វិញ្ញាសាផែនដី ប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា ( វិញ្ញាសាទី៨១ )

សំនួរ

១. តើវិធីគ្រប់គ្រងសំណល់ដោយការដុតគឺជាវិធីល្អដែរឬទេ ? ចូរព្យល់ពីហេតុផល ។

២. ដូចម្តេ​ច​ដែលហៅថា កំប៉ុស្តកម្ម ?

៣. តើការធ្វើកំប៉ុស្តកម្មផ្តល់អត្ថប្រយោជន៍អ្វីខ្លះ ?

៤. តើមានវិធានការអ្វីខ្លះដើម្បីកាត់បន្ថយសំណល់ ?

ចម្លើយ

១. វិធីគ្រប់គ្រងសំណល់ដោយការដុតគឺជាវិធីមិនល្អទេព្រោះផលិតផលដែលកើតចេញពីការដុតនេះត្រូវបញ្ចេញចោលទៅក្នុងបរិយាកាស និងសេសសល់ក្នុងផេះ ។ ផលបានមកពីការដុតរួមមាន ធូលី ឧស្ម័នអាស៊ីត ចំហាយ លោហៈ និងសារធាតុគីមីពុល ( កាបូនឌីអុកស៊ីត ) ហើយផលិតផលទាំងនេះសុទ្ធតែអាចធ្វើឲ្យខូចបរិស្ថាន និងសុខភាពសាធារណៈ ។ ផេះដែលបានមកពីការដុតសំណល់មានលក្ខណៈពុលខ្លាំង ដោយសារតែវាមានលោហៈក្នុងកំហាប់ខ្ពស់ ។ ម៉្យាងទៀតការដុតសំណល់មានតម្លៃខ្ពស់ណាស់បើធៀបជាមួយនឹងវិធីគ្រប់គ្រងសំណល់ដោយការយកសំរាមទៅចាក់នៅកន្លែងចាក់សំណល់ ។

២. កំប៉ុស្តកម្មគឺជា ការបំបែកធាតុជីវៈនៃសំណល់សរីរាង្គនានាដូចជាសំណល់ផ្ទះបាយ សំណល់កសិកម្មក្រោមការត្រួតពិនិត្យ​ និងដោយគ្មានវត្តមានខ្យល់ដើម្បីបំលែងឲ្យទៅជាជីកំប៉ុស្ត ។

៣,ការធ្វើកំប៉ុស្តកម្មផ្តល់អត្ថប្រយោជន៍ដូចជា ៖ កាត់បន្ថយមាឌសំណល់រឹង កាត់បន្ថយថ្លៃដដឹកជញ្ជូនទៅកាន់កន្លែងចោលសំណល់ បង្កើតការងារថ្មីៗបន្ថែមទៀត ធ្វើជាដីកំប៉ុស្ត ដែលមានអត្ថប្រយោជន៍ចំពោះផ្នែកកសិកម្ម ។

៤. វិធានការដើម្បីកាត់បន្ថយសំណល់គឺ ៖

• ចៀងវាងប្រើប្រាស់ផលិតផលដែលផលិតសំរាមច្រើនដូចជា ក្រដាស កែវជ័រ ចានជ័រ ពិសេសថង់ផ្លាស្ទិច ។
• បន្ថយបរិមាណសំណល់រឹងនៅគេហដ្ឋានតាមរយៈការប្រើប្រាស់ផលិតផលដែលបន្ថយសំណល់ ។
• សំណល់លំនៅដ្ឋានភាគច្រើនអាចកែច្នៃជាថ្មីបាន
• ការប្រើប្រាស់ឡើងវិញគឺប្រើប្រាស់របស់​ក្នុងគោលដៅផ្សេងពីគោលដៅដើម ។ ការប្រើប្រាស់ឡើងវិញអាចចៀសវាងការបញ្ចេញសំណល់ចោលទាំងស្រុង ។
• ការធ្វើជី​កំប៉ុសពីសំណល់សរីរាង្គដូចជាសំណល់បន្លែ ផ្លែឈើ សំបកដូង សំបកពង់មាន់ជាដើម ។ កំប៉ុស្តកម្មអាចកាត់បន្ថយសំណល់រឹងសរីរាង្គដែលត្រូវចាក់ចោល ។ ជីកំប៉ុស្តដែលផលិតបានអាចយកទៅប្រើក្នុងការដាំដំណាំ ។
• កុំចោល ឬដុតសំណល់រឹងតាមផ្លូវ ក្បែរផ្ទះ ។
• ទុកសំណល់នៅចំណុចប្រមូលផ្តុំក្នុងរយៈពេលខ្លី មុនការប្រមូល ។ ការធ្វើបែបនេះអាចឲ្យសំរាមនៅក្នុងគំនរមិនស្ថិតនៅរាយប៉ាយលើផ្លូវ បើទុកសំរាមចោលនៅគំនរយូរអាចទាក់ទាញសត្វកណ្តុរ និងសត្វចង្រៃដទៃទៀត ។