វិញ្ញាសាផែនដី ប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា ( វិញ្ញាសាទី៧៤ )

សំនួរ

១. ចូររៀបរាប់ពីការគ្រប់គ្រង និងការបំពុលទឹកនៅកម្ពុជា ។

២. តើការបំពុលទឹកជះឥទ្ធិពលដូចម្តេចខ្លះ ?​​​​​​

៣. ទង្វើរបស់ប្រជាជនខ្មែរក្នុងការប្រ​មូលផលដូចជាការប្រមូលជញ្រ្ជាំងស្រូវអស់ ឬដុតជញ្រ្ជាំងស្រូវចោល ។  តើទង្វើបែបនេះជាទង្វើត្រឹមត្រូវឬទេ ?ហេតុអ្វី ?
៤. នៅពេលដីបាត់បង់សារធាតុចិញ្ចឹម តើយើងត្រូវធ្វើដូចម្តេចដើម្បីបន្ថែមសារធាតុចិញ្ចឹមទៅឲ្យដីវិញ ?

៥. តើគេប្រើប្រាស់ដីធ្វើអ្វីខ្លះ ?

ចម្លើយ

១. រៀបរាប់ពីការគ្រប់គ្រង និងការបំពុលទឹកនៅកម្ពុជា៖

• ការបំពុលទឹកនៅកម្ពុជា ៖ នៅប្រទេសកម្ពុជា ប្រភពនៃការបំពុលទឹកភាគច្រើនចេញមកពីប្រភពរាយប៉ាយ ។ ភាគច្រើននៃទឹកលូរសំអុយ និងទឹកភ្លៀងត្រូវបានគេបង្ហូរចេញតាមប្រឡាយចំហ រួចចូលទៅនៅក្នុងស្រះ ឬបឹងដែលស្ថិតនៅក្បែរលំនៅស្ថានប្រជាជន ។ ប្រទេសកម្ពុជាក៏មានបញ្ហាពីការបំពុលពីប្រភពចំណុចដែរដូចជា រោងចក្រ រង្គសាលភោជនីយដ្ឋាន ផ្ទះទឹក សណ្ឋារគារ និងសិប្បកម្មជាច្រើនបានតាំងនៅជាប់នឹងមាត់ទន្លេ ហើយបានបញ្ចេញចោលកាកសំណល់របស់ខ្លួនចូលទៅក្នុងប្រព័ន្ធទន្លេមេគង្គ ។
• កាគ្រប់គ្រងទឹកនោកម្ពុជា ៖  ការគ្រប់គ្រងទឹកនៅកម្ពុជានៅមានលក្ខណៈទន់ខ្សោយនៅចឡើយជាពិសេសការគ្រប់គ្រងលើការបញ្ចេញសំណល់ចោលទៅក្នុងទឹក ។ ភាគច្រើននៃការបញ្ចេញចោលសំណល់ទាំងនោះគឺមិនបានធ្វើការសំអាតជាមុនឡើយ ។

២. ការបំពុលទឹកជះឥទ្ធិពលលើ ៖​

• ទឹកលើផ្ទៃដី ( ធ្វើឲ្យបឹង ស្ទឹង ទន្លេ ... រងការបំពុល )
• ទឹកក្នុងដី ( រងការបំពុលដោយការជ្រាបនៃសារធាតុបំពុល )
• ធ្វើឲ្យមនុស្ស សត្វ ដែលប្រើប្រាស់ទឹកមានគ្រោះថ្នាក់
• ប៉ះពាល់ដល់ភាវរស់នៅក្នុងទឹក ( ប្លង់តុងរុក្ខជាតិ ប្លង់តុងសត្វ និងភាវរស់ផ្សេងៗទៀត ) ។

៣. ទង្វើរបស់ប្រជាជនខ្មែរក្នុងការប្រ​មូលផលដូចជាការប្រមូលជញ្រ្ជាំងស្រូវអស់ ឬដុតជញ្រ្ជាំងស្រូវចោល ។ ទង្វើបែបនេះជាទង្វើមិនត្រឹមត្រូវទេព្រោះជញ្រ្ជាំងស្រូវគឺជា ប្រភពសារធាតុចិញ្ចឹមនៅពេលពួកវាពុកផុយរលួយដែលអាចផ្តល់សារធាតុចិញ្ចឹមសម្រាប់ដំណាំស្រូវតទៅទៀតដូច្នេះបើយើងប្រមូលវាអស់ ឬដុតចោល​គឺនាំឲ្យបាត់បង់សារធាតុចិញ្ចឹមដែលធ្វើឲ្យដីបាត់បង់ជីជាតិ ។

៤. នៅពេលដីបាត់បង់សារធាតុចិញ្ចឹម ដើម្បីបន្ថែមសារធាតុចិញ្ចឹមទៅឲ្យដីវិញ យើងត្រូវបន្ថែមជីគីមី និងជីសរីរាង្គទៅលើដីនោះ ជាពិសេសជីសរីរាង្គព្រោះវាធ្វើឲ្យដីធូរ និងរក្សាជីជាតិបានយូរ និងមិនធ្វើឲ្យខូចដីទៀតផង ។

៥. គេប្រើប្រាស់ដីសម្រាប់សាងសង់ទីក្រុង ភូមិករ ទីប្រជុំជនប្រព័ន្ធគមនាគមន៍ រោងចក្រឧស្សាហកម្ម និងសាងសង់សិប្បកម្មផ្សេងៗ ។ ដីមួយផ្នែកធំមានសារៈសំខាន់ជាងគេគឺ ត្រូវបានប្រសម្រាប់ការដាំដុះដំណាំស្បៀង និងដំណាំឧស្សាហកម្ម ហើយដីមួយផ្នែកទៀតគឺមានសារៈសំខាន់សម្រាប់ព្រៃឈើ ។ ដីព្រៃត្រូវបានគេរក្សាទុកព្រោះជាស្ថានប្រព័ន្ធធម្មជាតិក្នុងការចាំបាត់សម្រាប់ធ្វើរស្មីសំយោគ និងជាជម្រកសត្វ ។