សំណួរ
៦- តើការគ្រប់គ្រងមានន័យដូចម្តេច ?
៧- ដូចម្តេចដែលហៅថាគោលដៅ និងទិសដៅ ?
៨- តើអ្នកប្រតិបត្តិ និងអ្នកគ្រប់គ្រងខុសគ្នាដូចម្តេច ?
៩- តើកម្រិតនៃការគ្រប់គ្រង (MANAGEMENT LEVEL) មានប៉ុន្មាន ? អ្វីខ្លះ ? ចូរពន្យល់ ?
១០- តើមុខងារគ្រប់គ្រង (Management Functions) មានប៉ុន្មាន ? អ្វីខ្លះ ?
ចម្លើយ
៦- ការគ្រប់គ្រង (Management) គឺជាដំណើរការនៃការប្រើប្រាស់ធនធាន នៅក្នុងអង្គភាពអោយទទួលបានជោគជ័យដល់អង្គភាព ដោយមានការរៀបចំ ការធ្វើផែនការ ការដឹកនាំ និងការត្រួតពិនិត្យ ។
៧- ដែលហៅថា គោលដៅ (Goals) គឺជាទីកន្លែងដែលអង្គភាពគិតថានឹងឆ្ពោះទៅ ឬអំពីអ្វីដែលអង្គភាពចង់អោយបានសំរេចនូវបេសកកម្មរបស់ខ្លួន ។ ដែលហៅថា ទិសដៅ (Objectices) គឺជាផែនការច្បាស់លាស់ដែលអាចវាស់បាន ដែលជួយដល់អ្នកគ្រប់គ្រងដឹងអំពីពេលវេលា ដែលពួកគេនឹងធ្វើសកម្មភាពឆ្លើយតបទៅនឹងគោលដៅរបស់ពួកគេ ។
៨- អ្នកប្រតិបត្តិ និងអ្នកគ្រប់គ្រងខុសគ្នាគឺ ៖
- អ្នកប្រតិបត្តិ (Operatives) គឺជាមនុស្សទាំងឡាយ ដែលធ្វើការងារផ្ទាល់ចំពោះមុខងារមួយ ការងារមួយ ហើយគ្មានសិទ្ធិទទួលខុសត្រូវលើកិច្ចការរបស់អ្នកដទៃ ។ ឧទាហរណ៍ កម្មករ បុគ្គលិក…។
- អ្នកគ្រប់គ្រង (Managers) គឺជាអ្នកបញ្ជា ដឹកនាំនូវរាល់សកម្មភាពការងាររបស់អ្នកដទៃអ្នកគ្រប់គ្រងក៏អាចមានការទទួលខុសត្រូវខ្លះ ឬទាំងស្រុងលើការអនុវត្តការងារ ។ ឧទាហរណ៍ ប្រធានក្រុម ឬប្រធានផ្នែក នាយក…។
៩- កម្រិតនៃការគ្រប់គ្រងមាន ៣ រួមមានដូចតទៅ ៖
- អ្នកគ្រប់គ្រងថ្នាក់ខ្ពស់ (Top Managers) គឺជាក្បាលម៉ាស៊ីនបញ្ជា និងទទួលខុសត្រូវទូទៅលើរាល់ប្រតិបត្តិការទាំងអស់របស់អង្គភាព អ្នកគ្រប់គ្រងនេះគឺជាអ្នកផ្តួចផ្តើម បង្កើតរូបមន្តយុទ្ធសាស្រ្តក្នុងដំណើរការប្រតិបត្តិការរបស់អង្គភាពគេក៏ត្រូវសំដែងផងដែរនូវភាពជាអ្នកដឹកនាំ ចាត់តាំង ពង្រាងកម្មវិធីធ្វើការងារ តាមដាន ត្រួតពិនិត្យ វាយតំលៃ និងជំរុញសកម្មភាពការងារអោយបានសំរេចនូវគោលដៅដែលបានដាក់ចេញ ។ ជាទូទៅគេមានឈ្មោះថា ៖ ប្រធាន អនុប្រធាន នាយក ឬ នាយករង…។
- អ្នកគ្រប់គ្រងថ្នាក់កណ្តាល (Middle Managers) គឺជាអ្នកដែលទទួលខុសត្រូវផ្ទាល់លើអ្នកគ្រប់គ្រងថ្នាក់ទាប គឺជាអ្នកគ្រប់គ្រងនៅតាមបណ្តា ផ្នែកជំនាញនីមួយៗ ឧទាហរណ៍ ផ្នែកគណនេយ្យហិរញ្ញវត្ថុ…សំខាន់ជាងនេះទៀត អ្នកគ្រប់គ្រងកណ្តាលជាអ្នកទទួលខុសត្រូវលើការអនុវត្តផែនការ និងគោលនយោបាយតាមផ្នែករបស់អង្គភាព ដើម្បីប្រមូលផ្តុំជាគោលដៅរួមសំដៅសំរេចផែនការរួម ។
- អ្នកគ្រប់គ្រងថ្នាក់ទាប (Lowest Managers) គឺជាអ្នកដឹកនាំផ្ទាល់នូវរាល់សកម្មភាពការងាររបស់និយោជិក វាជាជំហ៊ានដំបូងនៃការគ្រប់គ្រងរបស់គេ គឺដឹកនាំសកម្មភាពការងាររបស់និយោជិកប្រចាំថ្ងៃ ដើម្បីអនុវត្តន៍តាមផែនការដែលបានដាក់ចុះ ដូចនេះអ្នកគ្រប់គ្រងថ្នាក់ទាបត្រូវតែពាក់ព័ន្ធទៅនឹងការត្រួតពិនិត្យផ្ទាល់លើការកែតម្រូវ ឬដោះស្រាយរាល់បញ្ហាដែលទាក់ទងទៅនឹងការងារនោះ ប្រការនេះអ្នកគ្រប់គ្រងថ្នាក់ទាបត្រូវមានសមត្ថភាពគ្រប់គ្រាន់ ដើម្បីដំណើរការកាងាររបស់អង្គភាព ។ ឧទាហរណ៍ ប្រធានក្រុម ប្រធានផ្នែក ។
១០- មុខងារគ្រប់គ្រងមាន ៤គឺ ៖
- មុខងារផែនការ (Planning Functions) គឺជាគម្រោងការងារណាមួយ ដែលគេលើកឡើងប្រកបដោយការត្រិះរិះ ពិចារណា មានបទដ្ឋានត្រឹមត្រូវមានលក្ខណៈវិទ្យាសាស្ត្រ ហើយអាចអនុវត្តន៍បាន ។
- មុខងារចាត់តាំង (Organizing andStaffing Functions) គឺជាការរៀបចំរចនាសម្ព័ន្ធការងារ អោយបានត្រឹមត្រូវមានការបង្ហាញពីបែបបទ និងការងារច្បាស់លាស់ មានការវាយតម្លៃត្រឹមត្រូវនូវសមត្ថភាពរបស់បុគ្គលិកនយោជិក ដើម្បីរៀបបញ្ជូលអោយត្រូវទៅតាមមុខជំនាញនីមួយៗរបស់ការងារ មិនតែប៉ុណ្ណោះការចាត់តាំងត្រូវបានរៀបចំអោយមានខ្សែរយៈបណ្តោយ និងទទឹងច្បាស់លាស់ ដើម្បីងាយទំនាក់ទំនង និងមានប្រសិទ្ធភាពដល់ការអនុវត្តការងារ ។
- មុខងារដឹកនាំ (Leading Functions) គឺជាការបង្ហាញអោយឃើញនូវសមត្ថភាពរបស់អ្នកគ្រប់គ្រង ដែលបានចូលរួមផ្ទាល់ក្នុងការជំរុញណែនាំសកម្មភាពរបស់អ្នកក្រោមបង្គាប់ខ្លួន អោយប្រព្រឹត្តតាមគោលដៅដែលបានកំណត់។ ការដឹកនាំពាក់ព័ន្ធច្រើនទៅនឹង សីលធម៌ ស្មារតី វិន័យ របស់នយោជិកក្នុងការងារ ។ បញ្ហានេះវាទាមទាអោយចេះប្រើល្បិចប្រើគ្រប់វិធី ដើម្បីទាក់ទាញនយោជិកអោយពេញចិត្តនិងលះបង់កម្លាំងកាយចិត្ត ប្រាជ្ញា ស្មារតីរបស់គេ ទៅក្នុងការងារ ទោះបីជានៅក្នុងកាលៈទេសៈណាក៏ដោយ នោះទើបយើងទទួលបាននូវលទ្ធផលល្អប្រសើរ និងជាអ្នកគ្រប់គ្រងដែលមានប្រជាប្រិយភាព និងមានប្រសិទ្ធភាពខ្ពស់ ។
- មុខងារត្រួតពិនិត្យ (Controlling Functions) គឺជាការងារចុងក្រោយនៃការងារគ្រប់គ្រងដែល ទាមទាអោយអ្នកគ្រប់គ្រងធ្វើការប្រមូលផ្តុំ ប្រៀបធៀប វិភាគ វាយតំលៃ វិនិច្ឆ័យ ឬធ្វើការសន្និដ្ឋានលើបណ្តាសកម្មភាពការងារទាំងឡាយ ទាំងក្នុងពេលអនុវត្ត និងក្រោយពេលអនុវត្ត ដើម្បីធ្វើការកែតម្រូវ ឬមានវិធានការបង្កើនគុណភាពការងារនៅពេលក្រោយអោយបានសមស្រប និងមានប្រសិទ្ធភាពខ្ពស់ ។ ការងារត្រួតពិនិត្យរួមមាន ៖ ត្រួតពិនិត្យលើបរិមាណត្រួតពិនិត្យលើគុណភាព ត្រួតពិនិត្យលើពេលវាលា ត្រួតពិនិត្យលើការចំណាយ ។
តភាគ
