សំណួរ-ចម្លើយ ចំណេះដឹងរដ្ឋបាល វិស័យការងារ និងបណ្តុះបណ្តាលវិជ្ជាជីវៈ (ភាគ១៦)

សំណួរ

៧៦- តើសេវាស្តានីតិសម្បទាមានអ្វីខ្លះ ?

៧៧- កាតព្វកិច្ចរបស់និយោជក ជាមួយបេឡាជាតិរបបសន្តិសុខសង្គម ទាក់ទងនឹងគ្រោះថ្នាក់ការងារលើកម្មករនិយោជិតរបស់ខ្លួន ?

៧៨- កាតព្វកិច្ចរបស់កម្មករនិយោជិត ឬសិទ្ធិវន្ត ជាមួយនិយោជក និងបេឡាជាតិរបបសន្តិសុខសង្គមទាក់ទង នឹងគ្រោះថ្នាក់ការងារ ?

៧៩- ដើម្បីធ្វើឱ្យរបបសន្តិសុខសង្គមយល់ដឹងដល់ក្រុមជនគោលដៅ តើត្រូវមាននយោបាយយ៉ាងណា ?

៨០- តើគោលការណ៍គាំពារសង្គមមានអ្វីខ្លះ ?

ចម្លើយ

៧៦- សេវាស្តានីតិសម្បទាមាន ៣ ចំណុចសំខាន់ ៖

         ក- សេវាកែលំអរកាយសម្បទា មានជាអាទិ៍ បង្វឹកបង្ហាត់ធ្វើយ៉ាងណាឱ្យជនរងគ្រោះអាចរស់នៅប្រកបការងារ និងជីវភាពសង្គមបាន ដោយការព្យាបាលតាមរយៈការធ្វើចលនា ការផ្តល់អវៈយវៈសប្បនិមិត្ត និងការសម្រួលធ្វើចលនា នានាដូចជារទេះរុញ ឬរទេះស្វ័យប្រវត្តិដែលអាចឱ្យជនរងគ្រោះបម្លាស់ទីពីកន្លែងមួយទៅកន្លែងមួយបាន ។ បង្វឹកជនរងគ្រោះ ឱ្យចេះប្រើសម្ភារៈ ឬអវៈយវៈ សប្បនិមិត្តសម្រាប់ការងារប្រចាំថ្ងៃ និងទំនាក់ទំនងសង្គម ។

         ខ- បណ្ដុះបណ្ដាលវិជ្ជាជីវៈ ធ្វើយ៉ាងណាឱ្យជនរងគ្រោះអាចត្រឡប់ធ្វើការងារវិញបាននៅកន្លែងដដែល ឬ នៅកន្លែងផ្សេងស្របទៅតាមសម្បទា ដែលយើងបានបណ្តុះបណ្តាល ។ ករណីខ្លះទៀត ត្រូវបណ្តុះបណ្តាលជំនាញថ្មី ដើម្បីឱ្យជនរងគ្រោះអាចប្រកបរបរចិញ្ចឹមជីវិតស្របទៅតាមពិការភាពរបស់ខ្លួន ហើយនិងតម្រូវការជាក់ស្តែងរបស់សង្គម ។

         គ- ការស្វែងរកទីផ្សារការងារជូនជនរងគ្រោះ នៅពេលដែលជនរងគ្រោះត្រូវបានបណ្តុះបណ្តាលហើយ យើងត្រូវរកទីផ្សារជូនគាត់ដើម្បីឱ្យមានលទ្ធភាពរកចំណូលឡើងវិញ តាមអ្វីដែលនយោបាយរបស់រដ្ឋមាន ។ ការងារនេះ ទាមទារឱ្យមានកាតព្វកិច្ចរបស់និយោជកជ្រើសរើសជនពិការចូលធ្វើការ ដែលមានចែងក្នុងគោលនយោបាយរបស់រដ្ឋ ។

៧៧- ក្រោយពីកម្មករនិយោជិតទទួលរងគ្រោះថ្នាក់ការងារ ឬក្រោយពីបានទទួលដំណឹងពីកម្មករនិយោជិត ឬសិទ្ធិ វន្តរបស់កម្មករនិយោជិតអំពីពត៌មានទាក់ទងនឹងគ្រោះថ្នាក់ការងារ និយោជកត្រូវរៀបចំឯកសារ លិខិតបញ្ជូនអមជាមួយជនរងគ្រោះជូនទៅមូលដ្ឋានសុខាភិបាល ដែលបានចុះកិច្ចព្រមព្រៀងជាមួយ ប.ស.ស ។ ក្នុងរយៈពេល ៤៨ម៉ោងយ៉ាងយូរនៃថ្ងៃធ្វើការ និយោជកត្រូវផ្ញើររបាយការណ៍គ្រោះថ្នាក់ការងារមកបេឡាជាតិរបបសន្តិសុខសង្គម ព្រមទាំងរៀបចំឯកសារដើម្បីទាមទារតាវកាលិកពីបេឡាជាតិរបបសន្តិសុខសង្គម មានជាអាទិ៍ តាវកាលិកការព្យាបាល ក្នុងករណីដែលព្យាបាលនៅមូលដ្ឋានសុខាភិបាល ដែលមិនបានចុះកិច្ចព្រមព្រៀងជាមួយ ប.ស.ស​ តាវកាលិកបញ្ជូនជនរងគ្រោះតាវកាលិកប្រាក់បំណាច់ប្រចាំថ្ងៃ សោហ៊ុយបូជាសព តាវកាលិកបាត់បង់សមត្ថភាពការងារអចិន្រ្តៃយ៍ និងតាវកាលិកឧត្តរជីវីជាដើម ។

៧៨- នៅពេលដែលរងគ្រោះថ្នាក់ការងារដែលកើតឡើងនៅពេលដែលកំពុងធ្វើការ ការធ្វើដំណើរពីលំដៅស្ថានទៅ កន្លែងធ្វើការ និងត្រលប់មកវិញ ឬជំងវិជ្ជាជីវៈ កម្មករនិយោជិត ឬសិទ្ធិវន្តត្រូវរាយការណ៍ទៅនិយោជក អំពីគ្រោះថ្នាក់ ការងារដែលធ្លាក់មកលើខ្លួន ហើយនឹងត្រៀមឯកសារមួយចំនួនតាមរយៈនិយោជកដើម្បីដាក់ជូនបេឡាជាតិរបបសន្តិសុខ សង្គមពិនិត្យ និងសម្រេច ។ ឯកសារនោះមានជាអាទិ៍ វិក័យបត្រដែលចំណាយលើការព្យាបាលផ្ទាល់ខ្លួននៅពេលដែលប្រើប្រាស់សេវាជាមួយមូលដ្ឋានសុខាភិបាល ដែលមិនបានចុះកិច្ចព្រមព្រៀង អត្តសញ្ញាណបណ្ណសញ្ជាតិខ្មែរ សំបុត្រអាពាហ៍ពិអាហ៍ សំបុត្រកំណើតប្ដី ឬប្រពន្ធនិងកូន និងសំបុត្រមរណៈភាពក្នុងករណីជនរងគ្រោះបាត់បង់ជីវិត ។

៧៩- ដើម្បីធ្វើឱ្យរបបសន្តិសុខសង្គមយល់ដឹងដល់ក្រុមជនគោលដៅ ត្រូវមានគោលនយោបាយដូចជា ៖

• ត្រូវផ្សព្វផ្សាយតាមរយៈនិយោជក ឬអ្នកតំណាងដើម្បីផ្តល់ពត៌មានទៅដល់កម្មករនិយោជិត
• ត្រូវបណ្តុះបណ្តាលជនបង្គោល របស់សហគ្រាសគ្រឹះស្ថានឬតំណាងកម្មករនិយោជិតដើម្បីផ្សព្វផ្សាយ
• ផ្សព្វផ្សាយតាមរយៈប្រព័ន្ធអប់រំដោយផ្ទាល់ តាមរយៈពន្យល់ដល់ក្រុមជនគោលដៅ
• ផ្សព្វផ្សាយតាមប្រព័ន្ធពត៌មានមានជាអាទិ៍ ទូរទស្សន៍ វិទ្យុ កាសែត គេហទំព័រ Facebook ការបោះផ្សាយខិតប័ណ្ណ កូនសៀវភៅតូចៗ ព្រឹត្តប័ត្រពត៌មាន ។

៨០- គោលការណ៍គាំពារសង្គមមានដូចជា ៖

• មូលនិធិសាមគ្គីធម៌ ៖ សាមគ្គីភាព គឺជាតម្លៃមូលដ្ឋានដ៏សំខាន់ នៃការគាំពារសង្គម ។ ចំពោះការអនុវត្តន៍ វាគឺជាយន្តការដូចៗគ្នាសំរាប់បែងចែកជាថ្មីនៃប្រាក់ចំណូល ចំពោះជនទាំងឡាយណា ដែលជាគ្រួសារជនពិការមានកូនក្នុងបន្ទុក ។ តាមរយៈការយោគយល់នេះ កម្មករនិយោជិតត្រូវចែករំលែកនូវកំរិតដូចគ្នានៃការប្រឈមនឹងគ្រោះថ្នាក់ និងហានិភ័យ ដោយមិនគិតពីប្រភេទឧស្សាហ៍កម្ម ដែលកម្មករនិយោជិតកំពុងបម្រើការឱ្យ ។
• ប្រាក់ចំណូល ៖ គោលការណ៍នេះត្រូវបានអនុវត្តន៍ នៅពេលដែលមានការកំណត់នូវចំនួនការបង់អត្ថប្រយោន៍ (តាវកាលិក) ។ វាពាក់ព័ន្ធនឹងចំនួនការបង់ប្រាក់ភាគទាន ដែលផ្អែកលើប្រាក់ខែរបស់កម្មករនិយោជិត ។ បរិបទនេះ គឺត្រូវធានាថាកម្មករនិយោជិតមិនមានអារម្មណ៍ទទួលសម្ពាធ ផ្នែកហិរញ្ញវត្ថុរបស់ ប្រសិនបើកម្មករនិយោជិតមានពិការភាព ឬទុព្វលភាព ។ ក្នុងករណីមរណៈភាពរបស់សាមីជនដែលត្រូវបានធានា ប្រាក់ចំណូលជំនួយត្រូវផ្តល់ទៅឱ្យសមាជិកក្នុងបន្ទុកតាមរយៈសោធនប្រចាំខែ ។
• សមភាព ៖ មូលដ្ឋានគ្រឹះ នៃគោលការណ៍នេះ គឺស្ថិតក្នុងការអនុវត្តន៍ និងបញ្ញត្តិរបស់ខ្លួន ។ តាមរយៈបរិបទនេះ ការគាំពារគ្រោះថ្នាក់ គឺមានគោលដៅកំណត់យកការកាត់បន្ថយគ្រោះថ្នាក់ឲ្យនៅកម្រិតសូន្យ និងជំរុញឱ្យមានវប្បធម៌នៃការរស់នៅប្រកបដោយសុខភាពល្អ គួរត្រូវបានអនុវត្ត ពីព្រោះការកំណត់សន្តិសុខសង្គមពិតកំពុងរក្សាឱ្យកម្មករនិយោជិតមានការងារធ្វើរហូតដល់វ័យចូលនិវត្តន៍ ។ ប្រសិនបើការអនុវត្តន៍នេះអាចប្រព្រឹត្តិទៅបានមែន ប្រាក់ចំណូលពិតរបស់កម្មករនិយោជិត នឹងឡើងកាន់ខ្ពស់ស្របនឹងគំរូសេដ្ឋកិច្ចថ្មីដែលផ្តោតទៅលើសង្គមមានប្រាក់ចំណូលខ្ពស់ ។ បរិបទនេះ ក៏ផ្តល់ឲ្យឱកាសសំម្រាប់កម្មករនិយោជិតដែលត្រូវបានលើកទឹកចិត្តឱ្យត្រលប់ទៅធ្វើការឡើងវិញ ។ ការស្តារនីតិសម្បទាក៏ត្រូវផ្តល់ឱ្យកម្មករនិយោជិតដែលទទួលរងនូវពិការភាព និងទុព្វលភាព ។

តភាគ