សំណួរ-ចម្លើយ ជំពូកទី២ ការតាក់តែងលិខិតរដ្ឋបាល (ភាគ៣)

សំណួរ

១១- តើលិខិតជូនព័ត៌មានមានគំរូទម្រង់ដូចម្តេច ?

១២- អ្វីទៅជាសេចក្តីប្រកាស ឬសេចក្តីជូនដំណឹង ?

១៣- តើជំហ៊ានក្នុងការតាក់តែងសេចក្តីជូនដំណឹង ឬសេចក្តីប្រកាស មានអ្វីខ្លះ ?

១៤- តើទំរង់នៃសេចក្តីប្រកាស ឬសេចក្តីជូនដំណឹងមានប៉ុន្មានផ្នែក ?

១៥- តើចំណែកដើមនៃសេចក្តីប្រកាស ឬសេចក្តីជូនដំណឹងមានអ្វីខ្លះ ?

ចម្លើយ

១១- លិខិតជូនព័ត៌មានមានគំរូទម្រង់ដូចជា​៖

                                                                ព្រះរាជាណាចក្រកម្ពុជា

                                                          ជាតិ សាសនា ព្រះមហាក្សត្រ

Logo

សមាគម.................

លេខៈ...................                                                                                  រាជធានីភ្នំពេញ ថ្ងៃទី....ខែ.......ឆ្នាំ២០....

                                                                       គោរពជូន

                         ឯកឧត្តម លោកជំទាវ លោក លោកស្រី ជាសាកលវិទ្យាធិការ​ នាយក

                         នៃសាកលវិទ្យាល័យ និងវិទ្យាស្ថាន​ និងជាសមាជិកក្រុមប្រឹក្សាភិបាល

                                     សមាជិកសកម្ម នៃសមាគមគ្រឹះស្ថានឧត្តមសិក្សាកម្ពុជា

កម្មវត្ថុ ៖ កាលបរិច្ឆេទ ដំណើរការបើកវគ្គបណ្តុះបណ្តាលបណ្ណារក្ស ជូនសមាជិកសមាគម ។

              សេចក្តីដូចមានចែងក្នុងកម្មវត្ថុខាងលើ សមាគមគ្រឹះស្ថានឧត្តមសិក្សាកម្ពុជា មានកិត្តិយសសូមជម្រាបឧត្តម លោកជំទាវ លោក លោកស្រី​ មេត្តាជ្រាបថា ៖ ការបើកវគ្គបណ្តុះបណ្តាលបណ្ណារក្សជូនសមាជិកសមាគមន និងប្រព្រឹត្តទៅនៅថ្ងៃទី.....ខែ.....ឆ្នាំ......ខាងមុខនេះ ។

            អាស្រ័យដូចបានជម្រាបជូនខាងលើ សូម ឯកឧត្តម លោកជំទាវ លោក លោកស្រី មេត្តាជ្រាបតាមការគួរ ។

            សូម ឯកឧត្តម លោកជំទាវ លោក លោកស្រី​ ទទួលនូវការរាប់អានដ៏ជ្រាលជ្រៅ អំពីខ្ញុំ ។

                                                                                                        ប្រធានសមាគមគ្រឹះស្ថានឧត្តមសិក្សាកម្ពុជា

                                                                                                                                   ហត្ថលេខា

                                                                                                                                        ត្រា

                                                                                                                                      ឈ្មោះ

                                                                  ព្រះរាជាណាចក្រកម្ពុជា

                                                               ជាតិ សាសនា ព្រះមហាក្សត្រ

Logo

ទីស្តីការគណៈរដ្ឋមន្ត្រី

លេខៈ............សជណ                                                                             រាជធានីភ្នំពេញ ថ្ងៃទី....ខែ.......ឆ្នាំ២០....

                                        ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី

                                                                            ជម្រាបជូន

                                        ឯកឧត្តម ទេសរដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា

​

កម្មវត្ថុ ៖ ករណីសំណើសុំគោលការណ៍ចំណាយថវិកាលើប្រាក់ហោប៉ៅពន្ធព្រលានយន្តហោះ និងវត្ថុអនុស្សវរីយ៍ជូន

              ប្រតិភូយុវជនចំនួន ១០០រូប ។

យោង ៖ - លិខិតលេខ.......ចុះថ្ងៃទី.....ខែ.....ឆ្នាំ.......របស់ក្រសួងអប់រំ យុវជន និងកីឡា

              - ចំណារឯកឧត្តមឧបនាយករដ្ឋមន្រ្តី..........ចុះថ្ងៃទី.....ខែ.......ឆ្នាំ..........

សេចក្តីដូចបានជម្រាបជូនក្នុងកម្មវត្ថុ និងយោងខាងលើ​ ខ្ញុំសូមជម្រាបឯកឧត្តមមេត្តាជ្រាបថា​៖ រាជរដ្ឋាភិបាលឯកភាពអនុញ្ញាតគោលការណ៍ចំណាយថវិកាលលើប្រាក់ហោប៉ៅពន្ធព្រលាន និងវត្ថុអនុស្សាវរីយ៍ជូនយុវជន ១០០រូប ដើម្បីទៅចូលរួមទស្សនាកិច្ចសិក្សា ក្នុងកម្មវិធីទំនាក់ទំនងរវាងសិស្ស និងយុវជនជប៉ុនដែលនឹងប្រព្រឹត្តទៅនៅទីក្រុងតូក្យូប្រទេសជប៉ុន មានពីរវគ្គ ៖

              - វគ្គទី១ ៖ ប្រតិភូយុវជនចំនួន ៣០នាក់​ ចាប់ពីថ្ងៃទី....ដល់ថ្ងៃទី....ខែ....ឆ្នាំ.....

             - វគ្គទី២ ៖ ប្រតិភូយុវជនចំនួន ៧០នាក់ ចាប់ពីថ្ងៃទី....ដល់ថ្ងៃទី....ខែ....ឆ្នាំ..... តាមសំណើ។

             អាស្រ័យហេតុនេះ​ សូមឯកឧត្តម មេត្តាជ្រាប និងទទួលអនុវត្តតាមការគួរ ។

                                                                           ជ.ឧបនាយករដ្ឋមន្ត្រី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី

                                                                                                            រដ្ឋលេខាធិការ

ចម្លងជូន

- ក្រសួងការបរទេស និងសហប្រតិបត្តិការអន្តរជាតិ

- ក្រសួងសេដ្ឋកិច្ច​ និងហិរញ្ញវត្ថុ

- ខុទ្ទកាល័យសម្តេចអគ្គមហាសេនាបតីតេជោនាយករដ្ឋមន្ត្រី

- ខុទ្ទកាល័យឯកឧត្តមឧបនាយករដ្ឋមន្រ្តី​ ស ខេង

- ឯកសារ-កាលប្បវត្តិ

១២- សេចក្តីប្រកាស ឬសេចក្តីជូនដំណឹង ជាឯកសារដែលចេញដោយអង្គភាព ឬស្ថាប័ន សម្រាប់ផ្តល់ព័ត៌មានដល់សាធារណៈជន អំពីកិច្ចការអ្វីមួយឲ្យសាធារណៈជន ដែល​មានការពាក់ព័ន្ធបានជ្រាប ។

១៣- ជំហ៊ានក្នុងការតាក់តែងសេចក្តីជូនដំណឹង ឬសេចក្តីប្រកាសមានដូចជា ៖

            ក. ការផ្តើមគំនិត

            អង្គភាពជំនាញ ជាអ្នកផ្តើមគំនិតធ្វើសេចក្តីប្រកាស ឬសេចក្តីជូនដំណឹង ។ ជួនកាលគំនិតផ្តើមនេះអាចចេញមកពីថ្នាក់លើ ។

            នៅពេលគេដឹងថា ប្រុងនឹងមានហេតុការណ៍អ្វីកើតឡើង គេធ្វើសេចក្តីប្រកាស ឬសេចក្តីជូនដំណឹងឲ្យសាធារណៈជន ដែលមានការពាក់ព័ន្ធបានជ្រាប ។

            ឧទាហរណ៍ ៖ សេចក្តីប្រកាសស្តីពីការប្រឡងជ្រើសរើសនិស្សិតចូលរៀន នៅតាមគ្រឹះស្ថានឧត្តមសិក្សារដ្ឋ សេចក្តីប្រកាសពីការដេញថ្លៃ...។ សេចក្តីជូនដំណឹងស្តីពីការប្រឡងសិស្សមធ្យមសិក្សាទុតិយភូមិ....។

            ក្រោយពេលដែលសេចក្តីប្រកាស ឬសេចក្តីជូនដំណឹងត្រូវបានបោះត្រា​ ចុះលេខ និងកាលបរិច្ឆេទរួចហើយ គេត្រូវផ្សព្វផ្សាយ ។ គេអាចប្រើវិធីផ្សព្វផ្សាយដូចខាងក្រោម ៖

            ចំពោះសេចក្តីប្រកាស ឬសេចក្តីជូនដំណឹងដែលសំខាន់​ គេផ្សាយតាមវិទ្យុ ទូរទស្សន៍ និងចុះលើទំព័រកាសែត ។ គេធ្វើដីកាអម ដើម្បីបញ្ជូនសេចក្តីប្រកាស ឬសេចក្តីជូនដំណឹងទៅកន្លែងផ្សព្វផ្សាយដើម្បីជ្រាប ឬដើម្បីផ្សព្វផ្សាយ ។

            សេចក្តីប្រកាស ឬសេចក្តីជូនដំណឹងខ្លះ ត្រូវបានគេបិទផ្សាយនៅតាមក្រសួង ស្ថាប័ននានា ដែលជាអ្នកធ្វើប្រកាស ឬសេចក្តីជូនដំណឹង ។

១៤- ទំរង់នៃសេចក្តីប្រកាស ឬសេចក្តីជូនដំណឹងមាន៣ផ្នែកគឺ ៖

• ចំណែកដើម
• ខ្លឹមសារ
• រូបមន្តបញ្ចប់

១៥- ចំណែកដើមនៃសេចក្តីប្រកាស ឬសេចក្តីជូនដំណឹងមានដូចជា ៖ ក្បាលលិខិត និងចំណងជើង ។

តភាគ