សំណួរ-ចម្លើយ ពន្ធដារ (ភាគ២៨)

សំណួរ

១៣៦- តើប្រតិវេទន៍គយគឺជាអ្វី ?

១៣៧- តើការឆែកឆេររបស់គយគឺជាអ្វី ?

១៣៨- តើតំបន់រួចពន្ធគឺជាអ្វី ?

១៣៩- តើនិមុត្តិធានាគឺជាអ្វី ?

១៤០- តើកាលៈទេសៈអ្វីខ្លះដែលតម្រូវឲ្យមានការតម្កល់និមុត្តិធានា ?

ចម្លើយ

១៣៦- ប្រតិវេទន៍គយ គឺជាសេចក្តីប្រកាសដែលធ្វើឡើងសម្រាប់គោលបំណងនៃការនាំចេញ ឬនាំចូលតាមទម្រង់ច្បាប់ស្តីពីគយ ។

១៣៧- ការឆែកឆេររបស់គយ គឺជាការធ្វើអធិការកិច្ចជារូបវ័ន្តលើទំនិញ ឬឯកសារដោយរដ្ឋបាលគយ ដើម្បីបញ្ជាក់យថាប្រភេទ ដើមកំណើត លក្ខខណ្ឌ បរិមាណ និងតម្លៃទំនិញ សមស្របតាមការប្រកាសនៃក្នុងប្រតិវេទន៍គយ ។

១៣៨- តំបន់រួចពន្ធ គឺជាតំបន់ដែលបង្កើតឡើងដោយរាជរដ្ឋាភិបាល ដែលទំនិញនាំចូលពុំមែនជាកម្មវត្ថុនៃការជាប់ពន្ធ និងអាករក្រោមលក្ខខណ្ឌកំណត់ច្បាស់លាស់ ។

១៣៩- និមុត្តិធានា គឺជាការធានាផ្នែកហិរញ្ញវត្ថុ ឬលិខិតតុបករណ៍ហិរញ្ញវត្ថុផ្សេងៗទៀត ដែលប្រើប្រាស់សម្រាប់ធានាក្នុងការទូទាត់បង់ពន្ធ អាការ និងកម្រផ្សេងទៀតជាយថាហេតុ ។

១៤០- កាលៈទេសៈដែលតម្រូវឲ្យមានការតម្កល់និមុត្តិធានានាបដូចជា ៖

• ការយកទំនិញចេញពីគយមុនពេលបង់ពន្ធ និងអាករ
• ចរាចរទំនិញក្នុងរង្វង់ ឬឆ្លងកាត់ដែនគយក្រោមរបស់ឆ្លងកាត់
• ការប្រកបធុរកិច្ចជាជើងសារគយ ប្រតិបត្តិករភណ្ឌាគារគយមានដែនកំណត់ និងប្រតិបត្តិករទីកន្លែងសន្និធិគយបណ្តោះអាសន្ន
• ការយកទំនិញចេញពីគយ ដោយរង់ចាំសេចក្តីសម្រេចតវ៉ា ឬលើទំនិញដែលត្រូវបានឃាត់ទុកជាបណ្តោះអាសន្ន
• កាលៈទេសៈផ្សេងៗដែលគយបានកំណត់ ។

តភាគ