សំណួរ-ចម្លើយ ជំពូកទី២ ការតាក់តែងលិខិតរដ្ឋបាល (ភាគ៤)

សំណួរ

១៦- តើក្បាលលិខិតមានអ្វីខ្លះ ?

១៧-​ អ្វីទៅជាចំណងជើង ?

១៨- អ្វីទៅជាខ្លឹមសារ ?

១៩- តើរូបមន្តបញ្ចប់មានអ្វីខ្លះទៅ ?​ ចូរពន្យល់ ?

២០- អ្វីទៅជាកិច្ចសន្យា ?

ចម្លើយ

១៦- ក្បាលលិខិតមានដូចជា ៖

• ឈ្មោះហៅជាផ្លូវការនៃប្រទេស
• បាវចនា
• និមិត្តសញ្ញាស្ថាប័ន ឬអង្គភាព
• ប្រភព លេខលិខិត និងអក្សរកាត់លិខិត
• ទីកន្លែង និងកាលបរិច្ឆេទ

១៧-​ ចំណងជើង គឺគេសរសេរចំណងជើងជាតួអក្សរធំៗបន្តិច នៅចំកណ្តាលទំព័រ ៤-៥ ចន្លោះបន្ទាត់ ក្រោមបាវចនា ។

ឧទាហរណ៍ ៖ ចំណែកដើម

                                                                   ព្រះរាជាណាចក្រកម្ពុជា

                                                              ជាតិ សាសនា ព្រះមហាក្សត្រ

សាកលវិទ្យាល័យ.....

លេខៈ.............                                                                                     រាជធានីភ្នំពេញ ថ្ងៃទី....ខែ.......ឆ្នាំ២០....

                                                                      សេចក្តីប្រកាស

                                                                            ស្តីពី

                                                   ការ.......................................................

១៨- ខ្លឹមសារ គឺក្នុងការសរសេរខ្លឹមសារនៃសេចក្តីប្រកាស ឬសេចក្តីជូនដំណឹង ត្រូវប្រើឃ្លាខ្លីៗ ច្បាស់លាស់ ។ ជួនកាលគេត្រូវបង្ហាញហេតុផល ជួនកាលគេពុំចាំបាច់បង្ហាញអំពីហេតុផល ឬការពន្យល់ក្បោះក្បាយទេ ។

            ឧទាហរណ៍ ៖

            សមាគមគ្រឹះស្ថានឧត្តមសិក្សារកម្ពុជា មានកិត្តិយស សូមជូនដំណឹងដល់..............។

១៩- រូបមន្តបញ្ចប់​មានដូចជា ៖

            ក- ការចុះហត្ថលេខា បោះត្រា ចុះលេខ ចុះកាលបរិច្ឆេទ

                        សេចក្តីប្រកាស ឬសេចក្តីជូនដំណឹង តូ្រវចុះហត្ថលេខា ដោយប្រធានក្រសួង ស្ថាប័ន អង្គភាព ។ គេអាចប្រើរូបមន្តចុះហត្ថលេខា តាមប្រតិភូមកម្មក៏បាន ។

                        ឯកសារដែលចុះហត្ថលេខារួចហើយ គេត្រូវបោះត្រា ចុះលេខ និងចុះកាលបរិច្ឆេទ ដោយការិយាល័យរបៀប ឬការិយាល័យរដ្ឋបាល ។

ចំណាំ

ការប្រៀបធៀប ការងារការិយាល័យរបៀប និងការងារការិយាល័យរដ្ឋបាល ៖

            ការិយាល័យរបៀប                                            ការិយាល័យរដ្ឋបាល

- ទទួលលិខតចូល                                            -​ ការងារពិធីការ

- បញ្ចូនលិខិតចេញ                                           - ការងារបុគ្គលិក

- បោះត្រា និងចុះលេខ                                       - ការងារគណនេយ្យ

- គ្រប់គ្រងត្រា                                                   - ការងារសរុប ផែនការ រៀបចំប្រជុំ

- រក្សាកាលប្បវត្តិ                                               - ការងារទំនាក់ទំនង-បេសកកម្ម

- ជូនព័ត៌មាន                                                    -​ ការងារសន្តិសុខ

- កសាងសំណុំលិខិត                                        - អនាម័យ-សណ្តាប់ធ្នាប់ ។

           ខ- កន្លែងទទួល

            គេសរសេរកន្លែងទទួល នៅខាងក្រោមងាកមកខាងឆ្វេង ។ គេត្រូវផ្ញើសេចក្តីប្រកាស ឬសេចក្តីជូនដំណឹង ជូនក្រសួង ស្ថាប័ន មន្ទីរ អង្គភាព ពាក់ព័ន្ធ ជាពិសេសកន្លែងដែលមានភារកិច្ចត្រូវផ្សព្វផ្សាយ ។

ឧទាហរណ៍

កន្លែងទទួល

- ក..................” ដើម្បីចុះផ្សាយ “

- ខ..................” ដើម្បីផ្សព្វផ្សាយ “

- គ..................” ដើម្បីបិទផ្សាយ “

- ឃ..................” ដើម្បីជូនជ្រាប “

- ង..................” ដើម្បីមុខការ​ “

                                                                    ព្រះរាជាណាចក្រកម្ពុជា

                                                                 ជាតិ សាសនា ព្រះមហាក្សត្រ

Logo

សាកលវិទ្យាល័យ.....

លេខៈ.............                                                                                       រាជធានីភ្នំពេញ ថ្ងៃទី....ខែ.......ឆ្នាំ២០....

                                                                           សេចក្តីជូនដំណឹង

                                                                                  ស្តីអំពី

                                                       ការឈប់សម្រាកក្នុងឱកាសបុណ្យចូលឆ្នាំខ្មែរ

សាកលវិទ្យាល័យ...... សូមជូនដំណឹងដល់ បុគ្គលិក សាស្រ្តាចារ្យ និងនិស្សិត ទាំងអស់ឲ្យបានជ្រាបថា នៅក្នុងឱកាសបុណ្យចូលឆ្នាំខ្មែរប្រពៃណីជាតិខាងមុខនេះ សាកលវិទ្យាល័យ អនុញ្ញាតឲ្យឈប់សម្រាកចំនួន ៣ថ្ងៃ គឺចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០១៩ ។ ចូលធ្វើការ និងចូលរៀនវិញ នៅថ្ងៃទី ១៧ ខែមេសា ឆ្នាំ ២០១៩ ។

អាស្រ័យហេតុនេះ សូម មន្ត្រីបុគ្គលិក សាស្រ្តាចារ្យ និងនិស្សិត ទាំងអស់ ជ្រាបជាព័ត៌មាន ។

                                                                                                                                   ត.ប សាកលវិទ្យាធិការ

                                                                                                                                ប្រធានការិយាល័យរដ្ឋបាល

                                                                                                                                             ហត្ថលេខា

                                                                                                                                                    ត្រា

                                                                                                                                                  ឈ្មោះ

កន្លែងទទួល

- ការិយាល័យសិក្សា

- ការិយាល័យរដ្ឋបាល

     ” ដើម្បីផ្សព្វផ្សាយ “

- ឯកសារ-កាលប្បវត្តិ

                                                                   ព្រះរាជាណាចក្រកម្ពុជា

                                                                ជាតិ សាសនា ព្រះមហាក្សត្រ

Logo

សាលារាជធានីភ្នំពេញ

លេខៈ.............                                                                                       រាជធានីភ្នំពេញ ថ្ងៃទី....ខែ.......ឆ្នាំ២០....

                                                                         សេចក្តីជូនដំណឹង

                                                                        ............................

            សាលារាជធានីភ្នំពេញ សូមជូនដំណឹងដល់ម្ចាស់ក្រុមហ៊ុន រដ្ឋ-ឯកជន និងអាជីវករ ដែលប្រកបអាជីវកម្មដឹកទំនិញ និងសម្ភារៈផ្សេងៗ តាមរថយន្តធំទាំងអស់បានជ្រាបថា ដើម្បីរួមចំណែកជួយថែរក្សាបណ្តាញលូនិងថ្នល់ ព្រមទាំងកាត់បន្ថយការកកស្ទះចរាចរណ៍ ក្នុងទីប្រជុំជនរាជធានីភ្នំពេញនោះ ចាប់ពីថ្ងៃជូនដំណឹងនេះតទៅ រាល់ការដឹកជញ្ជូនទំនិញ និងសម្ភារៈផ្សេងៗ តាមរថយន្តធំ ចេញ-ចូល ក្នុងទីប្រជុំជនរាជធានីភ្នំពេញ ត្រូវធ្វើចរាចរណ៍តាមផ្លូវភ្នំពេញហាយវ៉េវិញ ពោលគឺមិនអនុញ្ញាតឲ្យចរាចរណ៍ ចេញ-ចូល តាមមហាវិថីសហព័ន្ធរុស្សីឡើ លើកលែងតែមានលិខិតអនុញ្ញាតពីសាលារាជធានីភ្នំពេញជាមុន ។

            អាស្រ័យហេតុនេះ សូមបងប្អូនជាម្ចាស់រថយន្តដឹងជញ្ជូនទំនិញ និងសម្ភារៈផ្សេងៗធុនធំទាំងអស់ជ្រាប និងចូលរួមអនុវត្តតាមសេចក្តីជូនដំណឹងនេះ ឲ្យមានប្រសិទ្ធភាព​។

                                                                                                                                      អភិបាលរាជធានីភ្នំពេញ

កន្លែងទទួល

- ទីស្តីការគណៈរដ្ឋមន្រ្តី

- ក្រសួងមហាផ្ទៃ

- ក្រសួងសាធារណការ និងដឹងជញ្ជូន

- ក្រសួងព័ត៌មាន

” ដើម្បីជូនជ្រាប “

- ស្នងការដ្ឋាននគរបាលរាជធានីភ្នំពេញ

- ទីបញ្ជាការដ្ឋានកងរាជអាវុធហត្ថរាជធានីភ្នំពេញ

- មន្ទីរសាធារណការ និងដឹកជញ្ជូន

- សាលាខ័ណ្ឌដង្កោ

- ក្រុមហ៊ុន PHNOM PENH HIGH WAY

” ដើម្បីមុខការ  “

- គ្រប់ប្រព័ន្ធឃោសនា

” ដើម្បីផ្សព្វផ្សាយ​  “

- កាលប្បវត្តិ-ឯកសារ

២០- កិច្ចសន្យាជាការព្រមព្រៀងគ្នារវាង២ភាគី ឬច្រើនភាគី ដែលកើតចេញពីឆន្ទៈ ដើម្បីរំលត់កាតព្វកិច្ចអ្វីមួយ ។ តាមធម្មតា កិច្ចសន្យាត្រូវធ្វើឡើងជាលាយលក្ខណ៍អក្សរ ។ ប៉ុន្តែចំពោះកិច្ចការ ដែលពុំមានសារៈសំខាន់កិច្ចសន្យាត្រូវធ្វើឡើងដោយមាត់ទទេក៏បាន ។

តភាគ