វិញ្ញាសាផែនដី ប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា ( វិញ្ញាសាទី៧៣ )

សំណួរ

១. ក្នុងចំណោមទឹកទាំងអស់ តើមានទឹកប្រៃមានប៉ុន្មានភាគរយ នឹងទឹកសាបប៉ុន្មានភាគរយ ?

២. តើទឹកសាបដែលមនុស្សប្រើប្រាស់សព្វរាល់ថ្ងៃមានប្រភពមកពីណាខ្លះ ?

៣. ធនធានទឹកសាបមានបរិមាណតិចតួចប៉ុណ្ណោះ តើធនធានទឹកកំពុងទទួលរងនូវការបំពុលដោយសកម្មភាពណាខ្លះ ?

៤. តើប្រភពនៃការបំពុលទឹកមានប៉ុន្មានប្រភេទ ? អ្វីខ្លះ ?ចូរឲ្យនិយមន័យប្រភេទនីមួយៗ ។

៥. ដើម្បីគ្រប់គ្រង និងុំកែលំអគុណភាពទឹក តើយើងត្រូវធ្វើដូចម្តេចខ្លះ ?

ចម្លើយ

១. ក្នុងចំណោមទឹកទាំងអស់មានទឹកប្រៃមាន៩៧% នឹងទឹកសាប ៣% ។

២. ទឹកសាបដែលមនុស្សប្រើប្រាស់សព្វរាល់ថ្ងៃមានប្រភពមកពី ទឹកលើផ្ទៃដី ( ស្ទឹង បឹង ទន្លេ អូរ ស្រះ ត្រពាំង​ .... ) និងទឹកក្នុងដី ។

៣.ធនធានទឹកសាបមានបរិមាណតិចតួចប៉ុណ្ណោះ តើធនធានទឹកកំពុងទទួលរងនូវការបំពុលដោយសកម្មភាពដោយ សំណល់ឧស្សាហកម្ម ទឹកលូសំអុយ ល្បាប់ម៉ដ្ឋ ( បណ្តាលមកពីសំណឹក ) សំណល់គីមី និងសារធាតុចិញ្ចឹម ( បណ្តាលមកពីលំហូរកសិកម្ម ) ។

៤. ប្រភពនៃការបំពុលទឹកមានពីរ ប្រភេទគឺ ប្រភពចំណុច និងប្រភពរាយប៉ាយ ។

• ប្រភពចំណុច គឺជាប្រភពដែលបញ្ចេញសំណល់ចូលទៅក្នុងបរិស្ថានតាមរយៈបំពង់បង្ហូរ លូ ឬប្រឡាយ ពីទីតាំងច្បាស់លាស់មួយដូចជារោងចក្រឧស្សាហកម្ម ឬរោងចក្រសំអាតទឹកលូសំអុយជាដើម ។
• ប្រភពរាយប៉ាយ គឺជាប្រភពដែលបង្កឲ្យមានការបំពុលដោយសារធាតុបំពុលគីមីដែលហូរធ្លាក់ចូលទៅក្នុងទឹកលើផ្ទៃដីនៃតំបន់ដ៏ធំមួយ ។

៥. ដើម្បីគ្រប់គ្រង និងកែលំឡអគុណភាពទឹកយើងត្រូវ ៖

• កាត់បន្ថយសារធាតុកង្វក់ដែលធ្លាក់ចូលទៅក្នុងទឹកស្អាតនិងតាមរយៈការសំអាតសំណល់រាវ ។
• រៀបចំចងក្រងច្បាប់មួយចំនួនដើម្បីត្រួតពិនិត្យការបំពុលទឹក ប៉ុន្តែជាទូទៅវាមានប្រសិទ្ធភាពអនុវត្តន៍ខ្ពស់តែនៅក្នុងការត្រួតពិនិត្យប្រភពបំពុលចំណុចច្រើនជាងការត្រួតពិនិត្យប្រភពបំពុលរាយប៉ាយ ។
• អប់រំប្រជាជនឲ្យយល់ដឹងពីការបំពុលទឹក និងចូលរួមកាត់បន្ថយការបំពុលទឹក ។