សំណួរ-ចម្លើយ នីតិវិធីព្រហ្មទណ្ឌ (ភាគ១៤)

សំណួរ

៦៦- តើមូលហេតុនៃបណ្តឹងសារទុក្ខមានអ្វីខ្លះ ?

៦៧- តើបណ្តឹងតវ៉ាវិសាមញ្ញមានអ្វីខ្លះ ?

៦៨- តើបណ្តឹងសើរើរឿងក្តីអាចធ្វើបានតែនៅក្នុងករណីអ្វីខ្លះ ?

៦៩- តើបុគ្គលណាខ្លះដែលអាចប្តឹងសើរើរឿងក្តីបាន ?

ចម្លើយ

៦៦- មូលហេតុនៃបណ្តឹងសារទុក្ខមានដូចជា ៖

• សមាសភាពមិនស្របច្បាប់នៃតុលាការ
• អសមត្ថកិច្ចនៃតុលាការ
• ការរំលោភអំណាច
• ការបំពានច្បាប់ ឬការអនុវត្តច្បាប់
• ការបំពាន ឬភ្លេចទម្រង់ការ ដែលច្បាប់បញ្ញត្តិថាត្រូវទុកជាមោឃៈ
• ការមិនបានសម្រេចលើពាក្យសុំរបស់អយ្យការ ឬភាគី កាលណាពាក្យប្តឹងសុំនេះធ្វើជាលាយលក្ខអក្សរ និងមានន័យយ៉ាងច្បាស់លាស់
• កាបំភ្លៃអង្គហេតុ
• គ្មានសំអាងហេតុ
• ការផ្ទុយគ្នារវាងសំអាងហេតុ និងសេចក្តីសម្រេច ។

៦៧- បណ្តឹងតវ៉ាវិសាមញ្ញមានការបែងចែកដូចជា ៖

• បណ្តឹងសារទុក្ខ
• បណ្តឹងសើរើ ។

៦៨- បណ្តឹងសើរើរឿងក្តីអាចធ្វើបានតែនៅក្នុងករណីដូចជា ៖

• កាលណាក្រោយពីការផ្តន្ទាទោសពីបទ មនុស្សឃាត មានលេចតម្រុយយ៉ាងគ្រប់គ្រាន់ដែលអនុញ្ញាតឲ្យគិតថាជនរងគ្រោះនោះនៅរស់រានមានជីវិតនៅឡើយ ។
• កាលណាជនជាប់ចោទពីរនាក់ត្រូវបានផ្តន្ទាទោស ចំពោះបទល្មើសដដែលនេះដោយការផ្តន្ទាទោសទាំងពីរនេះមិនចុះសម្រុងគ្នា ។
• កាលណាសាក្សីណាមួយត្រូវបានផ្តន្ទាទោសពីបទល្មើស ធ្វើជាសាក្សីក្លែងប្រឆាំងនឹងជនជាប់ចោទ ។
• កាលណាមានអង្គហេតុថ្មី ឬលិខិត ឬភស្តុតាងថ្មីដែលនាំឲ្យគេសង្ស័យលើពិរុទ្ធភាពនៃទណ្ឌិត ។

៦៩- បុគ្គលដែលអាចប្តឹងសើរើរឿងក្តីមានដូចជា ៖

• រដ្ឋមន្រ្តីក្រសួងយុត្តិធម៌
• ទណ្ឌិត ឬអ្នកអំណាចស្របច្បាប់ ប្រសិនបើទណ្ឌិតនេះជាអសមត្ថជន
• សហព័ទ្ធ ឪពុក ម្តាយ​ កូន និងជាទូទៅ ជនណាដែលមានផលប្រយោជន៍ខាងសម្ភារៈ ឬខាងផ្លូវចិត្តក្នុងការលប់បំបាត់ទណ្ឌកម្មនេះ ក្នុងករណីដែលទណ្ឌិតបានទទួលមរណភាព ឬបាត់ខ្លួន ។
• រដ្ឋមន្រ្តីក្រសួងយុត្តិធម៌ មុននឹងទៅប្តឹងតុលាការកំពូល អាចសុំដល់អគ្គព្រះរាជអាជ្ញាដែលមានសមត្ថកិច្ចខាងដែនដីឲ្យធ្វើការស្រាវជ្រាវបន្ថែម ។

តភាគ