សំណួរ-ចម្លើយ សទ្ទានុក្រម រដ្ឋប្បវេណី (ភាគ២២)

សំណួរ

១០៦- តើអំណាចមេបាសំដៅដល់អ្វី ?

១០៧- តើអំពើអនីត្យានុកូលសំដៅដល់អ្វី ?

១០៨- តើឧបកម្មសិទ្ធិអវិភាគសំដៅដល់អ្វី ?

១០៩- តើឧបាទេសកម្មសំដៅដល់អ្វី ?

១១០- តើឧបាទេសិកសំដៅដល់អ្វី ?

ចម្លើយ

១០៦- អំណាចមេបា សំដៅដល់សិទ្ធិនិងករណីយកិច្ចក្នុងការបីបាច់ថែរក្សាកូន ដែលជាអនីតិជន និងគ្រប់គ្រងលើទ្រព្យសម្បត្តិរបស់កូននោះ ។

១០៧- អំពើអនីត្យានុកូល សំដៅដល់អំពើដែលបំពានដោយខុសច្បាប់លើសិទ្ធិ ឬផលប្រយោជន៍អ្នកដទៃ ដោយកំហុសចេតនា ឬអចេតនា ។

១០៨- ឧបកម្មសិទ្ធិអវិភាគ សំដៅដល់ស្ថានភាពដែលបុគ្គលច្រើននាក់មានសិទ្ធិលើទ្រព្យសម្បត្តិ ដែលក្រៅពីកម្មសិទ្ធិ ។ ឧទាហរណ៍ ផលុបភោគ សិទ្ធិប្រើប្រាស់ និងអាស្រ័យនៅ សិទ្ធិជួលអចិន្ត្រៃយ៍ជាអាទិ៍ របស់បុគ្គលច្រើននាក់ ។

១០៩- ឧបាទេសកម្ម សំដៅដល់ឋានៈមួយដែលបុគ្គលម្នាក់ទទួលជំនួសបុគ្គលណាមួយតាមផ្លូវច្បាប់ (ឧបាទេសកម្មអាចសំដៅទៅលើវត្ថុផងដែរ) ។

១១០- ឧបាទេសិក សំដៅដល់ជនដែលទទួលស្នងសិទ្ធិតាមផ្លូវច្បាប់ ឬទទួលស្នងការទាមទាររបស់បុគ្គលម្នាក់ទៀតតាមរយៈឧបាទេសកម្ម ។

តភាគ