សំណួរ-ចម្លើយ ចំណេះដឹងរដ្ឋបាល វិស័យការងារ និងបណ្តុះបណ្តាលវិជ្ជាជីវៈ (ភាគ២២)

សំណួរ

១០៦- អ្នកស្វែងរកការងារតែងតែប្រាថ្នាចង់បានប្រាក់បៀវត្សច្រើនតើអ្នកគិតថាអ្នកស្វែងរកការងារធ្វើគួរត្រៀមអ្វីខ្លះចាប់តាំងពីពេលកំពុងសិក្សារហូតដល់ពេលស្វែងរកការងារធ្វើ ?

១០៧- តើអ្វីខ្លះជាគោលការណ៍ឯកភាពទាំង ៥ ដែលត្រីភាគីបានកំណត់ក្រោយពីសិក្ខាសាលាថ្នាក់ជាតិស្តីពីពង្រឹងដំណើរការនៃការកំណត់ប្រាក់ឈ្នួលអប្បរមានៅកម្ពុជា ?

១០៨- តើអ្វីខ្លះ ជាលក្ខណៈវិនិច្ឆ័យក្នុងការកំណត់ប្រាក់ឈ្នួលអប្បរមា ?

១០៩- តើប្រតិទិនការងារនៃការចរចាប្រាក់ឈ្នួលនៅកម្ពុជាចាប់ផ្តើមពេលណា និងត្រូវធ្វើដូចម្តេចខ្លះក្នុងដំណាក់កាលនីមួយៗ ?

១១០- តើច្បាប់សហជីពបានចាប់ផ្តើមធ្វើសេចក្តីព្រាងនៅពេលណា ? ទទួលជំនួយបច្ចេកទេសតាក់តែងពីអ្នកណា ? បានប្រជុំប៉ុន្មានដង និងចំណាយអស់រយៈពេលប៉ុន្មានឆ្នាំ ? ហើយមានលក្ខណៈយ៉ាងដូចម្តេច ប្រៀបធៀបជាមួយប្រទេសក្នុងតំបន់ ?

ចម្លើយ

១០៦- មុននឹងស្វែងរកការងារ អ្នកត្រូវត្រៀមរៀបចំ ៖

• មានគោលដៅច្បាស់លាស់
• អភិវឌ្ឍន៍សមត្ថភាពផ្ទាល់ខ្លួន
• ធ្វើការរៀបចំនូវតារាងការងារពាក់ព័ន្ធនឹងជំនាញរបស់ខ្លួន
• ធ្វើការរៀបចំអាកប្បកិរិយានៅពេលសម្ភាសន៍
• ធ្វើការស្វែងយល់ពីអង្គភាពដែលអ្នកចង់ទៅបំពេញការងារ
• មានទំនាក់ទំនងល្អ
• រៀនធ្វើការស្ម័គ្រចិត្តចំពោះការងារដែលពាក់ព័ន្ធនឹងជំនាញរបស់ខ្លួន
• ធ្វើការផ្លាស់ប្តូរនូវអាកប្បកិរិយារបស់ខ្លួន
• ធ្វើការងារដែលសមស្របទៅនឹងជំនាញរបស់ខ្លួន
• ស្មោះត្រង់នឹងការងារ និងមានគំនិតច្នៃប្រឌិត។

១០៧- ក្រោយសិក្ខាសាលាពិគ្រោះយោបល់ត្រីភាគីថ្នាក់ជាតិ ស្តីពីការពង្រឹងដំណើរការនៃការកំណត់ប្រាក់ឈ្នួល អប្បបរមានៅកម្ពុជាដែលប្រព្រឹត្តិទៅក្រោមជំនួយបច្ចេកទេសរបស់អង្គការអន្តរជាតិខាងការងារ ILO កាលពីថ្ងៃទី២៤ ២៥ ខែមេសា ឆ្នាំ២០១៤ ភាគីទាំងបីបានព្រមព្រៀងជាឯកច្ឆន្ទនូវគោលការណ៍ចំនួនប្រាំ ៖

• ការពិភាក្សាប្រាក់ឈ្នួលត្រូវធ្វើឡើងជារៀងរាល់ឆ្នាំ
• ប្រាក់ឈ្នួលអប្បបរមាត្រូវតែជាតួលេខដែលអាចព្យាករណ៍បានពោល គឺត្រូវកើនតាមលំដាប់បន្តបន្ទាប់
• ប្រកាន់យកគោលការណ៍ឈ្នះឈ្នះក្នុងការចរចា
• ត្រូវយកជម្រើសកុងសង់ស៊ីសក្នុងការសម្រេចចិត្តតែបើគ្មានកុងសង់ស៊ីសក្នុងកិច្ចប្រជុំលើកទី ១ ត្រូវប្រជុំ លើកទី២ ហើយបើក្នុងករណ៏នៅតែគ្មានកុងសង់ស៊ីស ត្រូវសម្រេចតាមការបោះឆ្នោតជាសម្ងាត់ដោយយកសម្លេងភាគច្រើនក្នុងកិច្ចប្រជុំលើកទី ២
• ត្រូវប្រើប្រាស់ទិន្នន័យផ្លូវការរបស់វិទ្យាស្ថានជាតិស្ថិតិនិងយកលក្ខណវិនិច្ឆ័យបែបសង្គម និងសេដ្ឋកិច្ចមកធ្វើជាមូលដ្ឋានក្នុងការពិភាក្សា ។

១០៨- លក្ខណៈវិនិច្ឆ័យដែលត្រូវយកមកប្រើប្រាស់ក្នុងការកំណត់ប្រាក់ឈ្នួលអប្បបរមា មានចំនួន ៧ រួមមាន ៖

• លក្ខណវិនិច្ឆ័យបែបសង្គម ៖

         - ស្ថានភាពគ្រួសារ

         - អត្រាអតិផរណា

         - ការចំណាយក្នុងការរស់នៅ

• លក្ខណវិនិច្ឆ័យបែបសេដ្ឋកិច្ច ៖

         - ផលិតភាព

         - កាពប្រកួតប្រជែង

         - ស្ថានភាពទីផ្សារការងារ

         - កម្រិតចំណេញរបស់វិស័យ

១០៩- ការពិភាក្សាប្រាក់ឈ្នួលអប្បបរមា ត្រូវអនុវត្តតាមប្រតិទិនដូចតទៅ ៖

• កំណត់យកខែកក្កដា ជាការចាប់ផ្តើមពិភាក្សាប្រាក់ឈ្នួលអប្បបរមាជាលក្ខណៈផ្ទៃក្នុងរបស់ភាគីនីមួយៗ
• កំណត់យកខែសីហា ជាការចាប់ផ្តើមពិភាក្សាប្រាក់ឈ្នួលអប្បបរមា ជាលក្ខណៈទ្វេភាគី
• កំណត់យកខែកញ្ញា ជាការចាប់ផ្តើមពិភាក្សាប្រាក់ឈ្នួលអប្បបរមា ជាលក្ខណៈត្រីភាគី
• កំណត់យកដើមខែតុលា ជាការបើកកិច្ចប្រជុំគណៈកម្មការប្រឹក្សាការងារ ដើម្បីសម្រេចប្រាក់ឈ្នួលអប្បបរមា ថ្មីសម្រាប់ផ្នែកវាយនភណ្ឌ កាត់ដេរ និងផលិតស្បែកជើង និង
• កំណត់យកថ្ងៃទី០១ ខែមករា នៃឆ្នាំបន្ទាប់ ជាកាលបរិច្ឆេទចូលជាធរមាននៃប្រាក់ឈ្នួលអប្បបរមាថ្មី

១១០- ច្បាប់ស្តីពីសហជីពត្រូវបានចាប់ផ្តើមព្រាងតាំងពីឆ្នាំ២០០៨ ក្រោមជំនួយបច្ចេកទេសតាក់តែងពីអង្គការអន្តរជាតិខាងការងារ (ILO)។

         - ដំណើរការនៃការព្រាងសេចក្តីព្រាងច្បាប់ស្តីពីសហជីព បានឆ្លងកាត់កិច្ចប្រជុំពិគ្រោះយោបល់ទ្វេភាគីជាមួយ មួយសហជីពនានាចំនួន ២៤លើក ភាគីនិយោជកចំនួន ៩លើក សិក្ខាសាលាត្រីភាគីចំនួន ៧លើក ប្រជុំ អន្តរក្រសួងចំនួន១៣លើក និងសិក្ខាសាលាពិគ្រោះយោបល់ថ្នាក់ជាតិរៀបចំ ដោយរដ្ឋសភាជាតិចំនួន ១លើក។

         - ការតាក់តែងសេចក្តីព្រាងច្បាប់នេះត្រូវបានប្រើប្រាស់រយៈពេល៨ឆ្នាំ(ពីឆ្នាំ២០០៨ រហូតដល់ឆ្នាំ២០១៦)

         - បើប្រៀបធៀបជាមួយច្បាប់ស្តីពីសហជីព នៃបណ្តាប្រទេសក្នុងតំបន់ យើងសង្កេតឃើញថាច្បាប់ស្តីសហជីពរបស់កម្ពុជាមានលក្ខណៈល្អប្រសើរជាង ដែលផ្តល់ភាពងាយស្រួលដល់កម្មករនិយោជិត និង និយោជកក្នុងការបង្កើតសហជីព ឬសមាគមនិយោជក និងអនុវត្តសិទ្ធិសេរីភាពសហជីព ស្របតាមស្ថានភាពជាក់ស្តែងរបស់ប្រទេសកម្ពុជាយើង ។

តភាគ