្មណ៍ ។ នៅដំណាក់កាលនេះ​ ជាទូទៅចំពោះបុគ្គលិកលក់ត្រូវចាប់ផ្តើមធ្វើការសន្ទនាជាលក្ខណៈមិត្តភាព ។ នៅបណ្តាប្រទេសជាច្រើនពេលវេលាជាសំខាន់ណាស់សម្រាប់ការពិភាក្សា ការរៀបចំបង្កើនទំនាក់ទំនងរវាងអ្នកទិញ និងអ្នកលក់ត្រូវធ្វើឡើងដោយប្រុងប្រយ័ត្ន ។

• ធ្វើការបង្ហាញផលិតផល (Marketing the presentation) ដំណាក់កាលនេះ គឺជាស្នូលយ៉ាងសំខាន់នៃដំណើរការទទួលយកការបញ្ជាទិញ ហើយគោលបំណងរបស់វាដើម្បីប្រែក្លាយពីអតិថិជនអនាគតទៅជាអតិថិជនពិតប្រាកដដែលបានបង្កើតឡើងនូវចំណង់ប្រាថ្នាចំពោះផលិតផលច្បាស់លាស់ ។ ជំហានបង្ហាញផលិតផលនៅក្នុងដំណើរការលក់ គឺជាជំហានសំខាន់និងចាំបាច់បំផុត ។ ទោះបីវាអាចមានទម្រង់ជាច្រើនក្តីក៏គោលបំណងក្នុងការបង្ហាញផលិតផលគឺជានិច្ចកាលដូចគ្នា ការធ្វើប្រាស្រ័យទាក់ទងដោយបុគ្គលនូវសារដែលទាក់ទងនឹងផលិតផល ដូចជាមធ្យោបាយដែលវានឹងបញ្ចុះបញ្ចូលអតិថិជនដែលរំពឹងទុកឲ្យទិញផលិតផលដោយធ្វើការបញ្ជាក់នូវចំណុចខ្លះ ដែលធ្វើឲ្យអតិថិជនរំពឹងទុកនោះទុកចិត្ត ហើយនឹងជាផលិតផលដែលគាត់កំពុងតែរក ។ អ្នកលក់ភាគច្រើនប្រើប្រាស់វិធីសាស្រ្តមួយក្នុងចំណោមវិធីសាស្ត្រពីរដូចមាននូវខាងក្រោម ក្នុងការអនុវត្តន៍នូវការបង្ហាញផលិតផលដែលនឹងត្រូវលក់របស់ពួកគេគឺ The canned approach ឬ The Need-satisfaction approach ។

- The canned approach គឺជាការជួបអតិថិជនដែលរំពឹងទុក ដើម្បីលក់ផលិតផលហើយប្រើប្រាស់នូវការបង្ហាញការចងចាំ ពាក្យពេចន៍ផ្សព្វផ្សាយមានអត្ថន័យចំពោះអតិថិជនគ្រប់រូប និងមិនឈានចូលទៅក្នុងការពន្យល់អតិថិជនផ្ទាល់បុគ្គលនោះទេ ហើយក៏មានឈានចូលទៅក្នុងស្ថានភាពនៃការលក់ដែរ ។

- The Need-satisfaction approach គឺជាការជួបអតិថិជនដើម្បីលក់ដែលផ្តោតទៅលើការបញ្ជាក់អំពីតម្រូវការរបស់អតិថិជន និងខណៈនោះដែរបង្កើតឡើងនូវការបង្ហាញផលិតផល ដែលសង្កត់ធ្ងន់ទៅលើតម្រូវការទាំងនោះ ។​ បុគ្គលិកលក់ត្រូវតែធ្វើការសង្កេត និងស្តាប់រាល់ព័ត៌មានពីសេចក្តីត្រូវការ និងចំណាប់អារម្មណ៍របស់អ្នកទិញ ។ ក្នុងនាមជាអ្នកលក់ត្រូវហ៊ានសម្រេច និងបកស្រាយឲ្យអតិថិជនយល់ពីសារៈប្រយោជន៍នៃតម្លៃផលិតផល ។

• ក្តាប់ឲ្យបាននូវការជំទាស់ (Handing Objection) មិនមែនការបង្ហាញទំនិញទាំងអស់សុទ្ធតែល្អនោះទេ វាមិនមែនជានិច្ចកាលបញ្ជាក់ដោយការទិញ​ ដោយភ្លាមៗពីអតិថិជនដែលរំពឹងទុកនោះទេ ។ ជារឿយៗអតិថិជនដែលរំពឹងទុកនោះនឹងបង្ហាញនូវឥរិយាបថខុសៗគ្នានៃការជំទាស់ ហើយធ្វើព្រងើយកន្តើយចំពោះការបង្ហាញផលិតផល ។ ជាការពិតជាក់ស្តែង ការមិនជំទាស់គឺជារឿយៗចង្អុលបង្ហាញនូវសញ្ញាថា អតិថិជនដែលរំពឹងទុកនោះមិនចាប់អារម្មណ៍ទៅលើផលិតផលដែលអ្នកលក់កំពុងបង្ហាញនោះទេ ។ អ្នកលក់ដែលទទួលជោគជ័យភាគច្រើនសំលឹងឃើញថា ការជំទាស់គឺជាសញ្ញានៃការចាប់អារម្មណ៍របស់អតិថិជនដែលរំពឹងទុកនោះ ហើយក៏ជាឱកាសដើម្បីធ្វើការអភិវឌ្ឍន៍នូវគំនិតថ្មីៗ ដែលនឹងពង្រឹងការបង្ហាញផលិតផលនៅពេលខាងមុខទៀត ។
• ការបញ្ចប់ការលក់ (Closing) ដល់ពេលនេះយើងបានបង្កើតជាផ្លែផ្កាហើយ ។ យើងអាចធ្វើការចំណាយពេលប្រហែលប៉ុន្មានសប្តាហ៍ ឬប៉ុន្មានខែឆ្នាំទៀត នៅក្នុងករណីខ្លះក្នុងការនាំអតិថិជនឲ្យមកដល់ចំណុចនេះ ប៉ុន្តែយើងមិនទាន់បានទទួលប្រាក់នៅឡើយទេរហូតដល់អតិថិជនដែលរំពឹងទុកនោះ សម្រេចចិត្តទិញផលិតផលនោះ ។ នៅក្នុងដំណាក់កាលនៃដំណើរការលក់ នៅពេលដែលយើងធ្វើការបញ្ចុះបញ្ជូលអតិថិជន ដើម្បីធ្វើការបញ្ជារទិញនៅត្រង់ចំណុចនេះគឺយោងទៅលើការបញ្ចប់ការលក់ ។
• ការតាមដានជាបន្ត (Following up) អ្នកលក់ភាគច្រើនពឹងផ្អែកទៅលើការលក់ដែលធ្វើការរំលឹកជាញឹកញាប់ ដូច្នេះវាមានសារៈសំខាន់ដែលពួកគេធ្វើតាមដានជាបន្តទៀតទៅលើគ្រប់ការលក់ ហើយមិនធ្វើព្រងើយកន្តើយ ឬធ្វើមិនដឹងមិនឭចំពោះអតិថិជន ដែលការលក់បានធ្វើម្តងរួចហើយជាលើកដំបូងនោះទេ ។ ក្នុងនាមអាជីពជាអ្នកលក់តម្រូវឲ្យមានការត្រួតពិនិត្យមើលអតិថិជនឲ្យបានដិតដល់ជាបន្តទៀត ។ ក្នុងអំឡុងពេលនោះ ការតាមដានដំណាក់កាលនៃដំណើរការលក់ គឺត្រូវធ្វើឲ្យបានច្បាស់លាស់ តើផលិតផលបានប្រគល់ទៅដល់ដៃអតិថិជនយ៉ាងត្រឹមត្រូវហើយឬនៅ ហើយថាតើអតិថិជនមានការពេញចិត្តឬទេ ។ មានអ្នកលក់ខ្លះដែលខ្វះបទពិសោធន៍អាចគេចវេសក្នុងដំណាក់កាលតាមដាននេះ ពីព្រោះពួកគេខ្លាចរអាចំពោះការមិនសប្បាយចិត្តរបស់អតិថិជន ។ ទោះបីជាយ៉ាងណាក៏ដោយ ក៏​វាជាផ្នែកមួយដែលមានសារៈសំខាន់នៃការងាររបស់អ្នកលក់ គឺដើម្បីធានាថាអតិថិជនមានការពេញចិត្ត និងបង្កើតកេរ្តិ៍ឈ្មោះល្អ ឬល្បីល្បាញសម្រាប់ក្រុមហ៊ុន ។

៤- បុគ្គលិកផ្ទាល់ គឺមានពាក់ព័ន្ធជាមួយនឹងតម្រូវការដែលមានការផ្លាស់ប្តូរនៃកន្លែងទីផ្សារ ។ និន្នាការបច្ចុប្បន្ននៅក្នុងផ្នែកបុគ្គលិកលក់ដោយផ្ទាល់ មានរួមបញ្ជូលនូវការសង្កត់ធ្ងន់ទៅលើគុណធម៌នៃការលក់ដោយបង្កើនការប្រើប្រាស់នៃកុំព្យូទ័រ ការរីកចម្រើន Marketing តាមរយៈទូរស័ព្ទ ការលក់ជាក្រុម ការលក់ប្រព័ន្ធ ការរីកចម្រើនដោយសង្កត់ធ្ងន់ទៅលើសេវាកម្មនៃការលក់ និងការលក់ជាលក្ខណៈអន្តរជាតិ ។

៥- គុណធម៌នៃការលក់មានដូចជា​៖

• ការបង្ហាត់បង្រៀនបុគ្គលិក (Sale Force Training) ការជ្រើសរើសបុគ្គលិកលក់បានរួចរាល់ហើយជាបន្ទាប់មកទៀតមានការបង្ហាត់បង្រៀនបុគ្គលិកជាក្រោយទាំងអ្នកថ្មី និងអ្នកមានបទពិសោធន៍ ។ ឧទាហរណ៍ សម្រាប់ក្រុមហ៊ុនធំៗមួយចំនួនបានបង្កើតគោលការណ៍សម្រាប់បណ្តុះបណ្តាលបុគ្គលិកថ្មីរយៈពេល១ឆ្នាំ ហើយបុគ្គលិកចាស់ដែលមានបទពិសោធន៍ ក៏ត្រូវបណ្តុះបណ្តាលបន្ថែមទៀតដែរ ដើម្បីលើកកម្ពស់គុណភាពកែលំអរ សមត្ថភាពការងារទៅតាមប្រែប្រួលដ៏ឆាប់រហ័សនៃបច្ចេកវិទ្យាផ្សារភ្ជាប់ជាមួយបញ្ហាដែលអាចកើតមានឡើង ។ ចំពោះការបណ្តុះបណ្តាលបុគ្គលិកផ្នែកលក់ ត្រូវចំណាយពេលវេលាយ៉ាងច្រើន ដោយធ្វើការណែនាំអំពីមានផលិតផល បច្ចេកទេសលក់ ព័ត៌មានទីផ្សារ និងក្រុមហ៊ុនព្រមទាំងគុណធម៌ សីលធម៌នៃការលក់ ។
• កុំព្យូទ័រភាវូបនីយកម្ម (Computerization) ដោយសារតែការមកដល់នៃកុំព្យូទ័របន្ទាប់ពីសង្រ្គាមលោកលើកទី២មក ។ កុំព្យូទ័រមកក្នុងដើមទស្សវត្ស១៩៨០ទស្សនៈគ្រប់គ្រងមានតម្លៃ និងមានការប្រើប្រាស់ព័ត៌មានវិទ្យាដែលមានការផ្លាស់ប្តូរយ៉ាងឆាប់បំផុត​ ។ អ្នកលក់ទាំងឡាយនាពេលបច្ចុប្បន្ន កំពុងតែអនុវត្តន៍ការងារដោយពឹងផ្អែកទៅលើកុំព្យូទ័រកាន់តែកើនឡើងពីមួយថ្ងៃទៅមួយថ្ងៃសម្រាប់គ្រប់គ្រងទិដ្ឋភាពនៃការលក់ ការតាមដានការលក់ និងជំនួយផ្នែកកិច្ចការតួរលេខព្រមទាំងវិភាគទិន្នន័យ ។
• ការធ្វើម៉ាឃីធីងតាមទូរស័ព្ទ (Telemarketing) បានក្លាយទៅជាឧបករណ៍ដ៏សំខាន់មួយ ។ ក្រុមហ៊ុនទូរស័ព្ទទៅកាន់អតិថិជនគោលដៅក្នុងការផ្សព្វផ្សាយផលិតផល និងសេវាកម្ម ។ ការធ្វើម៉ាឃីធីងរបៀបនេះ ត្រូវចំណាយច្រើនទៅលើការធ្វើសេវាកម្ម ប៉ុន្តែក្រុមហ៊ុនអាចផ្តល់ព័ត៌មានទៅកាន់អតិថិជនបានលឿនបំផុត ហើយអតិថិជនភាគច្រើនក៏មានការពេញចិត្តនិងសេវាកម្មរបៀបនេះដែរ ពីព្រោះវាសន្សំសំចៃពេលវេលា ។ ទន្ទឹមនឹងភាពជោគជ័យដែលកើតឡើងតាមរយៈការធ្វើម៉ាឃីធីងតាមទូរស័ព្ទ ក៏មានការរិះគន់ពីអតិថិជនផងដែរ ។ តាមការធ្វើការស្ទាបស្ទង់បានឲ្យដឹងថា ៧៥% អតិថិជនសហរដ្ឋអាមេរិកគិតថា ​ការអនុវត្តន៍កិច្ចការលក់តាមទូរស័ព្ទនេះរំលោភលើសិទ្ធិសេរីភាព ហើយវាក៏ផ្តល់នូវការរំខានផងដែរ ដូចជានៅពេលព្រឹកព្រលឹម ឬយប់អាធ្រាត្រ ។ល។
• ការលក់ជាក្រុម​ (Team Selling) គឺកំពុងតែក្លាយទៅជាសារៈប្រយោជន៍នៅក្នុងស្ថានភាពមួយចំនួនធំ ដោយវាបង្កើនល្បឿននៃការលក់ទាំងអ្នកផលិត និងអ្នកទិញ ។ មានក្រុមហ៊ុនខ្លះចាប់ផ្តើមប្រើប្រាស់ការងារជាក្រុម ពីព្រោះវាអាចជួយជំរុញឲ្យមានការរីកចម្រើនឡើង ដោយមានការប្រជែងគ្នានៅក្នុងចំណោមអ្នកលក់ដូចគ្នា​។
• ការលក់ជាប្រព័ន្ធ (System Selling) មានក្រុមហ៊ុនភាគច្រើនកំពុងងៀកទៅរកការលក់ជាប្រព័ន្ធ ដែលយោងទៅលើទស្សនាទាននៃការលក់ជាកញ្ចប់ ឬបាច់ផលិតផលដែលប្រហាក់ប្រហែលគ្នានៃទំនិញ ឬសេវា ដែលនឹងអាចបំពេញសេចក្តីត្រូវការរបស់អតិថិជនឲ្យមានប្រសិទ្ធិភាពយ៉ាងខ្លាំងជាងផលិតផលតែមួយមុខ ។ ការលក់ជាប្រព័ន្ធទាមទារនូវការលក់ដែលមានចំណេះដឹងទូលំទូលាយទាំងផ្នែកស្រឡាយផលិតផល និងតម្រូវការរបស់អតិថិជន ។ គោលបំណងនៃការលក់ប្រព័ន្ធ គឺមិនបានផ្តល់ដល់អតិថិជននូវថ្លៃតោកនោះទេ ពីព្រោះដោយសារការផ្តល់ជូននូវកញ្ចប់ ឬបាច់ផលិតផល ឬសេវាទាំងនោះ ដើម្បីឲ្យមានការដោះស្រាយឲ្យកាន់តែប្រសើរឡើងចំពោះរាល់បញ្ហារបស់អតិថិជន ។
• ការលក់សេវា (Selling Services) ឱកាសនៃការលក់នៅក្នុងឧស្សាហកម្មសេវា (មានដូចជា ធនាគារ ការធានារ៉ាប់រង អចលនទ្រព្យ ការដឹកជញ្ជូន និងហិរញ្ញវត្ថុ) គឺកំពុងតែមានការរីកចម្រើនឆាប់រហ័សជាងឱកាសនៅក្នុងឧស្សាហកម្មផលិតកម្មទំនិញ ។ បន្ថែមទៅលើឱកាសនៃការលក់ដែលមានការរីកចម្រើននៅក្នុងអាជីវកម្មសេវា អ្នកលក់នៅក្នុងក្រុមហ៊ុនសេវាកម្មមាននិន្នាការដើម្បីស្វែងរកប្រាក់ចំណេញឲ្យបានច្រើនជាងសមភាគី ដែលលក់ផលិតផលប្រើប្រាស់ និងទំនិញឧស្សហកម្ម ។ អ្នកផលិតមួយចំនួនក៏បានផ្តល់នូវសេវាកម្មមួយចំនួនភ្ជាប់មកជាមួយផលិតផលរបស់ពួកគេដែរ ដូចជាការចែកចាយ ការជួសជុល ឧបករណ៍ និងការថែទាំ កម្មវិធីបំពាក់បំប៉ន និងផ្តល់យោបល់បច្ចេកទេស ។ ជាបន្ថែមក្រុមហ៊ុនខ្លះផ្តល់នូវទំនិញជាមួយនឹងអាហារ ភេសជ្ជៈ ការសែត ជាផ្នែកមួយនៃសេវាកម្មដឹកជញ្ជូនរបស់ខ្លួន ។
• ការលក់ជាអន្តរជាតិ (International Sales) បច្ចេកទេសការលក់ខុសគ្នាពីប្រទេសមួយទៅប្រទេសមួយទៀត ហើយក្រុមហ៊ុនមួយចំនួននៅសហរដ្ឋអាមេរិកធ្វើការពង្រីកចូលទៅក្នុងទីផ្សារបរទេស ត្រូវមានការយល់ដឹងអំពីភាពខុសគ្នាទាំងនេះ ។ ការលក់តម្រូវឲ្យមានភាពសិ្នទ្ធបំផុតជាមួយវប្បធម៌ក្នុងតំបន់ ដែលជនបរទេសម្នាក់មិនអាចត្រូវបានគេសង្ឃឹមទុកថាមាន ។ វាគឺថ្លៃណាស់សម្រាប់តែងតាំងជនបរទេសដើម្បីមុខងារលក់ ។ ជាមួយគ្នានេះផងដែរ ការខ្វះខាតចំណេះដឹងរបស់ជនបរទេស ឬការមិនគោរពសម្រាប់ច្បាប់វប្បធម៌របស់ប្រទេសកំពុងរកស៊ី អាចរងការខូចខាតកេរ្តិ៍ឈ្មោះក្រុមហ៊ុន ឬបណ្តាលឲ្យបាត់ទំនាក់ទំនងជាចាំបាច់ ។ សម្រាប់ការប្រតិបត្តិការលក់ ជាលក្ខណៈអន្តរជាតិការស្វែងយល់អំពីភាពខុសគ្នាខាងវប្បធម៌ គឺមានសារៈសំខាន់ណាស់ ។ ដោយសារតែតម្រូវការមានការរីកចម្រើនចំពោះអ្នកលក់ដែលមានលក្ខណៈជាខ្នាតអន្តរជាតិ សាលានិងមជ្ឈមណ្ឌលសិក្សាបាននិងកំពុងធ្វើការអភិវឌ្ឍន៍កម្មវិធីបង្ហាត់បង្រៀនការលក់ពិសេសជាលក្ខណៈអន្តរជាតិ ។